Read lubukusu Likh. 10 Bible Online

Likh. 10 - lubukusu bible

Likh. 10

¹“Wele Omunyali Owa Bioosi amboolela ali, ‘Becha bipao bibili bie kamabaale nga bie khunyoa. Lundi khola lisanduku khukhwama khu murongooro mala oniine wiche khu sikulu niio ndi.

²Ndaandika khu mabaale ako kamakhuwa kakaba khu mabaale ke khunyoa niko ewe waara. Ne ewe ocha khura kamabaale ako mu lisaanduku.’

³“Nio nang'oona lisanduku lie kumurongooro kumunyaali, mala nabukula kamabaale kabili kafwaana nga ke khunyoa mala nakabukula nakayila khu sikulu.

⁴Ne Wele Omunyali Owa Bioosi aandika khu mabaale ako nga aakhola ekhunyoa. Akaandikakho kamalaka likhumi niko aamuboolela enywe a sikulu khukhwama mu mulilo khu ndaalo niyo mwaba ne mwibusiisie. Ne Wele Omunyali Owa Bioosi ambelesia ese kamabaale ako.

⁵Nio nayuukha nekha khukhwama khu sikulu. Ese nara kamabaale ako mu lisanduku nilio naba ne ng'oonile. Kamabaale kali ano nga Wele Omunyali Owa Bioosi ne andaka.”

⁶ (Baisiraeli bakeenda khukhwama Beeroti Bene-yakaani khukhwola Mosera. Aruni aafwiila ebweeneyo mala aasiikhwayo, Omwana wewe Eliesa aabukula bubweyaangu bwewe nga omusaayi.

⁷Baama ebweeneyo bacha Kutikota mala bachiililila boola Yotibata, abuundu alayi e kameechi.

⁸ Biise ebio,[8] Wele Omunyali Owa Bioosi arobora ekholo eya Lawi khusuta Lisanduku lie ndakaano eya Wele Omunyali Owa Bioosi. Benyekha khukholela Wele Omunyali Owa Bioosi ne khufumia lisina liewe khukhwola luno.

⁹Khwako Balawi se bali ne sitonyi siosi siosi namwe kumukabwa alala ne bawandaayabwe tawe. Wele Omunyali Owa Bioosi ali kumukabwa kwabwe nga Wele Omunyali Owa Bioosi, Wele wenywe ne aaloma.)

¹⁰ “Ese namenya khu sikulu khu ndaalo kamakhumi kane, nga ekhunyoa. Lundi akhaba siise esio, Wele Omunyali Owa Bioosi andekeeresia mala aalekha khumubunia enywe.

¹¹Amboolela ali, ‘Cha oraangirire babaandu khu lukeendo, mala bengile mu sibala nisio nasuubisia bakuuka babwe.’

¹²“Nono, Baisiraeli, Wele Omunyali Owa Bioosi, Wele wenywe eenya mu murie, muloonde kakewe mala mu musiime ne khumukholela niye ne kumwoyo kwenywe kwoosi.

¹³Lundi Wele Omunyali Owa Bioosi eenya murie kamalaka kewe koosi niko ndikho muelesia enywe luno khulwe bulayi bwenywe.

¹⁴Akhaba likulu liili angaaki lukali lili lia Wele Omunyali Owa Bioosi, akhaba liloba lili liliewe, alala nende buli siindu silikho.

¹⁵Ne kakhaba kario Wele Omunyali Owa Bioosi asiima bakuuka benywe lukali mala arobora lisaaye liabwe, enywe mu kholo choosi nga muli luno.

¹⁶Khwako, khebwa kimiooyo kienywe mala mukhaba sitanya murwe lundi tawe.

¹⁷ Wele Omunyali Owa Bioosi, Wele wenywe ali Wele owe bawele lundi Omwami owe babaami. Ali owe kamaani, owe bunyali. Ali lundi oriisia. Se ababilanga lundi safukiililanga asoya tawe.

¹⁸Akhalakanga bung'ali bwe bafuubi nende bwe banamulekhwa. Asiima baakwa, lundi abaelesianga siakhulia ne chingubo.

¹⁹Khwako siima baakwa, sikila enywe mwaba baakwa mu Misiri.

²⁰Ria Wele Omunyali Owa Bioosi, Wele wenywe mala mu mukholele ne khumusaaya niye yeng'ene.

²¹Mufumie niye. Ali Wele wenywe owamukholela enywe bibiindu biboofu lundi bie khuukia nibio muboone bino.

²² Bakuuka benywe ba bacha e Misiri baba kamakhumi saba bong'ene. Ne luno Wele Omunyali Owa Bioosi, Wele wenywe aamukholile mwabeele bakali nga ching'enieesi.