Read lubukusu Likh. 17 Bible Online

Likh. 17 - lubukusu bible

Likh. 17

¹“Mukhaelesia Wele Omunyali Owa Bioosi, Wele wenywe chikhaafu namwe kamakheese nga chimbosio mala chilimo sisiindu siibi tawe. Wele Omunyali Owa Bioosi, Wele wenywe abiila lino.

²“Kaaba bali omundu owe siseecha namwe owe siikhasi anyoolekha ne akhola bumayaanu mu ngoba nicho Wele Omunyali Owa Bioosi alikho amuelesia enywe,

³ mu ngila eye khukholela bawele babaandi ne khubasaaya nibo namwe enyanga namwe kumwesi namwe ching'enieesi nibio Ese Wele Omunyali Owa Bioosi ngaania.

⁴Lundi mwaba ne muboolelwa namwe mwaulila muulila likhuwa lirio, lireeberesie bulayi. Liaba ne lili ng'ali mbo sisiindu siibi sino siakholeekhe mu Isiraeli,

⁵bukula omundu oyo mumurusie enje we lukoba mala mu muupe kamabaale afwe.

⁶ Omundu oyo akhoya eerwe kaaba bali baloli babili namwe bataru baboolile bario khu niye. Omundu akheerwa khulwe buloli bwo mundu mulala yeng'ene tawe.

⁷ Baloli balaba be khunyoa khumuupa kamabaale nio babaandu babaandi baloondiekho. Mu ngila yino murusieo bumayaanu akari wenywe.

⁸“Kimisaango milala kinyala kiabao nga kie bubwiri, bulomani namwe khukhwibwaakala. Kimisaango nga ekio kinyala kiaba kimiandalafu khwinywe. Khwako kimisaango nga ekio khe mukiyile abuundu niio Wele Omunyali Owa Bioosi, Wele wenywe alarobora.

⁹Cha khu basaayi balawi ne khu mukhalaki ooli mu bwimeelesi mu biise ebio, mala balekhele nibo bakhalake kumusaango okwo.

¹⁰Ne enywe mukhola nga ne bakhuboolela.

¹¹Fukiilila bukhalaki bwabwe mala muloonde niko bamuboolela enywe mu bwichufu.

¹²Omundu yesi yesi okhaka khuuba omureengu khu mukhalaki namwe khu musaayi ooli khu milimo aleerwa. Mu ngila yino mularusiao bubi mu Isiraeli.

¹³Lundi buli mundu olaulila kano alaba omuri ne se aliio akhaba mulala olaba ne sileka lundi tawe.”

¹⁴ “Enyuma we khubukula sibala nisio Wele Omunyali Owa Bioosi, Wele wenywe alikho acha khumuelesia enywe mala mwingisie mumenyemo. Mulienya mube no mwami nga chikholo choosi chichamubotookhelela enywe.

¹⁵Ba ng'ali khurobora omundu niye Wele Omunyali Owa Bioosi, Wele wenywe arobora khuuba omwami wenywe. Akhoya abe mulala khu baandu be kholo yenywe mukhakhola omukwa abe omwami wenywe tawe.

¹⁶ Omwami se akhoyeele abe ne chifarasi chingali namwe se akhoyeele akobosie babaandu e Misiri khureera chifarasi tawe. Wele Omunyali Owa Bioosi aloma ali, ‘Mukhakobolayo lundi tawe.’

¹⁷ Omwami akhaba ne bakhasi bakali tawe, sikila lino lilamukhola aaukhe khukhwama khu Wele Omunyali Owa Bioosi. Lundi akhaba ne efwesa ne esahabu engali tawe.

¹⁸Nga ne alaba omwami mu bwami bwewe, niye omwene alaandika mu sitabu kamalaka malalakho khukhwama khu basaayi ne Balawi.

¹⁹Alaba ne sitabu sino mala asisome mu bulamu bwewe bwoosi, nio eyike khuria Wele Omunyali Owa Bioosi, Wele wewe ne khuuria kamalaka kewe koosi ne khukhola nga kaboola.

²⁰Lino lilamuliinda nio akhebaasia ali niye ali omulayi khukhila Baisiraeli basie tawe, lundi nio akhaba omureengu khu malaka ka Wele Omunyali Owa Bioosi tawe. Akhola ario nio niye ne lisaaye liewe bamiie Isiraeli mindali na mindali.”