Read lubukusu Lk. 8 Bible Online

Lk. 8 - lubukusu bible

Lk. 8

¹Enyuma we siise sitiiti Yesu abira mu ngoba ne mu birekere ne elwacha Elomo Endayi eye Bubwami bwa Wele, ne aba ne barumwa bewe ekhumi na babili,

² akhaba bakhasi balala babaonisibwa bulwaale ne khurusibwamo bisieeno baba naye. Nga Maria (owalaangwa Makatalena) niye bisieeno saba biaruramo;

³Yoanina mukha Kusa omukholi owo mukhoongo Herodi, ne Susana ne bakali babaandi barumikhiranga kimiaandu kiabwe khuyeeta Yesu ne babeeka bewe.

⁴Babaandu bachiililila khukhwicha khu Yesu khukhwama mu ngoba chingali. Nga bakucha Yesu abakanila lukano luno ali,

⁵“Omumiichi mulala acha khumiicha bumiicho bwewe, ne nga aba ne alikho amiicha, bulala bwakwa khu ngila bwaswalwakililwa, mala chinyuni chabuboocha.

⁶Bulala bwakwa khu lwanda, nga bwamela, oli bulikho buchoa mala bwoma sikila bwataamba kameechi.

⁷Bulala bwakwa mu mawa, oli bwachoa kamawa kabuuna bwoma.

⁸Bubuundi bwakwa mu maloba kamalayi, bwachoa, mala buli lulala lwaama emia.” Nga aba naboola lino amaliilisia ali, “Oyo oli ne kamaru ke khuulila lekha aulile!”

⁹Babeeka bewe bamureeba sifuno sie lukano luno,

¹⁰ akobosia ali, “Khwinywe mwaelesibwa khumanya kakekisa ke Bubwami bwa Wele ne khu baandi kali mu ngano, nio bakhalola se balabona tawe, bakharekeeresia se bakhaulile tawe.

¹¹“Sifuno sie lukano luno nisiesi. Bumiicho buli elomo eya Wele.

¹²Bumiicho bubwakwa khu ngila buli nga abo baulilanga elomo ne Sietani echa mala akibukula erura mu miooyo kiabwe nio bakhasuubila mala baonisibwe tawe.

¹³Ne bumiicho bubwakwa khu lwanda buli nga abo ba bakaanila burume bwa Wele mu busangaafu mala se bali ne lisuubila likali tawe, basuubila khu siise sitiiti oli siise sie kamakhako siola ne bakwa.

¹⁴Ne bumiicho bubwakwa mu mawa buli nga abo baulilanga burume bwa Wele ne kakhali bibiindu bikali bie mu limenya nga, liliembeelela, buiinda, ne limenya lie khukhwesangaasia babeene libakhola se baliinda lisuubila liabwe tawe.

¹⁵Ne kakhali bumiicho bubwakwa mwiloba lilayi buli nga abo baulilanga burume, babutiila lukali mu miooyo kimilayi kie buriaani, mala bekhaliilikha khukhwola nga baama kamatuunda.

¹⁶ “Se aliio omundu oambianga etaa mala akifumalikhila mu sikono namwe akira aasi we sitanda tawe, ne kakhali akira khu siteetwe nio abo babengila mukari babone buwaanga.

¹⁷ “Sikila se siliio sisiindu sisiakukhuulilwa sikhalireerwa abuwaanga tawe; namwe sisiindu si siekisa sikhalimanyikha ne khureerwa abuwaanga tawe.

¹⁸ “Nono ba meso mu ngila niyo murekeereseliamo, sikila khuyo oli nabio balimutasa bibiindi, ne kakhali oyo okhali nabio tawe, akhaba sitiiti nisio ebaasia ali, ali nasio, alinuulwa.”

¹⁹Nio maawe ne bawandaaye ba Yesu beecha niio aba ne se banyala khumwolela tawe, sikila bukali bwe babaandu.

²⁰Ne Yesu aboolelwa ali, “Maao ne bawandaayo bemile enje benya khukhubona ewe.”

²¹Yesu aabakobosia ali, “Maayi ne bawandaayase bali abo baulila elomo eya Wele ne khukitiila.”

²²Endaalo ndala Yesu acha khu liaaro ne babeeka bewe mala ababoolela ali, “Khwambukhe enyanja.” Nio barakikha lukeendo.

²³Nga baba ne balikho bambukha liilo liaamba Yesu. Ekhuungu eye kamaani yaucha khu nyanja ne liliaaro liarakikha khukhwichula kameechi nio boosi baba mu butinyu.

²⁴Babeeka bacha mala bamusiisimusia ne baloma bali, “Omwami, Omwami! Khwabuna!” Yesu asisimukha mala ayibila ekhuungu ne bibuli bie kameechi biboofu mala biasila, enyanja yayenjeela lukali.

²⁵Yesu abareeba ali, “Lisuubila lienywe lili waena?” Bauka lundi baria, mala bareebana bali, “Omundu yuno naanu niye? Ayibila akhaba ekhuungu ne bibuli bie kameechi, mala bimuria!”

²⁶Yesu ne babeeka bewe boola mu sibala sie Bakerasi, sisialoleelelana ne sia Kalilaya.

²⁷Nga Yesu arura mu liaaro, omundu ama mu lukoba owaba ne bisieeno amwakaanana khulwe siise sileeyi omundu chana oyo se efwaranga chingubo tawe. Lundi se amenyanga mungo tawe, amenyanga mu biliindwa.

²⁸Nga abona Yesu ayokela lukali, akwa ebweeni wewe mala alomaloma mu mumilo kwe angaaki ali, “Ndi na siina ne nawe, Yesu, Mwana owa Wele owe Angaaki Lukali, unjenyakho siina? Khwikoonjelela okhambukuuma tawe!”

²⁹Omundu oyo aloma ario sikila Yesu aba ayibiile sisieeno simulimo simururemo. (Sikila sisieeno esio siamulaasiaanga, akhaba babaandu ba bamuliindanga bamuboanga kiminyololo, ne bikoche, mala abikitulanga bioosi, ne sisieeno siamuyilanga mu siangalaamwe.)

³⁰Nio Yesu amureeba ali, “Lisina liowo bali naanu?” Amukobosia ali, “Lechoni,” sikila bisieeno bikali biaba biamwingilamo.

³¹Mala biamwikoonjelela akhabiyiibila biacha mwiloo likhali ne sisiakamo tawe.

³²Abwenao liabao lituuli liboofu lie chingurwe chaaya mu maayo mwe sikulu, mala bisieeno biamwikoonjelela abilekhuule bingile mu ngurwe. Mala abielesia kumunwa.

³³Nio bisieeno chana biarura mu mundu biengila mu ngurwe ne lituuli lioosi liasalamata liekha eluongwa mala liakwa mu nyanja liafwilamo.

³⁴Nga babaayi babona kakaba ne kekholekhe, belukha bacha mu lukoba ne mu birekere ne baboolela babaandu.

³⁵Mala babaandu barura bacha khulola liliaba ne likholekhe, ne boola khu Yesu mala banyoola omundu niye bisieeno biaba ne biruriremo ekhaale mu bikele bia Yesu, efwarire chingubo mala kamebaasio kewe kakoboole abweene, mala boosi barangararwa ne khuria.

³⁶Ne abo bababona liliaba ne likholekhe baboolela babaandu nga omundu oyo ne aonisiibwe.

³⁷Nio babaandu boosi be mu sibala sie Bakerasi baambwa buuri bukali po, mala basaaya Yesu arekukhe arure mu sibala siabwe. Khwako Yesu aniina mu liaaro arekukha.

³⁸Omundu chana niye bisieeno biaba ne bimururiremo ekoonjelela Yesu amue kumunwa ache naye; ne kakhali Yesu amukaania naloma ali,

³⁹“Kobola engo oboolele babaandu niko Wele akhukholeele.” Nio arekukha acha aboola mu lukoba mwosi niko Yesu amukholeele.

⁴⁰Nga Yesu ne akobola sikelekha sisiindi sie nyanja, babaandu bakali bamwakaanila, sikila boosi baba bamulindiilile.

⁴¹Ne omundu olaangwa Yairo owaba omuliindi owe sinakooki, akwa mu bikele bia Yesu, amwikoonjelela ache mungo mwewe.

⁴²Sikila aba no mukhaana omuteelwa owaba ne bukhulu bwe kimiiko embi ekhumi na kibili mala aba alikho afwa. Nga Yesu ne aba ne alikho acha, babaandu bamukhumakho buli lubeka.

⁴³Mu baandu abo abamo omukhasi owaba ne kibeeni khulwe kimiiko ekhumi na kibili, omusilikhi se abao owanyala khumuonia tawe. Arumikhira bioosi nibio aba nabio khu basilikhi ne se banyala khumuonia tawe,

⁴⁴echela enyuma wa Yesu mala aatiila khu ngubo yewe, ne ekibeeni yiima.

⁴⁵Nio Yesu areeba ali, “Naanu oundiililekho?” Buli mundu ekaana, mala Petero amuboolela ali, “Omwami, babaandu bakali bakhukhumilekho!”

⁴⁶Yesu aloma ali, “Aliio omundu oundililekho, sikila neulile kamaani kanduriremo.”

⁴⁷Nga omukhasi chana abona ali sanyala khwikisa tawe, echa ne alikho aaterema mala aakwa ebweeni wa Yesu aboola mu moni che babaandu boosi sikilile ne amutilakho lundi nga aonile abwene ne abwene.

⁴⁸Nio Yesu amuboolela ali, “Mwana wase, lisuubila liowo liakhuoniisie. Cha ne kumuleembe.”

⁴⁹Nga Yesu aaba nasilomaloma kano, omundu omurumwa khukhwama wo muliindi owe sinakooki chana ola naboolela Yairo ali, “Omukhaana wowo afwiile, okhachiililila khunaania Omwekisia tawe.”

⁵⁰Yesu nga aulila kano aboolela Yairo ali, “Okharia tawe suubila mala alaona.”

⁵¹Nga ola munju eya Yairo se afukiilila omundu yesi yesi khukhwingila ne naye munju tawe, nakhali Petero, Yoana, ne Yakobo, ne raraawe ne maawe wo mwana chana.

⁵²Mala yaba babaandu boosi balikho bamulila ne khukhwesasaara, Yesu ababoolela ali, “Mukhalila tawe, sikila se afwiile tawe ne kakhali alikho akona.”

⁵³Boosi bamuchekha sikila baba bamanyile bali omukhaana aba afwiile.

⁵⁴Nio Yesu amutiila kumukhono amulaanga ali, “Mwana wase sisimukha!”

⁵⁵Omwana chana alamukha abwene na bwene, mala Yesu aboola bamuelesie siakhulia alie.

⁵⁶Nio basaasi bewe bauka, ne kakhali Yesu arusia lilaka ali bakhaboolelakho omundu yesi yesi kakekholeekhe kano tawe.