Read lubukusu Lk. 5 Bible Online

Lk. 5 - lubukusu bible

Lk. 5

¹ Endaalo ndala Yesu aaba emile khu sikiingi sie nyanja eya Kenesareti, babaandu beyindilisia bamwolakho khurekeeresia elomo eya Wele.

²Abona kamaaro kabili a nyanja, ne banaabi baba baruriremo balikho basiinga chindiimba chabwe.

³Yesu engila mu liaaro lilala liliaba lia Simoni, amuboolela alirusie asikiingi alisende khu meechi. Nio Yesu ekhala khu liaaro mala ekisia babaandu.

⁴Nga amala khulomaloma aboolela Simoni ali, “Yila liliaaro alusiba, mala mumwaate chindiimba chenywe mu meechi, mulaamba ching'eeni.”

⁵ Simoni amukobosia ali, “Omwami, khurekire ching'eeni siilo sioosi, mala se khunyoolilekho siindu tawe! Ne sikila walomile, ndamwaatamo chindiimba.”

⁶ Mala nga bakhola bario batiila ching'eeni chingali mala chindiimba chenga khukitukha,

⁷basakula babasiaabwe babaaba mu liaaro liliindi beche babayeete. Becha mala bechusia ching'eeni mu maaro koombi, kaba siimbi khukhwesiikha.

⁸Ne nga Simoni Petero abona ario, asikama ebweeni wa Yesu aloma ali, “Omwami, Ndureo! Ese ndi omundu omwoni!”

⁹Petero ne babasie boosi, barangararwa bauka lukali, khulwe bukali bwe ching'eeni nicho baba ne batilile,

¹⁰kaba kario khu Yakobo ne Yoana, ba okhwa Sebetayo, ba baaba basaangi ne Simoni. Nio Yesu aboolela Simoni ali, “Okharia tawe, khukhwama luno ewe olaba omunaabi owe babaandu.”

¹¹Mala bakhweesa bareera kamaaro kabwe khu sikiingi balekha buli siindu mala bamuloondakho.

¹²Nga Yesu ne aba mu lukoba lulala, omundu niye kamakele kamala kumubili kwoosi amwichakho. Ne nga abona Yesu, asikama ebweeni wewe amusaba ali, “Omwami, waaba ne wenya, onyala wambonia!”

¹³Yesu amutilakho, amuboolela ali, “Nenya, khoone.” Ne abwene ne abwene kamakele kamururakho.

¹⁴ Yesu atanyiliila omundu chana ali, “Okhaboolelakho omundu yesi yesi tawe, ne kakhali khoche weyokesie khu musaayi, mala orusie siianwa sibe simanyisio khu baandu khulwe khuona khwowo nga Musa ne alaka.”

¹⁵Ne kakhali kamakhuwa ka Yesu kasalaanila lukali, mala babaandu bakali becha bebuusia bamuulile lundi abaonie bulwaale bwabwe.

¹⁶Ne kakhaba kario achichanga mu sichiimi yeng'ene khusaba.

¹⁷Endaalo ndala, nga Yesu aaba ne alikho ekisia, Bafarisayo ne babekisia be lilaka baba bekhaleo, ba baaba ne bamile buli mu birekere bia Kalilaya ne mu Buyuda ne khukhwama Yerusalemu. Ne bunyali bwa Wele Omunyali Owa Bioosi bwe khuonia bwaba naye.

¹⁸Babaandu balala bareerera khu sitanda omundu owafwokoya. Bakhaka khu mureera munju bamure ebweeni wa Yesu.

¹⁹Ne sikila babaandu baaba bakali, se banyoola engila eye khumwingisia mukari tawe. Baniina naye khunju barusiakho kamatifari, bekula sibanga mala bamwikhisilao niye ne sitanda siewe akari we babaandu ebweeni wa Yesu.

²⁰Ne nga Yesu ne abona lisuubila liabwe aboolela omundu oyo ali, “Omusaale, wabeleelwe bubwoni bwowo.”

²¹Nio baandiki ne Bafarisayo barakikha khureeba ne baloma bali, “Naanu onyala abeela bubwoni nakhali Wele yeng'ene?”

²²Yesu amanya kamebaasio kabwe mala abareeba ali, “Siina sikila ne mwibaasia murio?

²³Lilala siina liliangu? Khuloma ndi, ‘Wabeleelwe bubwoni bwowo’, namwe ndi, ‘Yinyokha okeende?’

²⁴Ne ndamwekesia ndi Omwana wo Mundu ali ne bunyali khu sibala khubeela bubwoni.” Nio aboolela omundu owafwokoya chana ali, “Yinyokha obukule sitanda siowo mala oche engo!”

²⁵Abwene ne abwene omundu oyo enyokha ebweeni wabwe boosi, abukula sitanda siewe nisio akonangakho mala acha engo ne afumia Wele.

²⁶Nio boosi bauka, baria, mala bafumia Wele ne baloma bali, “Endaalo yino khwaboone bibiindu bikeni.”

²⁷Enyuma wa kano Yesu arura acha mala abona omundu owaroosianga busuuru owalaangwa bali Lawi, ekhaale mu ofisi eye busuuru. Yesu amuboolela ali, “Nondekho.”

²⁸Khwako Lawi alekha buli siindu mala enyokha amuloondakho.

²⁹Nio akholela Yesu naikara emboofu munju mwewe. Mu bakeni babalia naye, bakali baba babaroosianga busuuru.

³⁰ Bafarisayo ne baandiki beng'ulung'unya khu beeka ba Yesu ne baloma bali, “Siina sikila enywe ne mulia ne khuunywa ne baroosi be busuuru ne babooni?”

³¹Yesu abakobosia ali, “Bali balamu se beenya omusilikhi tawe, ne kakhali balwale nibo babeenya omusilikhi.

³²Se necha khulaanga baluungi tawe, ne kakhali necha khulaanga babooni bekanile.”

³³Babaandu balala baboolela Yesu bali, “Buli lwoosi babeeka ba Yoana beyimananga khulia ne basaba. Babeeka be Bafarisayo bosi bakholanga bario, ne kakhali babowo balia ne khunywa.”

³⁴Yesu abakobosia ali, “Enywe munyala mwakhola bakeni be siselelo beyimana khulia niye baakhiile nali nabo ku? Se kali kario tawe.

³⁵Endaalo elecha niyo oakhiilwe alibukulwa abarureo. Mu ndaalo echo baliyimana khulia.”

³⁶Lundi ababoolela lukano ali, “Se aliio obukulanga silaka sie ngubo embia mala asipila khu ngubo ekhale tawe. Aaba nakhola ario aba atabuule embia, ne silaka sie ngubo embia esio se silafwaanana ne khale tawe.

³⁷Namwe se aliio omundu ochukhanga endali embia mu oochwa chikhale tawe, kaaba bali akhola ario aba endali oyo elatabula chioochwa echo mala echichukhe aasi, mala aba chioochwa chana chonekhe.

³⁸Ne kakhali khukhwola endali embia echukhwe mu oochwa chimbia.

³⁹Se aliio omundu owenya endali embia namalile khunywa endali ekhale tawe; sikila alaloma ali, ‘Endali ekhale eli endayi.’ ”