Read lubukusu Lk. 7 Bible Online

Lk. 7 - lubukusu bible

Lk. 7

¹Nga Yesu ne amala khulomaloma lino akari we babaandu babamuulilanga, acha mu Kaperinaumu.

²Abao omukhulu we banamae be Barumi owaba no mukholi omukoosi khu niye, omukholi yuno aba omulwale lukali, aba siimbi khufwa.

³Nga omukhulu owe banamae oyo aulila ka Yesu, aruma basaakhulu be Siyuda bamuboolele eche aonie omukholi wewe.

⁴Nga basaakhulu abo boola khu Yesu bamwikoonjelela ne baloma bali, “Omundu yuno ng'ali olaana omuyeete.

⁵Sikila asiima ekholo yefwe mala akhwombakhila esinakooki.”

⁶Nio Yesu acha ne nabo. Nga ne aba nakana khukhwola khunju, omukhulu we banamae chana aruma basaale bewe khu Yesu namuboolela ali, “Omwami okhenaania busa tawe, ewe se wolaana khukhwingila munju mwase tawe,

⁷namwe se nibaasia ndi nyala khukhwicha niio oli tawe. Ne kakhali loma busa elomo, mala omukholi wase aone.

⁸Sikila ese ndi omundu ooli aasi we kamalaka, ndi ne banamae aasi wase: ne nyala khuboolela mulala ndi ‘Cha’ aacha ne khu kundi ndi, ‘Yiicha’ mala eecha; lundi nyala naboolela omukholi wase ndi, ‘Khola sino’ mala asikhola.”

⁹Nga Yesu ne aulila kano, auka lukali mala eekhebukha, aaboolela babaandu bakali bamuloondilekho ali, “Muboolela enywe ndi, ese khaabonakho lisuubila liri mu Isiraeli tawe!”

¹⁰Nga ba baaba ne barumirwe bakobola munju yo mukhulu owe banamae banyoola omukholi aonile.

¹¹Enyuma we siise sitiiti, Yesu ne babeeka bewe ne babaandu bakali bacha khu lukoba lulwalaangwa Naini.

¹²Nga aba nali khwola a silibwa sie lukoba, abona babaandu bakali basutile omufu bamurusia enje. Ne omufu oyo aba omuteelwa owa namulekhwa.

¹³Nga Yesu abona namulekhwa yuno amukholela siisa mala amuboolela ali, “Okhalila tawe.”

¹⁴Nio acha atiila khu lisanduku lio mufu, ne basutile bema basila. Ne Yesu aloma ali, “Musoleeli! ‘Lamukha.’ ”

¹⁵Omufu alamukha ekhala mala arakikha khulomaloma, mala Yesu amwakaanisia maawe.

¹⁶Buuri bwabaamba boosi mala baelesia Wele luyali, ne baboola bali, “Omung'oosi we liukia aselukhe akari wefwe! Ne Wele echile khuonia babaandu bewe!”

¹⁷Mala kamakhuwa kewe kano kasalanila mu sibala sia Yuda ne chingoongo chiichasibotookhelela choosi.

¹⁸Nga babeeka ba Yoana bamuboolela bibiindu bino bioosi alangakho babili,

¹⁹ne khubaruma khu Mwami bamureebe bali, “Ewe niwe niye Yoana aloma ali olikho wicha, namwe khwirekekhele okundi?”

²⁰Nga ne boola khu Yesu bamuboolela bali, “Yoana Omubatiisi akhurumire efwe khwiwe khu khureebe khuli, ‘Ewe niwe niye aloma ali olikho wicha namwe khwirekekhele okundi?’ ”

²¹Mu siise esio Yesu aonia bakali ba baaba ne bulwaale ne lufu ne bisieeno ne babofu bakali babona.

²² Ne akobosia babeeka ba Yoana ali, “Khemuche muboolele Yoana niko muboone ne khuulila, babofu babona, baleme bakeenda, be kamakele baonile, bamiinyi balikho baulila, bafu balamusibwa ne Elomo Endayi yilwachibwa khu bataambi,

²³ali ne khabi osuubila koosi khwise.”

²⁴Nga babaandu nibo Yoana aaruma baba ne bakobolayo Yesu arakikha khulomaloma khu baandu khuloondekhana ne Yoana ali, “Enywe nga mwacha khu Yoana mu sichiimi, mwenya khubona siina? Lubembe nilwo ekhuungu euucha ku?

²⁵Mwacha khubona siina? Omundu owefwarire chingubo chindayi? Lola, abo babefwara chingubo chindayi che bukusi bamenya mu bukoote mu machipi ke babaami.

²⁶Siina nono nisio enywe mwacha khubona? Omung'oosi? Ee, ng'ali ese muboolela enywe ndi Yoana ali omukali khukhila omung'oosi.

²⁷ Oyuno ali niye liiandiko liboola lili: ‘Ese ndaruma omurumwa wase ebweeni wowo, olakhurekekhera ewe engila ebweeni wowo.’

²⁸“Muboolela enywe ndi, abo boosi nibo bakhasi basaala se aliio omukali khukhila Yoana tawe, ne kakhali oyo oli omukeekhe mu bwami bwa Wele ali omukali khumukhila niye.”

²⁹ Nga babaandu boosi ne bamuulila, lukali abo babaroosianga busuuru, nibo ba baaria lilaka lia Wele mala babatiisibwa ne Yoana.

³⁰Ne kakhali Bafarisayo ne baandiki baloba sifuno sia Wele khu nibo mala khubatiisibwa ne Yoana tawe.

³¹Yesu achiililila khuloma ali, “Nono nyala khufwaananisia babaandu be selukho yino khu siindu siina? Bali babaandu ba lukano siina?

³²Bali nga babaana babekhaale khu soko, mala balaangana bali, ‘Khumupiile enywe kumulele, mala semukhinile tawe, khwisasaarire, mala enywe khulila tawe!’

³³Sikila Yoana Omubatiisi echa, eyimana khulia ne khunywa endali, mala enywe mwaloma muli, ‘Ali ne sisieeno.’

³⁴Omwana wo Mundu echa alia ne khunywa, mala enywe mwaloma muli, ‘Lola owe kuluungo lundi omumeesi, omusaale owe baroosianga busuuru ne babooni!’

³⁵Ne kakhaba kario, limanya lia Wele liekesibwa khuba ng'ali khwaabo balifukiilila.”

³⁶Mulala khu bafarisayo aalanga Yesu khukhwikolooya naye, mala acha munju eyo ekhala khu sialwa.

³⁷ Omukhasi omwoni aaba mu lukoba omwo, nga namanya ali Yesu ekhaale khu sialwa munju yo Mufarisayo echa ne echuupa eyichuulemo kamafura ke bukusi bwe angaaki kaunya bulayi,

³⁸omukhasi oyo eema enyuma wa Yesu abikele biewe. Aaba alikho alila ne atosia bikele bia Yesu ne kamasika kewe. Nio eeya bikele bia Yesu ne lichuune liewe. Omukhasi yuno ekwayila Yesu ne khumuakha bikele kamafura kaunya bulayi ako.

³⁹Nga Omufarisayo owamulanga oyo aboona kano ebaasia ali, “Omundu yuno aba omung'oosi andi amanyile omukhasi omutiililekho yuno ali naanu, lundi owalukano siina, sikila ali omwoni.”

⁴⁰Yesu amuboolela ali, “Simoni, ndi ne likhuwa nilio nenya khukhuboolela.” Ne Simoni amukobosia ali, “Omwekisia likhuwa siina?”

⁴¹Yesu aamureeba ali, “Omundu owekopianga aaba ne be kamakobi babili; mulala aba ne likobi liewe lie chirupia chimia chiraano, ne okundi aba ne likobi lie chirupia kamakhumi karaano.

⁴²Nga bakhaywa khu muruunga ababeela boombi. Nono naanu khu babili bano olamusiima lukali?”

⁴³Simoni akobosia ali, “Nibaasia ndi oyo owabeelwa chingali.” Yesu amukobosia ali, “Wakhalaake bulayi.”

⁴⁴Nio ekhebukha niio omukhasi chana ali, aboolela Simoni ali, “Waboone omukhasi yuno? Nga ningile munju yowo se mumbeele kameechi ke khusaaba bikele biase tawe, ne niye asiingile bikele biase ne kamasika kewe ne khubieya ne lichuune liewe.

⁴⁵Se munjikwayiile tawe ne niye khukhwama khu siise nisio nichiile muno se alekhilekho khukhunjikwayila tawe.

⁴⁶Se wambakhilekho kamafura mu murwe tawe, ne niye ambakhile kamafura bikele.

⁴⁷Khwako khuboolela ndi, bubwoni bwewe buuli bukali bwabeleelwe sikila ekeesie busiime bukali; ne kakhali oyo obeelwa makeekhe ali ne busiime bukeekhe.”

⁴⁸Nio Yesu aboolela omukhasi chana ali, “Bubwoni bwowo bwabeleelwe.”

⁴⁹Abo ba baaba khu sialwa ne Yesu barakikha khureebana bali, “Naanu yuno, obeela akhaba bubwoni?”

⁵⁰Ne kakhali Yesu aboolela omukhasi chana ali, “Lisuubila liowo liakhuoniisie; khoche kumuleembe.”