Read lubukusu Likh. 16 Bible Online

Likh. 16 - lubukusu bible

Likh. 16

¹ “Khola e pasaka Khulwa Wele Omunyali Owa Bioosi, Wele wenywe. Kikhole mu mwesi kwa Abibu, sikila siaba siilo mu mwesi okwo nikwo Wele Omunyali Owa Bioosi amureeseliamo enywe mwarura e Misiri.

²Cha abuundu niio Wele Omunyali Owa Bioosi alirobora khulwe khusaayilao mala okhonyeleo lilala khu makheese kowo namwe ekhaafu khulwe embosio eye Pasaka ya Wele Omunyali Owa Bioosi, Wele wowo.

³Mukhalia embosio eyo ne kimikaati kiilimo limela tawe. Chindaalo saba mulalia kimikaati kikhalimo limela tawe, sikila mwarura mu sibala sia Misiri khangu. Lia kimikaati kino, nio mu bulamu bwenywe bwoosi mukhebulile endaalo niyo mwarurirakho e Misiri.

⁴Chindaalo saba se aliio omundu yesi yesi mu sibala sienywe olaba ne kamamela tawe. Ne enyama eye embosio niio muaana ekolooba khu ndaalo eye khunyoa ekhoya eliibwe yoosi siilo esio, ekharama khukhwola kumutikhinyi tawe.

⁵“Mukhaanila embosio eye Epasaka mu lukoba lwosi lwosi mu ngoba nicho Wele Omunyali Owa Bioosi, Wele wenywe alikho amuelesia enywe tawe.

⁶Ne kakhali kiaanile abuundu niio Wele Omunyali Owa Bioosi alirobora, khumusaayilao. Abwenao muaanileo embosio ekolooba, a siise nisio mwaruriramo e Misiri.

⁷Teekha enyama mala mukiliile abuundu alala niio Wele Omunyali Owa Bioosi arobora e khusaayilao. Oli kumutikhinyi ne mukobola mu mu maeema kenywe.

⁸Khulwe chindaalo sita chiloondakho mulia kumukaati kuukhalimo limela tawe ne kakhali khu ndaalo ekhola saba buusiana alala Khulwa Wele Omunyali Owa Bioosi, Wele wenywe. Ne mukhakhola kimilimo khu ndaalo eyo tawe.

⁹ “Bala kamachuuma saba khukhwamila khu siise nisio mwarakikhirakho khukesa biakhulia.

¹⁰Nio mukhole Naikara eye Likesa khulwa Wele Omunyali Owa Bioosi, Wele wenywe. Mureerere siianwa sie khukhwerusia khuloondekhana ne chikhabi nicho akhuelesia.

¹¹Ne buli mundu ekhoye ebweeni wa Wele Omunyali Owa Bioosi, Wele wenywe, alala ne babaana bowo basoleeli ne bakhaana, banasioobi bowo be siseecha nende be siikhasi ne Balawi ne bakeni ne bafuubi ne banamulekhwa bamenyile mu ngoba chenywe. Khola murio abuundu alala e khusaaya Wele Omunyali Owa Bioosi, Wele wenywe.

¹²Khebulila muli mwaba banasioobi mu Misiri khwako ba barekerefu khuria kamalaka kano.

¹³ “Enyuma we khubuunga biakhulia bienywe nende endali, khola Naikara eye Bisali khulwe chindaalo saba.

¹⁴Kikhoyele ne babaana benywe basoleeli ne bakhaana, banasioobi bowo be siseecha nende be siikhasi, ne Balawi ne baakwa ne bafuubi ne banamulekhwa bamenyile mu ngoba chenywe.

¹⁵Khola naikara Khulwa Wele Omunyali Owa Bioosi, Wele wenywe khulwe chindaalo saba abuundu aaroborwa e khusaayilao. Khola murio sikila Wele Omunyali Owa Bioosi, Wele wenywe alaana chikhabi nibio mukesa bioosi ne kimilimo kienywe kioosi mala enywe mulaba basangaafu lukali.

¹⁶“Babaandu benywe be siseecha boosi bakheeme ebweeni wa Wele Omunyali Owa Bioosi, Wele wenywe abuundu niio Wele Omunyali Owa Bioosi akharobore. Bakheeche kamakhabi kataru khu mwiiko, siise sia naikara eye kumukaati kukhalimo limela tawe, Naikara eye Likesa nende Naikara eye Bisali. Buli mundu areere siianwa khu Wele Omunyali Owa Bioosi,

¹⁷khuloondekhana ne chikhabi nicho Wele Omunyali Owa Bioosi, Wele wewe amuelesie.

¹⁸“Robora bakhalaki ne babemeelesi bakhulu babaandi buli mu lukoba nilwo Wele Omunyali Owa Bioosi, Wele wenywe aamuelesia khulwe chikholo chenywe. Babaandu bano balakhalakila babaandu mu buluungi.

¹⁹ Bakhaba babaandu bakhali bang'ali tawe, namwe bakonele lubeka lulala mu bukhalaki bwabwe tawe. Ne se balafukiilila asooya tawe. Asooya ebofusia chimoni che babaandu bakesi ne khukaluukhasia bung'ali bwa abo bali baluungi.

²⁰Buli lwosi khola kaali ng'ali, nio mumenye lundi mube mu sibala nimwo Wele Omunyali Owa Bioosi, Wele wenywe alikho amuelesia enywe.

²¹ “Ne okhola alutare Khulwa Wele Omunyali Owa Bioosi, Wele wowo, okhara andulo wayo sifwaani sisiabeechwa khukhwama khu murongooro sia wele Asiera tawe.

²² Lundi okhombakha sifwaani sie njeko eye kamabaale tawe, bifwaani bili lisinya khu Wele Omunyali Owa Bioosi, Wele wowo.”