Read lubukusu Likh. 15 Bible Online

Likh. 15 - lubukusu bible

Likh. 15

¹“Khumaliilikha khwa buli mwiiko kukhola saba beela abo baali ne kamakobi kenywe.

²Kalakholwa kari: buli mundu yesi yesi owekopia kimiaandu khu Muisiraeli wasie alamubeela likobi lienelio. Akheenya owe likobi aruunge tawe. Mukhole murio sikila siise esio sili sia Wele Omunyali Owa Bioosi nisio alomile ali sibe sie khubeelanila kamakobi.

³Munyala mwakaanila nibio bakeni bekopa ne kakhali mukharuungana mwabene ne mwabene nibio mwekopiana tawe.

⁴“Omutaambi se alabaao mwinywe tawe sikila Wele Omunyali Owa Bioosi alamubiita enywe chikhabi mu sibala nisio alikho amuelesia enywe nga kumukabwa.

⁵Mwaba ne muba barekerefu mu khumuria niye ne khuuria kamalaka kewe koosi niko ndikho muelesia luno.

⁶Wele Omunyali Owa Bioosi, Wele wenywe alamubiita enywe chikhabi nga ne asuubisia. Mulekopia kimiaandu khu kholo chingali, ne kakhali enywe se mulekopa khu kholo yosi yosi tawe, mulamiia chikholo chingali ne kakhali nicho se chilamwamiiakho enywe tawe.

⁷ “Omuisiraeli wasienywe aaba ne ali mwinywe mu lukoba lwosi lwosi khu ngoba che mu sibala nisio Wele Omunyali Owa Bioosi, Wele wenywe alikho amuelesia okhali nende nibio eenya tawe, mukhaba ne chinge mulobe khuyeeta babanani tawe.

⁸Ne kakhali, ba baani mala mubaelesie bikali nga ne benya.

⁹Mukhanyoola chinganakani chimayaanu tawe, mukhaloba khukhwikopia babaasienywe baali babanani sisiindu, sikila kumwiiko kwe kamakobi kuli siimbi tawe. Mukhalekha kamabi nga ako kario kengila mu mebaasio kenywe tawe. Ne muloba khubekopia balalilila Wele Omunyali Owa Bioosi mala mulanyoolekhana khuuba bamayaanu ebweeni wa Wele Omunyali Owa Bioosi.

¹⁰Baelesie mu bulekhuule ne mukhabeelela ne mulikho mubaelesia tawe. Kano kalakila Wele Omunyali Owa Bioosi, Wele wenywe amuelesie enywe chikhabi mu milimo kienywe kioosi.

¹¹ Bataambi se balilekha khubao mu sibala sienywe tawe. Khwako ese mulaka enywe ndi aana mu bulekhuule khu bawandaayenywe bataambi ne babanani baali mwinywe.

¹² “Omuisiraeli wasio owe siseecha namwe owe siikhasi aaba ne ekusia omwene[9] khwiwe nga nasioobi, mulekhuule enyuma we khu khukholela ewe kimiiko sita. Ne kakhali mumwiiko kwa saba, mulekhe ache ne ali omulekhuule.

¹³Ne ne olekhuula nasioobi khucha, akhacha makhono mataaka tawe.

¹⁴Ne omulekhuula, okhamulekha aacha makhono mataaka tawe muelesie bilalakho khu nibio Wele Omunyali Owa Bioosi akhuelesie ewe nga chikhabi: kamakheese, biakhulia nende endali.

¹⁵Khebulila oli mwesi mwaba banasioobi e Misiri mala Wele Omunyali Owa Bioosi, Wele wenywe aamuelesia enywe bulekhuule. Lino nilio likila ese ne khuelesia ewe lilaka lino luno.

¹⁶“Ne kakhali nasioobi wowo aaba ne akhenya khucha tawe, sikila aakhusiima ewe nende be nju yowo mala asienya khumenya,

¹⁷mubukule omuyile amuliango kwenju yowo mala abwenao omufutulileo liiru liewe. Nono, alaba nasioobi wowo mu bulamu bwewe bwoosi. Kholela nasioobi wowo owe siikhasi mu ngila ng'ene eyo.

¹⁸Okhalola khuuba lilume ne olekhuula nasioobi tawe. Kakhaba kario, aakhukholeele ewe kimiiko sita mala aakholeele e nusu[10] eye kumuruungo kwo mukholi ooandikwa khukhwola khabili. Khola lino, mala Wele Omunyali Owa Bioosi, Wele wenywe naye alamuelesia enywe chikhabi mu koosi niko mukhola.

¹⁹ “Ra alubeka Khulwa Wele Omunyali Owa Bioosi, Wele wenywe chiuunwa chimbele che chikhaafu choosi ne kamakheese. Mukharumikhirakho yosi yosi khu khaafu chino khu mulimo tawe. Lundi mukhabeka bufuumbo bwe likheese liosi liosi khu makheese kamabele ako tawe.

²⁰Buli mwiiko, enywe nende be chinju chenywe mukhalie bibiaayo abuundu niio Wele Omunyali Owa Bioosi arobora, ebweeni wewe.

²¹Ne kakhali sisiindu siibi siaaba ne sili khu biaayo ebio, biaaba ne bili bileme, namwe bibofu namwe sisiindu siibi lukali siosi siosi, mukhabikhola biaaba embosio khu Wele Omunyali Owa Bioosi, Wele wenywe tawe.

²²Ne kakhali munyala mwaliila sisiaayo esio mu lukoba lwenywe. Omundu omukwalaafu namwe omunyaalu khuloondekhana ne kumwiima, anyala aabilia, bulayi bwene busa nga ne mulichanga enyama eya kicheu namwe eye ekhisi.

²³ Mukhalia kamalasile kabio tawe, ne kakhali mukachukhe asi nga kameechi.”