Read lubukusu Likh. 1 Bible Online

Likh. 1 - lubukusu bible

Likh. 1

¹Kano niko kamakhuwa niko Musa aboolela babaandu ba Isiraeli boosi nga ne baba mu sichiimi ebukwe we luluuchi lwa Yoritani. Baba mu Litooma lia Yoritani siimbi Sufu akari we lukoba lwa Parani lubeka lulala, ne chingoba cha Tofeli, ne Labani, ne Haseroti ne Tisahabu lubeka luluundi.

²Luli lukeendo lwe chindaalo ekhumi na ndala, khukeenda khukhwama khu sikulu sia Sinai khukhwola Kadeshi-barinea khubirira khu ngila eye sibala sie bikulu sia Edomu.

³Khu ndaalo eye khunyoa eye kumwesi kwe khumi na mulala kwe kumwiiko kukhola kamakhumi kane khukhwama nga Baisiraeli ne barura mu Misiri, Musa aboolela babaandu kamalaka koosi niko Wele Omunyali Owa Bioosi amuelesia khubaboolela.

⁴ Lino liekholekha enyuma wa Wele Omunyali Owa Bioosi khuula Omwami Sihoni owe Baamori owamiianga lukoba lwa Heshiboni, ne Omwami Oku owe Bashani, owamiia mu ngoba cha Asitaroti ne Etrei.

⁵Musa arakikha khukhwinooselia babaandu kamalaka kano ne bolile mu maloba ka Moabu, ebukwe we luluuchi lwa Yoritani. Musa aloma ali,

⁶“Nga ne mwabeele a sikulu sia Sinai Wele Omunyali Owa Bioosi Wele wefwe akhuboolela efwe ali, ‘Mwamenyile siise sileeyi a sikulu ano mwanyalile murio.

⁷Kobolayo mala muchiililile ne lukeendo. Cha mu sibala sie bikulu sie Baamori nende be bibala biili siimbi bioosi bali mu litooma lia Yoritani. Cha mwole mu sibala sie bikulu ne sie mumaayo, mwole mu ngoongo che bunafubo nende sia nyanja eya Mediterenia. Cha mu sibala sia Kanaani engelekha we bikulu bia Lebanoni khukhwola khu luuchi luboofu lwa Efurati.

⁸Lola namuele enywe kamaloba kano. Yingilamo mala mubukule kamaloba niko Wele Omunyali Owa Bioosi echuba khua bakuuka benywe Aburahamu, Isaaka ne Yakobo. Alaka khubaelesia nibo ne lisaaye liabwe enyuma wabwe.’ ”

⁹Musa aboolela babaandu ali, “Siise esio, namuboolela ndi, ‘Kimilimo kie khumurangirira enywe kili kimikali lukali khwise. Ese senyala nakikhola seng'ene tawe.

¹⁰Wele Omunyali Owa Bioosi, Wele wenywe amukholile muli bakali nga ching'enieesi.

¹¹Lekha Wele Omunyali Owa Bioosi, Wele owe bakuuka benywe, amukhole mutasiikhe mube chielefu khukhilakhoo mala amubiite chikhabi nga ne amulaka.

¹²Ese seng'ene se nyala busiro bwenywe, butinyu ne bulomani tawe.

¹³Robora babaandu bakesi, be limanya lundi babakholakho kimilimo kino khukhwama buli mu kholo mala ese ndabakhola babe babemeelesi benywe.’

¹⁴Ne enywe mwafukiilila muli nilio naloma liaba lilayi khukhola.

¹⁵Nio ese nabukula babaandu bakesi lundi bakholile kimilimo bamanya nibo enywe mwarobora khukhwama mu kholo chenywe mala ese nabara mu bwimeelesi khwinywe. Balala baba babemeelesi be babaandu eelefu ndala, babaandi be babaandu emia, babaandi be babaandu kamakhumi karaano ne babaandi be babaandu ekhumi.

¹⁶“Ne siise esio naboolela bakhalaki benywe ndi, ‘Rekeeresia kamalilo ke babaandu mala mukhole bukhalaki bubwenyekha akari we Baisiraeli babili namwe akari wo Omuisiraeli ne omukwa.

¹⁷Khola kakenyekha mu bukhalaki bwenywe. Khalakila be asi nende be bunyali nga kenyekha. Mukharia omundu yesi yesi tawe, sikila bukhalaki nibwo mukhola buli bwa Wele. Reera kimisaango kimiaandalafu khwise ne ese ndakhalaka.’

¹⁸Siise esio ese namulaka koosi niko mukhoyela khukhola.

¹⁹“Khwakhola niko Wele Omunyali Owa Bioosi Wele wefwe akhulaka. Khwarura a sikulu sia Sinai mala khwabira mu sichiimi sibalaayi esio sioosi, lundi siriisia. Khwabirira mu sibala sie bikulu sie Baamori. Nga ne khwola Kadeshi-barinea,

²⁰namuboolela enywe ndi, ‘Mwolile mu sibala sie bikulu sie Baamori nisio Wele Omunyali Owa Bioosi Wele wefwe alikho akhuelesia efwe.

²¹Lola Wele Omunyali Owa Bioosi Wele wefwe areere sibala sino ebweeni wenywe. Cha musibukule sibe sisienywe, nga Wele Omunyali Owa Bioosi we bakuuka benywe ne amulaka. Mukharia, namwe mwarangararwa tawe!’

²²“Nenywe mweesi mwanjichakho mala mwaloma muli, ‘Lekha khurume babaandu ebweeni wefwe bache bayoote sibala nio bakhuboolele engila endayi khukhila choosi niyo khubirirakho ne chingoba nicho khukhoyeele khuchemo.’

²³“Enganakani eyo yaba endayi. Nono narobora babaandu ekhumi na babili, mulala khukhwama mu buli kholo.

²⁴Bacha mu sibala sie bikulu khukhwola khu Litooma lia Eshikoli mala basiyoota.

²⁵Khukobola bakhureerera efwe malala khu matuunda niko banyoolayo. Bakhuboolela bali kamaloba niko Wele Omunyali Owa Bioosi Wele wefwe alikho akhuelesia efwe kali kamalayi.

²⁶ “Kakhaba kario, enywe se mwacha tawe. Mwaba ne sileka khu malaka ka Wele Omunyali Owa Bioosi, Wele wenywe mala mweulung'unyila mu maeema kenywe.

²⁷Mwaloma muli, ‘Wele Omunyali Owa Bioosi akhubiila efwe. Elio nilio liliakila akhurusia mu sibala sie e Misiri akhure mu bunyali bwe Baamori mala bakhubunie.

²⁸Khulikho khucha waena? Balebe befwe nibo khwaruma bakhukholile khwariire. Bakhuboolele bali, Babaandu abo bali bakali lundi baleeyi khu khukhila efwe. Chingoba chabwe chili chimboofu, che kamasiisi kakoola mwikulu. Khutasa khwako khuboone babaandu baboofu lundi be kamaani ebweeneyo.’

²⁹“Nese namuboolela ndi, ‘Mukharia babaandu abo tawe.

³⁰Wele Omunyali Owa Bioosi, Wele wenywe alamurangirira mala omwene alamupanila. Kalaba bulayi bwene nga akhola e Misiri ne muloleleele.

³¹ Ne mwabone mu sichiimi nga ne amureerire mu muleembe khu lukeendo, oli paapa ne ameema omwana wewe. Aakholile ario khu lukeendo lwenywe lwoosi khukhwola abuundu ano.’

³² Ne kakhaba kario, se mweyikina Wele Omunyali Owa Bioosi, Wele wenywe tawe.

³³Wele Omunyali Owa Bioosi buli lwosi amurangiriranga ebweeni, khumuyiimila abuundu niio mukhola ekambi ne khumwekesia enywe engila. Arangiranga ebweeni wenywe mu silo mu mulilo ne kumuusi amurangirira mu lileesi.

³⁴ “Wele Omunyali Owa Bioosi aulila khukhwelung'unya khwenywe mala aambwa lirima. Ne echuba ne aloma ali,

³⁵‘Se aliio omundu khu baandu be selukho emayaanu yino okhabone kamaloba kamalayi niko nasuubisia bakuka benywe tawe.

³⁶Kalebu okhwa Yefune yeng'ene niye olikabona. Ne ndielesia niye ne lisaaye liewe sibala nisio aalambula sino. Ndikhola ndio sikila Kalebu anondile ne kumwoyo kwoosi.’

³⁷Wele Omunyali Owa Bioosi ambambila sesi lirima sikila enywe. Aloma ali, ‘Akhaba ewe wesi Musa se olingila mu sibala esio tawe.

³⁸Ne akhali Yoshua okhwa Nuni omuyeeti wowo niye olingilamo. Nono muremo kumwoyo sikila alirangirira Isiraeli khubukula sibala esio.

³⁹Khutasa khwako, babaana benywe basiili batoro nibo mwaloma muli balikwa mu mireko, bakhamanyile bubi ne bulayi tawe, balingila mu sibala esio. Ndibaelesia sibala esio mala balisibukula sibe sisiabwe.

⁴⁰Nenywe kobolayo muche mu sichiimi lubeka lwe sia nyanja eya Shamu.’

⁴¹“Mwangobosia muli, ‘Khwakholile bubwoni khu Wele Omunyali Owa Bioosi. Khulacha mala khupane nga Wele Omunyali Owa Bioosi ne akhulaka.’ Nono buli mulala khwinywe erekekha ne bulwaani bwewe khulwe liie. Mwebaasia muli liaba liliangu khukhwingila mu sibala sie bikulu.

⁴²“Ne Wele Omunyali Owa Bioosi amboolela ali, ‘Baboolele oli mukhacha mwebwaakala namwe mwapana tawe sikila ese sendi ne nanywe tawe. Basiku benywe balamubunia enywe.’

⁴³Nono ese namuboolela enywe ne se mwarekeeresia tawe. Ne kakhali, mwalekelesia lilaka lia Wele Omunyali Owa Bioosi. Mwaba ne lilielola mala mwacha mu sibala sie bikulu.

⁴⁴Nio Baamori ba bamenyanga mu sibala sie bikulu esio barura khukhupana ne nanywe. Bamutimania oli enjukhi ne mutimania mala banuula khukhwama Edomu khukhwola e Horima.

⁴⁵Ne enywe mwakobola mala mwalilila Wele Omunyali Owa Bioosi ne se aaulila namwe arekeeresia kakenywe tawe.

⁴⁶Nono mwarama e Kadeshi khulwe siise sileeyi nisio mwamenyayo.