Read lubukusu Likh. 13 Bible Online

Likh. 13 - lubukusu bible

Likh. 13

¹“Omung'oosi namwe omundu obonela bibiindu mu marooro ne enyokha mwinywe mala amuelesie simanyilo namwe ke liukia,

²ne simanyilo sienesio namwe ke khuukia menako keche kekholekhe, mala amuboleele ali, ‘Lekha khuche khusaaye ne khurumikhira bawele babaandi,’

³mukhacha tawe. Wele Omunyali Owa Bioosi, Wele wenywe alikho amurumikhira niye khu mukhaka enywe abone mwaba ne mwasiima Wele Omunyali Owa Bioosi, Wele wenywe ne kumwoyo kwenywe kwoosi.

⁴Loonda Wele Omunyali Owa Bioosi, Wele wenywe, mala mumurie. Murie kamalaka kewe, mumusikamile nende mumusaaya niye yeng'ene mala mube basuubilifu khu niye.

⁵Ne kakhali khe mwire omundu obuula kamarooro oyo namwe omung'oosi oyo sikila amuboolela enywe mube barengu khu Wele Omunyali Owa Bioosi, Wele wenywe, owamureesia mwarura e Misiri, niio mwaba banasioobi. Wele Omunyali Owa Bioosi akhola ario sikila enya enywe mumenye nga niye ne aamulaka. Nono rusia bumayaanu akari wenywe.

⁶“Wandaayo namwe omwana wowo omusoleeli, namwe omwana wowo omukhaana, namwe omukhasi wowo niye wasiima, namwe omusaale niye wasiima lukali anyala akhuchuuba mu simoonyo ali, ‘Khukholele bawele babaandi.’ Bawele abo bali nibo ewe namwe bakuuka benywe bakhasaayanga tawe.

⁷Balala khu bawele be babaandu abo banyala baaba siimbi nanywe namwe aleeyi. Bali khukhwama lubeka lulala lwe sibala khukhwola khu luundi.

⁸Ne okhafukiilila niko omundu oyo aloma tawe, okhamurekeeresiakho tawe. Okhamukholelakho siisa tawe, lundi okhamubabila tawe.

⁹Mwire! Ba owe khunyoa khumupa libaale, mala olekhele buli mundu amupe libaale.

¹⁰Mupe kamabaale afwe! Sikila akhaka khu khutiimia orure khu Wele Omunyali Owa Bioosi, Wele wowo owa khurusia e Misiri, niio mwaba banasioobi.

¹¹Nono babaandu ba Isiraeli boosi bakhaulile mala barie ne omundu okhakhole lundi sisiindu siibi sirio se alibaao tawe.

¹²“Wele Omunyali Owa Bioosi, Wele wenywe alamuelesia enywe chingoba mumenyemo. Enyuma wako, mulaulila

¹³muli babaandu balala be sipoli bengiile mwinywe mala barenguisie babeene lukoba khulwe khubaboolela nibo basaaye bawele nibo abeele enywe mukhamanyile tawe.

¹⁴Kaaba ne kali ng'ali mbo sisiindu siibi sino siakholekha, reeba, muloleelesie mu burekeerefu.

¹⁵Khe mwire babaandu boosi be mu lukoba omwo, alala ne chikhaafu chabwe choosi. Bunisilia elala lukoba olwo.

¹⁶Buusia kimiaandu kioosi kie babaandu babamenyamo, mala mukibungikhe mu sikuuri sie mu lukoba. Yosia lukoba ne bibiindu bilimo bioosi nga siianwa sie khukhwosia simuufu khu Wele Omunyali Owa Bioosi, Wele wenywe. Lukoba olwo lulaba situumi khulwa mindali na mindali ne se lukhombakhwe lundi tawe.

¹⁷Mukhabukulakho sisiindu siosi siosi sie mu lukoba omwo tawe, nio Wele Omunyali Owa Bioosi alekhe lirima liewe lirafu mala amukholele enywe siisa. Alaba owe siisa khwinywe mala amukhole mube ne babaandu bakali nga ne asuubisia bakuuka benywe.

¹⁸Mwaba ne muria kamalaka kewe koosi niko amuelesie luno, ne khukhola niko eenya, kalaba kario.”