Read lubukusu Lk. 4 Bible Online

Lk. 4 - lubukusu bible

Lk. 4

¹Yesu akobola khukhwama e Yoritani ne echuule Roho Omutakatifu mala arangirirwa ne Roho ayilwa mu sichiimi,

²niio akhakwa ne Sietani khu ndaalo kamakhumi kane. Mu siise esio sioosi se aliakho siakhulia tawe, oli siise esio siawa enjala yamulia.

³Sietani amuboolela ali, “Ewe waaba ne oli Omwana owa Wele boolela libaale lino likele siakhulia.”

⁴ Nio Yesu amukobosia ali, “Liiandiko liboola lili, ‘Omundu sanyala khumenya sikila siakhulia siong'ene tawe.’ ”

⁵Nio Sietani amuniinia khu sikulu mala amwekesia khangu bubwami bwe sibala sioosi.

⁶Sietani amuboolela ali, “Ndakhuelesia ewe bunyali buno ne buiinda buno bwoosi. Naebwa bioosi, mala ese nyala naelesia omundu yesi yesi niye samwene nenya.

⁷Nono, bino bioosi bilaba bibiowo waba ne usaaya ese.”

⁸ Yesu akobosia ali, “Liiandiko liboola lili, ‘Saaya Omwami Wele wowo, ne khumukhalaabanila niye yeng'ene!’ ”

⁹Nio Sietani amubukula amuyila Yerusalemu, mala amura khu sisekese sie Lukaangu, mala amuboolela ali, “Ewe waaba ne oli Omwana owa Wele, suna aasi khukhwama ano.

¹⁰ Sikila liiandiko liboola lili, ‘Wele alaboolela malaika bewe bakhuliinde bulayi.’

¹¹ Lundi liboola lili, ‘Balakhutiila mu makhono kabwe nio okhetuya khu mabaale tawe.’ ”

¹² Ne Yesu akobosia ali, “Liiandiko liboola lili, ‘Okhakhaka Omwami Wele wowo tawe.’ ”

¹³Nga Sietani ne amala khukhaka Yesu mu buli ngila, amulekha khulwe siise.

¹⁴Nio Yesu akobola mu Kalilaya mu maani ka Roho Omutakatifu. Lilomaloma lie babaandu khu niye liasalaanila mu sibala esio siosi.

¹⁵Ekisia mu masinakooki mala aebwa efuma ne babaandu boosi.

¹⁶Nio Yesu acha e Nasareti, niio achoela, mala oli mu Sabato acha mu sinakooki nga buli lwoosi. Enyokha khusoma kamaandiko

¹⁷mala bamuelesia sitabu sio mung'oosi Isaya. Abambula sitabu mala anyoola abuundu niio kaandikwa kali,

¹⁸ “Roho owo Mwami ali khwise, sikila andobora ese khureera Elomo Endayi khu bataambi. Andumire khukhwilwacha bulekhuule khu baambe, khukhola baabofu babone, khulekhuula babapisibwa sibi,

¹⁹ne khuboola ndi siise siolile, nisio Omwami alaonia babaandu bewe.”

²⁰Yesu afuunikha sitabu, asiakanisia omukholi mala ekhala aasi. Babaandu boosi mu sinakooki baunguusa Yesu

²¹nga ababoolela ali, “Endaalo yino kamakhuwa ke liiandiko kano kechusibwe mu moni chenywe.”

²²Boosi basiimisibwa naye mala bauka bulayi bwe kamakhuwa niko alomaloma. Baloma bali, “Se ali okhwa Yosefu ta ku?”

²³Ababoolela ali, “Ndi nang'ali ndi mulamboolela lusimo luno, ‘Musilikhi, yionia wamwene.’ ” Lundi mulamboolela khukhola mu lukoba lwase lwengo bibiindu bibieene ne bibieene nibio mwauliile bali biekholeekhe mu Kaperinaumu.

²⁴ Yesu ababoolela ali, “Ng'ali muboolela enywe ndi, se aliio omung'oosi ofukiililwa mu sibala siewe tawe.”

²⁵ Muboolela enywe bung'ali ndi, “Babao banamulekhwa bakali mu Isiraeli mu ndaalo cha Elicha, nga efula ne yabira kimiiko kitaru ne kimieesi sita, mala enjala engali yaba mu sibala mwoosi.

²⁶ Ne Elicha se arumwa khu mundu yesi yesi mu Isiraeli tawe, ne kakhali arumwa khu namulekhwa yeng'ene, owamenya mu e Sarefati mu sibala sia Sidoni.

²⁷ Lundi be bulwaale bwe kamakele babaao bakali mu Isiraeli mu ndaalo cho mung'oosi Elisha, ne se aliio namulala khu nibo owaonisibwa tawe, nakhali Naamani owe Siria yeng'ene.”

²⁸Boosi ba baaba mu sinakooki omwo, nga baulila kano baambwa lirima.

²⁹Mala benyokha basindikha Yesu bamurusia enje we lukoba, bamuniinia khu sikulu nisio bombakhakho lukoba lwabwe. Beenya bamumwaate emaayo.

³⁰Ne kakhali ababiramo busa echiila.

³¹Mala Yesu ekha acha e Kaperinaumu lukoba lwa Kalilaya, niio ekisia mu Sabato.

³² Babaandu bauka kamekisio kewe lukali sikila lilomaloma liewe liaba lie bunyali.

³³Ne omundu we sisieeno aaba mu sinakooki, mala akukuula lukali ali,

³⁴“Aa Yesu owe Nasareti, ewe wenya khukhola siina khwifwe? Wenya khukhubunia efwe? Ese khumanyile ndi ewe oli Omutakatifu owa Wele.”

³⁵Nio Yesu ayibila sisieeno chana naloma ali, “Sila, mala omururemo! Mala sisieeno siapa aasi omundu chana ebweeni we babaandu mala siamururamo busa khumuumisia tawe.”

³⁶Babaandu boosi bauka, mala bareebana bali, “Makhuwa siina kano? Sikila khulwe bunyali ne kamaani akhokhela bisieeno mala bicha!”

³⁷Mala kamakhuwa ka Yesu kasalaanila buli abuundu mu lukoongo olwo.

³⁸Yesu arura mu sinakooki mala acha engila munju mwa Simoni. Masalaawe owa Simoni aba alwala bulwaale bwe kumureengo, mala baboolela Yesu bulwaale bwa masalaawe chana.

³⁹Yesu amwimao mala ayibila bulwaale buwe mala bwawa. Omuloosi chana enyokha khangu ne khu bayeeta khurekekha siakhulia.

⁴⁰Nga enyanga yaba nelikho ekwa, boosi ba baaba ne basaale balwala bulwaale chingano na ngano, babareera khu Yesu ara kamakhono kewe khu buli sia mulala, mala abaonia boosi.

⁴¹Bisieeno biarura mu baandu bakali, ne bilila bili, “Ewe oli Omwana owa Wele!” Ne kakhali Yesu abikhokhela ne se abielesia kumunwa bilomalome lundi tawe, sikila biamanya bili niye ali Kristo.

⁴²Oli busia Yesu arura mu lukoba acha abuundu niio omundu akhaaba tawe. Babaandu barakikha khumuyiima mala nga bamunyoola khwenya abarureo tawe,

⁴³ne kakhali ababoolela ali, “Khukhwola nilwache Elomo Endayi eye Bubwami bwa Wele mu ngoba chichiindi chosi; sikila ako niko Wele anduma khole.”

⁴⁴Nio elwacha burume mu chisinakooki mu sibala sioosi.