Read lubukusu Likh. 14 Bible Online

Likh. 14 - lubukusu bible

Likh. 14

¹ “Enywe muli babaana ba Wele Omunyali Owa Bioosi, Wele wenywe. Mukhesala namwe mwekina, khulwe bafu tawe.

² Enywe muli babaandu batakatifu khu Wele Omunyali Owa Bioosi, Wele wenywe owamurobora enywe khukhwama mu baandu boosi bamenyile khu sibala, mube babaandu bewe.

³“Mukhalia sisiindu siosi siosi nisio Wele Omunyali Owa Bioosi abiila tawe.

⁴Munyala mwalia chisaang'i chino: ekhaafu, likheese, embusi,

⁵kicheu, ekhulo, koongoni, emboongo, embusi eye mundaa, ekhisi, ne likheese lie mundaa.

⁶Lia chisaang'i chosi chosi chiili ne bikhakayu bibiakabukhanamo lundi akhaba chinyanyanga ekamuula.

⁷Chiliio chisaang'i chikhali ne bikhakayu bibiabukhanamo tawe, mala chinyanyanga ekamuula. Ching'enecho mukhachilia tawe. Chisaang'i echo chili, chingamia, chinduyu, ne chisaabale. Chibukule khuuba chinyaalu.

⁸Mukhalia chingurwe tawe. Chibukule khuuba chinyaalu chili ne bikhakayu bibiakabukhanamo ne kakhali se chinyanyanga ekamuula tawe. Mukhaliaakho khu saang'i chino namwe mukhatiila khu saang'i efwiile tawe.

⁹“Munyala mwalia siosi siosi sie mu meechi siili ne sibeye ne kamakakaambu.

¹⁰Ne kakhali sisiindu siosi siosi simenyile mu meechi siikhali ne bibeye ne kamakakaambu mukhalia tawe. Sikhoya sibalwe khuuba sinyaalu.

¹¹“Munyala mwalia enyuni engwalaafu yosi yosi.

¹²Ne mukhalia chiloondakho chino tawe: efuruusi, engosia, namulobi,

¹³waasio, ne siruuchu khuloondekhana ne luusio lwabio.

¹⁴Buli khooro kumali khuloondekhana ne luusio lwako,

¹⁵enyeefwe, naololo, liyoyo, kisiilili khuloondekhana ne luusio lwakwo,

¹⁶naololo kimitiiti ne naololo kimiboofu, efutubile eye khu luuchi

¹⁷ne chetooto ne ling'ang'a ne munandi.

¹⁸Likhuyi, nalukosi, kwesule ne wambuto.

¹⁹“Bimoola bie chindaa bioosi bili binyaalu mukhabilia tawe.

²⁰Munyala mwalia bie chindaa bikwalaafu bioosi.

²¹ “Mukhalia sisiaayo siosi siosi sifwiile sisiene busa tawe. Munyala mwalekhela bakeni bamumenyilemo basilia, namwe munyala mwasikusia khu bakwa, sikila enywe muli batakatifu khu Wele Omunyali Owa Bioosi, Wele wenywe. “Okhateekhela enyama eye sisiaayo sitoro mu mabeele ka maawe tawe.

²² “Buli kumwiiko, ra alubeka sitonyi silala khwikhumi sie bibiaamo bie kumukuunda kwenywe bioosi.

²³Cha abuundu alala ao niio Wele Omunyali Owa Bioosi, Wele wenywe aarobora abe ekhusaayilao. Abwenao ebweeni wewe lia sitonyi silala khwikhumi sie biakhulia bienywe, endali ne kamafura nende ekhaafu embele ne likheese libele. Khola lino nio mweyike khuuria Wele Omunyali Owa Bioosi, Wele wenywe buli lwosi.

²⁴Abuundu e khusaayilao anyala aaba aleeyi lukali. Khwako se munyala mwasuta mwayilayo sitonyi silala khwikhumi sie bibiaamo nibio Wele Omunyali Owa Bioosi, Wele wenywe, amubiitile chikhabi mala mwanyoola tawe. Kaaba kario,

²⁵kusia bibiaamo bienywe mala mubukule chirupia muche nacho abuundu niio Wele Omunyali Owa Bioosi arobore e khusaaya.

²⁶Chirumikhire khukula sisiindu siosi siosi nisio mwenya khulia, kula enyama ye khaafu, eye likheese, endali ne kamalwa. Biliile ebweeneyo, ebweeni wa Wele Omunyali Owa Bioosi, Wele wenywe, enywe nende be chinju chenywe mulalia mala mwekhoye.

²⁷“Mukhalekelesia Balawi bamenyile mu ngoba chenywe tawe. Se bali ne sitonyi namwe kumukabwa kwabwe tawe.

²⁸Buli mwiiko kukhola khataru ne kwolile khu siakamo siakwo, mureere sitonyi silala khwikhumi sie bibiaamo bienywe bioosi mala mubibuunge mu ngoba chenywe.

²⁹Sino sili siakhulia sie Balawi sikila se bali ne kumukabwa kwabwe tawe, lundi sili sie bakeni, bafuubi ne banamulekhwa bamenyile mu ngoba chenywe. Baleecha mala banyoole nibio benya bioosi. Khola lino mala Wele Omunyali Owa Bioosi, Wele wenywe naye amubiite enywe chikhabi mu buli siindu nisio mukhola.”