Read lubukusu Likh. 11 Bible Online

Likh. 11 - lubukusu bible

Likh. 11

¹“Khwako siima Wele Omunyali Owa Bioosi, Wele wenywe mala murie kamalaka kewe koosi buli lwosi.

²Khebulila siiukuumo sia Wele Omunyali Owa Bioosi, Wele wenywe luno. Khebulila bukali bwewe kamaani kewe ne bunyali bwewe. Ese se ndikho mboolela babaana benywe bakhamanyile namwe bakhaboone tawe.

³ Khebulila kamayia kewe ne bikholwa nibio akholela Farao omwami owe Misiri ne khu sibala siewe sioosi.

⁴ Khebulila niko Wele Omunyali Owa Bioosi akholela banamae ba Misiri, alala ne chifarasi chabwe, ne kamakaari kabwe khulwe khubamwaata mu nyanja eya Shamu, nga baba ne balikho bamutimania enywe.

⁵Khebulila niko Wele Omunyali Owa Bioosi aamukholela enywe mu sichiimi khukhwola nga mwola ano.

⁶ Khebulila niko akholela Tatani ne Abiramu ba okhwa Eliabu owe kholo eya Rubeni. Lundi khebulila nga liloba liapa lulwafwa, liekukha mala liabamila alala nende be chinju chabwe, kamaeema kabwe, ne bakholi babwe boosi, ne bibiaayo biabwe Baisiraeli ne baloleleele.

⁷Enywe mwabene mwaboone bibiindu biboofu bioosi nibio Wele Omunyali Owa Bioosi aakhola.

⁸“Khwako, ria kamalaka koosi niko ndikho muelesia endaalo yino. Khola murio nio munyoole kamaani mwingisie ne khubukula sibala nisio mulikho mucha khubukula.

⁹Lundi khola murio nio mumenye siise sileeyi mu sibala nisio kamabeele ne bubuukhi biseleetekhanga nisio nasuubisia khuelesia bakuuka benywe ne lisaaye liabwe.

¹⁰Sibala nisio muli siimbi khukhwingisia, se sili nga sibala sia Misiri niio mwamile tawe. Ebweeneyo, mwamiichanga, ne khuchukhiilila kimikuunda oli ne muchukhiilila siluundu sie chinyenyi.

¹¹Ne kakhali sibala nisio muli siimbi khukhwingilamo sili sie bikulu ne kamatooma, sibala nisio efula ekwichangamo.

¹²Sili sibala nisio Wele Omunyali Owa Bioosi, Wele wenywe aliindanga ne khusiloleelesia mu mwiiko kwoosi.

¹³ “Ria kamalaka niko ndikho muelesia enywe endaalo yino. Siima Wele Omunyali Owa Bioosi, Wele wenywe mala mu mukholele ne kimiooyo kienywe kioosi.

¹⁴Mwaba ne mukhola murio, Wele Omunyali Owa Bioosi alaruma efula ekwe khu sibala sienywe mu siise sisienyekha, mu munaane ne mwikesa. Nio mufune biakhulia bienywe ne endali ne kamafura ke chiseituni.

¹⁵Lundi akhamuelesie bunyaasi khulwe chikhaafu chenywe. Muliba ne biakhulia bioosi nibio mwenya.

¹⁶Ba barekerefu mu khakhola murio mwebea mala mwayuukha mwakholela bawele babaandi ne khubasaaya tawe.

¹⁷Mwaba ne mukhola murio, Wele Omunyali Owa Bioosi alimuambila enywe lirima. Alitiila efula ekhakwa tawe, mala kamaloba kenywe kalioma para. Bibiaamo se bilachoa tawe. Ne, siakhaba ne sili sibala silayi, nisio alikho amuelesia, enywe mulibuna khangu mururemo.

¹⁸ “Khebulila kamakhuwa kano mu miooyo kienywe ne mu mukaboe khu makhono kenywe nga simanyisio lundi mukafware mu bweeni bwenywe.

¹⁹Keyikie babaana benywe. Kakachulekho ne mwikhaale munju mwowo, ne olikho okeenda khu ngila, ne olikho okona, lundi ne winyokha.

²⁰Kaandike khu mitalaachi kie chinjiki che chinju chenywe ne khu bilibwa bienywe.

²¹Khola murio nio enywe ne babaana benywe mumenye siise sileeyi mu sibala nisio Wele Omunyali Owa Bioosi, Wele wenywe aasuubisia khuelesia bakuuka benywe. Mulamenyayo mindali na mindali.

²²“Ba barekerefu khuria kamalaka koosi niko ndikho muelesia: khu siima Wele Omunyali Owa Bioosi, Wele wenywe, khuloonda kakewe ne khuuba basuubilwa khu niye.

²³Mwakhola murio, Wele Omunyali Owa Bioosi akhatimanie chikholo chino choosi. Lundi aba enywe mukhamenye mu sibala sie chikholo chiili chimboofu lundi che kamaani khumukhila enywe.

²⁴ Kamaloba koosi niko mulakhandakakho kalaba kakenywe. Lulwakha lwe sibala sienywe lulaba khukhwama khu sichiimi lubeka lwe ebunafubo khukhwola khu sikulu sia Lebanoni lubeka lwe ebunaswa. Lundi khukhwama khu luuchi lwa Efurati ebukwe, khukhwola khu nyanja eya Mediterenia mumbo.

²⁵Osi osi niio mulacha mu sibala esio Wele Omunyali Owa Bioosi, Wele wenywe alakhola babaandu bamwo bamurie enywe nga ne amusuubisia enywe. Se alibao omundu yesi yesi olimukhiingilila enywe tawe.

²⁶“Endaalo yino ese ndikho muelesia enywe burobosi akari we khabi ne silaamo.

²⁷Mulanyoola ekhabi, mwaba ne muria kamalaka ka Wele Omunyali Owa Bioosi, Wele wenywe niko ndikho muelesia endaalo yino.

²⁸Ne mulanyoola silaamo, mwaba barengu khu malaka kano mala mukaluukhane mulekhe kamalaka niko ndikho muelesia luno lundi mwaba ne musaaya bawele babaandi nibo mukhamanyile tawe.

²⁹ Nga Wele ne amuyila mu sibala nisio mulikho mucha khwingisia, mukhalaangilile ekhabi ne muli khu sikulu sia Kerisimu, ne mukhalaangilile silaamo ne muli khu sikulu sia Ebali.

³⁰Bikulu bibili bino bili lubeka lwe mumbo mwe Luluuchi lwa Yoritani mu sibala sie Bakanaani bamenyile mu Litooma lia Yoritani. Bialoleelela lubeka lwe mumbo, siimbi ne kumurongooro kumukhoonge kwa More siimbi ne Kilikali.

³¹Enywe muli siimbi khukhwambukha Luluuchi lwa Yoritani mala mwingisie sibala nisio Wele Omunyali Owa Bioosi, Wele wenywe alikho amuelesia. Ne musinyoola mala mwombakhe mumenyemo,

³²mube barekerefu khuria kamalaka koosi niko ndikho muelesia enywe endaalo yino.