Read lubukusu Lk. 9 Bible Online

Lk. 9 - lubukusu bible

Lk. 9

¹Yesu alanga alala babeeka ekhumi na babili, mala abaelesia kamaani, ne bunyali khurusia bisieeno bioosi ne khuonia bulwaale.

²Abaruma khukhwilwacha Bubwami bwa Wele ne khuonia balwale.

³ Ababoolela ali, “Mukhabukula sisiindu siosi siosi khulwe lukeendo lwenywe tawe: mukhabukula esiimbo, namwe elolooti eye babaandu babesabiilisia namwe siakhulia, namwe chirupia tawe, namwe mulala khwinywe akhasuta kamasiati kabili tawe.

⁴Ne munju yosi yosi niyo mwakaanilwemo menya munju mwenomwo nabwila murura mu lukoba omwo.

⁵Ne osi osi niio bakhamwakaanila tawe, nga murura mu lukoba lwenolwo, yiyeya lutamuusi lwe mu bikele bienywe bube nga buloli bubekiicha nibo.”

⁶Babeeka barekukha mala babira mu birekere bioosi ne belwacha Elomo Endayi ne khuonia babaandu buli abuundu.

⁷ Nga Herodi Omwami owe Kalilaya ne aulila koosi kakaba ne kakholekhe akoyaana, sikila balala baboola bali Yoana alamuukhe khukhwama mu bafu.

⁸Babaandi baloma bali Elicha abonekhe, ne babaandi bali mulala khu bang'oosi be khaale alamuukhe.

⁹Herodi aloma ali, “Ese nasiinja Yoana namurusiakho kumurwe, ne bibiindu nga nibio mbulila bino bili bia naanu?” Mala akhaka kamaani khubona Yesu.

¹⁰Barumwa bakobola baboolela Yesu niko baba ne bakholile. Nio ababukula mala barekukha bong'ene bacha mu lukoba lulaangwa Betesaita.

¹¹Nga babaandu bakali bamanya bamuloondakho abakaanila, alomaloma nabo ke Bubwami bwa Wele, ne khuonia abo babenya khuonisibwa.

¹²Nga enyanga ne yaba ne likho ekwa, babeeka ekhumi na babili becha khu Yesu bamuboolela bali, “Sibula babaandu bache mu birekere ne mu chingo chili siimbi ano, banyoole niio bakona ne khulia; sikila khuli mu sichiimi busa.”

¹³Ne kakhali Yesu ababoolela ali, “Enywe mwabeene baelesie siakhulia.” Bamukobosia bali, “Se khuli ne sisiindu tawe ne kakhali khuli ne kimikaati kiraano ne ching'eeni chibili, wenya khuche khukule siakhulia sie babaandu bano boosi?”

¹⁴(Babaandu be siseecha baba embi chielefu chiraano.) Yesu aboolela babeeka bewe ali, “Bekhasie aasi mu bipupu bie babaandu embi kamakhumi karaano buli silala.”

¹⁵Oli babeeka bamalile khukhola bario,

¹⁶Yesu abukula kimikaati kiraano chana ne ching'eeni chibili, alola mu ngaaki mala apa orio khu Wele. Amesulamo mala aelesia babeeka bewe khukabila bipupu.

¹⁷Ne boosi balia bekura. Babeeka babuusia bitonyi bibiarama biechula bikono ekhumi na bibili.

¹⁸Endaalo ndala Yesu nga aba ne alikho asaba yeng'ene, babeeka bewe becha niio ali mala abareeba ali, “Babaandu baloma bali ese ndi naanu?”

¹⁹ Balala bamukobosia bali, “Yoana Omubatiisi, babaandi baloma bali oli Elicha, ne babaandi bali mulala khu bang'oosi be khaale alamuukhe.”

²⁰ Ne kakhali Yesu abareeba ali, “Ne enywe muloma muli ese naanu?” Petero akobosia ali, “Ewe oli Kristo owa Wele.”

²¹Nio Yesu abakaania lukali ne khubaa lilaka ali bakhaboolelakho kano omundu yesi yesi tawe,

²²lundi ababoolela ali, “Khukhwola Omwana wo Mundu achunisibwe mu biindu bikali ne khulobwa ne babemeelesi, basaayi bakhulu, ne baandiki. Akheerwe ne khu ndaalo eya khataru arure mu bafu.”

²³ Nio aboolela boosi ali, “Omundu yesi yesi aaba ne enya khukhunonda, lekha ekaane omwene, abukule kumusalaba kwewe buli ndaalo mala anondekho.

²⁴ Sikila yesi yesi owenya khuonia bulamu bwewe alabutibia, ne yesi yesi otibia bulamu bwewe sikila ese, alabuonia.

²⁵Namwe omundu alanyoola bukhala siina ne anyoola sibala sioosi mala omwene abune?

²⁶Omundu yesi yesi aaba ne aambwa chisoni sikila ese ne kamekisio kase, akhaba Omwana wo Mundu akhamukholele niye chisoni nga aliicha mu luyali lwewe ne lwa Paapa ne lwe bamalaika batakatifu.

²⁷Ne kakhali ng'ali ese muboolela enywe ndi, baliio balala babemile ano, bakhalifwa ne bakhabona Bubwami bwa Wele tawe.”

²⁸ Embi chindaalo munaane enyuma we liboola lino, Yesu aabukula Petero ne Yoana ne Yakobo mala baniina khu sikulu khucha khusaba.

²⁹Nga ne aaba ne alikho asaba, lukoondo lwewe lwakaluukhana, ne chingubo chewe chaba chiwaanga chwe.

³⁰Siise esio babaandu babili balomaloma naye. Baba Musa ne Elicha,

³¹babonekha mu luyali ne balomaloma ne Yesu ke lifwa liewe liliaba siimbi khukhwichusia lilienya lia Wele khulwe khufwiila mu Yerusalemu.

³²Petero ne babasie baba bakona, ne nga basisimukha babona luyali lwa Yesu ne babaandu babili ba baaba ne bemile naye.

³³Ne babaandu abo nga baba ne balekhana ne Yesu, Petero aboolela Yesu ali, “Omwami, buli bulayi efwe khuba ano! Lekha khwombakhe kamaeema kataru, lilala liliowo, lilala lia Musa ne liliindi lia Elicha.” (Se amanya nisio aba ne alikho aloma tawe.)

³⁴Nga aba nasilomaloma ario lileesi liecha liabakhiinga, mala babeeka baria nga bengila mwileesi.

³⁵ Ne kumumilo kwama mwileesi ne kuloma kuli, “Yuno ali Omwana wase, niye narobora, khe mumurekeeresie!”

³⁶Nga kumumilo kwamala khulomaloma, Yesu abonekhana yeng'ene. Mala babeeka basila busa chi, se baboolelakho omundu yesi mu ndaalo echo sisiindu siosi siosi khu niko baba ne baboone tawe.

³⁷Khu ndaalo eloondakho Yesu ne babeeka bewe bataru bekha khukhwama khu sikulu, babaandu bakali bamwakaanana.

³⁸Omundu mulala khukhwama mu baandu abo aloma ali, “Omwekisia! Khwikoonjelela ololekho omwana wase sikila ali omuteelwa!

³⁹Sisieeno simuyulanga mala aayulukha, simusukiasukia mala simumika khukhwola lufuro lurura emunwa mala sichiililila khumupia sibi lundi se simulekhuulanga tawe!

⁴⁰Nikoonjeleele babeeka bowo ndi bamurusiemo sisieeno sino, ne se banyalile khukhola bario tawe.”

⁴¹Yesu abakobosia ali, “Enywe muli babaandu be selukho ekhasuubila tawe lundi embi! Ese menye nanywe khukhwola liina? Ese nikhale nanywe buleeyi siina?” Nio aboolela omundu chana ali, “Reera ano omwana wowo.”

⁴²Nga omwana chana aaba ne alikho echa niio Yesu ali, sisieeno chana siamupa aasi, mala siamukoka. Yesu ayiibila sisieeno esio mala aonia omwana oyo ne khumwakaanisia raraawe.

⁴³Babaandu boosi bauka sikila bunyali bwa Wele. Ne nga babaandu boosi ne baba ne basiuka buli sisiindu nisio Yesu aba nakholile, Yesu aboolela babeeka bewe ali,

⁴⁴“Mukhebilila niko nja khumuboolela kano tawe! Sikila Omwana wo Mundu alikho acha khuaanwa mu bunyali bwe babaandu.”

⁴⁵Ne kakhali babeeka se bamanya sifuno sie likhuwa lino tawe. Liaba liakukhuulilwa khukhwama khu nibo nio balekhe khulimanyilisia tawe, mala baria khumureeba sifuno sie likhuwa lino.

⁴⁶ Liyingana liarakikha mu beeka bali naanu khu nibo ooli omukali khukhila boosi.

⁴⁷Yesu aba amanyile kamebaasio ke kimiooyo kiabwe nio abukula omwana amwimekha alubeka lwewe,

⁴⁸ mala ababoolela ali, “Yesi yesi owakaanila omwana yuno mu lisina liase, aba anjakaanile ese, ne yesi yesi ounjakaanila ese aba akaaniile oyo owanduma ese, sikila oyo oli omukeekhe lukali mwinywe mweesi niye ooli omukali khukhila boosi.”

⁴⁹Yoana akobosia ali, “Omwami, khuboone omundu alikho arusia bisieeno mu lisina liowo mala khwamukaania sikila se ali mulala khwifwe tawe.”

⁵⁰Ne kakhali Yesu aloma ali, “Mukhakhakakho khumukaania tawe, sikila yesi yesi okhamwenyela enywe kamabi tawe, aba ali lubeka lwenywe.”

⁵¹Siise sia Yesu khuyilwa mwikulu ne siembiya, akhalaka khucha e Yerusalemu.

⁵²Nio aruma barumwa bewe barangire, bache mala bengila mu sirekere sie Basamaria khumurekekhera buli sisiindu.

⁵³Ne kakhali babaandu be bweneyo se bamwakaanila tawe sikila bamanya busa bali aba khu lukeendo lwewe khucha e Yerusalemu.

⁵⁴ Nga babeeka bewe Yakobo ne Yoana babona liliene lio, baloma bali, “Omwami wenya khulange kumulilo kwame mwikulu kwiche kubabunie!”

⁵⁵Yesu ekhebukha enyuma mala abarafwira.[1]

⁵⁶Ne niye ne babeeka bewe bachiililila bola mu sirekere sisiindi.

⁵⁷Nga baba khu ngila ne balikho bacha, omundu aboolela Yesu ali, “Ndakhuloondakho buli niio ocha.”

⁵⁸Nio Yesu amuboolela ali, “Chinjusi chili ne kamaloo, ne chinyuni chili ne biswi, ne Omwana wo Mundu se ali na osi osi niio ara kumurwe aola tawe.”

⁵⁹Lundi aboolela okundi ali, “Nondekho.” Ne kakhali oyo amukobosia ali, “Omwami, lekha nyoe nje siikhe paapa nio.”

⁶⁰Nio Yesu amukobosia ali, “Lekha bafu basiikhe bafu babwe. Ne ewe khoche wilwache Bubwami bwa Wele.”

⁶¹Omundu okundi aloma ali, “Omwami ndakhuloondakho, ne kakhali lekha nyoe nje kheesie bengo nio.”

⁶²Yesu amukobosia ali, omundu yesi yesi orakikha khulima mala ekhebukhaka enyuma se olaana khukhwingila mu Bwami bwa Wele tawe.