Read lubukusu Likh. 12 Bible Online

Likh. 12 - lubukusu bible

Likh. 12

¹“Kano kali kamalaka niko mukhoyela khuria ne mumenya mu sibala nisio Wele Omunyali Owa Bioosi, Wele owe bakuuka benywe alikho amuelesia enywe mu menyemo. Karie biise bioosi nibio mumenya mu sibala.

²Mukhoya mwonakake abuundu oosi niio beele babaandu be chikholo nibo mubukula bumenyo bwabwe basaayilanga bawele babwe. Basaayilanga khu bikulu bileeyi, ne khu bikulu bitiiti, nende asi we kimirongooro.

³ Techula chialutare chabwe ne khuumbulaka chinjeko chabwe. Yosia bifwaani bia wele wabwe Asiera. Lundi kwisia bifwaani bie bawele babwe bikwe nio bakhasaayila abuundu ao lundi tawe.

⁴“Mukhasaaya Wele Omunyali Owa Bioosi, Wele wenywe mu ngila niyo babaandu bano basaayilangamo bawele babwe tawe.

⁵Ne kakhali eenja abuundu niio Wele Omunyali Owa Bioosi, Wele wenywe alamuroborera khukhwama mu kholo chenywe choosi khulwe khusaaya ne khumufumia. Mulacha abwenao

⁶mala muyileo biianwa bienywe bie khukhwosia ne chimbosio chenywe. Mukhayileo biaanwa bie sitonyi silala khwikhumi ne biianwa bienywe bie khukhwechuba khu Wele Omunyali Owa Bioosi, biianwa bie mu lienya lienywe, ne chikhaafu chenywe chimbele ne kamakheese.

⁷Ebweeneyo enywe nende be chinju chenywe mukhayile ebweeni wa Wele Omunyali Owa Bioosi ne khukhwikhoyela nibio mwakhola lundi nibio Wele Omunyali Owa Bioosi, Wele wenywe aamuelesia.

⁸“Mukhakhola mu ngila niyo khulikho khukholelamo biise bino tawe. Biise bino buli mulala alikho akhola niko abona ali kali kamalayi khu niye.

⁹Mulakholanga murio sikila mukhanyoola buuluukhi ne khukhwingila mu sibala nisio Wele Omunyali Owa Bioosi amueleesie enywe tawe.

¹⁰Mulambukha Luluuchi lwa Yoritani, mala Wele Omunyali Owa Bioosi amulekhuule enywe mwingisie sibala esio, nisio omwene amuelesie, lundi mumenyeyo. Alamuliinda khukhwama khu basiku benywe mala mulamenya mu muleembe.

¹¹Wele Omunyali Owa Bioosi ne amalile khukhola ario alarobora abuundu alala ong'ene ekhusaayalao. Abwenao, mureerere buli siindu nisio ese mulaka: biianwa bie khukhwosia bienywe ne chimbosio, biaanwa bie sitonyi silala khwikhumi, biianwa bienywe bibiindi ne biianwa nibio mwasuubisia khuaana khu Wele Omunyali Owa Bioosi.

¹²Mukhoya mwikhoye ebweeni wa Wele Omunyali Owa Bioosi, Wele wenywe alala ne babaana benywe basoleeli nende bakhaana, banasioobi benywe be siseecha nende be siikhasi, ne Balawi bamenyile mu ngoba chenywe, sikila Balawi se bali ne kumukabwa namwe sitonyi nga enywe tawe.

¹³Ba barekerefu nio mukhaanila biianwa bienywe bie khukhwosia buli abuundu niio mubona tawe.

¹⁴Ne kakhali khe mu biaanile abuundu niio Wele Omunyali Owa Bioosi alarobora mu sibala sie kholo ndala khu kholo chenywe. Abwenao niio enywe mukhaanile biianwa bienywe bie khukhwosibwa ne khukhola bibiindu bioosi nibio ese mulaka.

¹⁵“Kakhaba kario, muli balekhuule khukhoonya bibiaayo ne khuliila abuundu osi osi niio mumenyile. Munyala mwalia bikali nga, Wele Omunyali Owa Bioosi, Wele wenywe ne amuelesianga, aakhaba ooli omukwalaafu namwe omunyaalu khuloondekhana ne kumwiima anyala abilia busa nga oolia enyama eya kicheu namwe eye ekhisi.

¹⁶ Ne kakhali mukhalia kamalasile kacho tawe, mukachukhe mu liloba nga kameechi.

¹⁷Mukhaliila sitonyi silala khwikhumi sienywe abuundu niio mwamenya tawe, siakhaba ne sili sitonyi silala khwikhumi sie biakhulia bienywe, endali yenywe, namwe kamafura namwe chikhaafu chenywe chimbele ne kamakheese kamabele, biianwa nibio mwasuubisia khuaana khu Wele Omunyali Owa Bioosi, biianwa bie mu lienya lienywe namwe biianwa bienywe bibiindi bioosi bioosi tawe.

¹⁸Enywe ne babaana benywe alala ne banasioobi benywe ne Balawi bamenyile mungoba chenywe, mulalila biianwa bino ebweeni wa Wele Omunyali Owa Bioosi, Wele wenywe. Wele Omunyali Owa Bioosi omwene alarobora abuundu alala ekhusaayilao. Mukhoya mwikhoye ebweeni wa Wele Omunyali Owa Bioosi, Wele wenywe mu koosi niko mukhola.

¹⁹Ba barekerefu, mukhalekelesia Balawi nga mulamenya mu sibala sienywe tawe.

²⁰“Nga Wele Omunyali Owa Bioosi, Wele wenywe ne aabalaaya sibala sienywe, nga ne aamusuubisia, munyala mwalia enyama niyo mwenya khulia.

²¹Aaba abuundu niio Wele Omunyali Owa Bioosi, Wele wenywe arobora ekhusaaya nali aleeyi lukali, munyala mwakhonya yosi yosi khu khaafu namwe likheese nilio Wele Omunyali Owa Bioosi amuelesia, nga aamulaka. Ne munyala mwaliila enyama eyo mungo, nga ne mwenya.

²²Omundu yesi yesi ooli omukwalaafu namwe omunyaalu anyala alia enyama eyo, bulayi bwene nga ne alia enyama eya kicheu namwe eye ekhisi.

²³ Ne kakhali ba nang'ali muli se mulia enyama kamalasile ne kasiilimo tawe, sikila bulamu buli mu malasile, ne se munyala mwalia bulamu ne enyama tawe.

²⁴Mukhalia kamalasile tawe, ne kakhali mukachukhe khu liloba nga kameechi.

²⁵Mwaba ne muria lilaka lino, Wele Omunyali Owa Bioosi alasiimisibwa mala enywe ne lisaaye lienywe mulaba bulayi.

²⁶Yila bibiindu bienywe bitakatifu, ne biianwa bienywe nibio mwasuubisia khuaana khu Wele Omunyali Owa Bioosi abuundu niio alarobora.

²⁷Aanila abuundu ao biianwa bie khukhwosia, enyama ne kamalasile. Biianwa khu alutare eya Wele Omunyali Owa Bioosi, Wele wenywe. Chukha kamalasile khu alutare. Ne kakhali munyala mwalia enyama.

²⁸Ba barekerefu mu khuulila kamakhuwa niko ndikho mulaka kano koosi. Khola murio nio enywe ne lisaaye lienywe mube bulayi khulwa mindali, sikila mulaba mulikho mukhola kamalayi lundi kamaluungi ebweeni wa Wele Omunyali Owa Bioosi, Wele wenywe.

²⁹“Wele Omunyali Owa Bioosi, Wele wenywe acha khubunia babaandu be chikholo nibo mucha khubukula ne khukhwingisia kamaloba kabwe. Ne amalile khukhola ario,

³⁰ba barekerefu mukhakhola murio mwarekwa mu khuloonda kimiima kie chikholo echo tawe. Mukhaenja khumanya nga basaayanga bawele babwe nio mwesi musikame ne khusaaya mu ngila ng'eneyo tawe.

³¹Mukhasaaya Wele Omunyali Owa Bioosi, Wele wenywe mu ngila niyo nibo basaayilangamo tawe. Nibo bakholelanga bawele babwe buli siindu siili sie lisinye khu Wele Omunyali Owa Bioosi lundi nisio niye abiila. Akhaba, baananga babaana babwe basoleeli ne bakhaana nga biianwa bie khukhwosia khu alutare chabwe.

³² “Mukhole buli siindu nisio ese mulaka enywe, mukhatasakho sisiindu siosi siosi tawe, namwe murusiekho sisiindu siosi siosi tawe.”