Read lubukusu Likh. 18 Bible Online

Likh. 18 - lubukusu bible

Likh. 18

¹“Ekholo eye busaayi eya Lawi se alanyoola sitonyi sie kamaloba mu Isiraeli tawe. Ne kakhali balamenyela biianwa bie khukhwosia bia Wele Omunyali Owa Bioosi. Sino sili sitonyi siabwe.

² Se balaba ne kamaloba, nga chikholo chichiindi tawe, sitonyi siabwe sili bubweyaangu bwe khuuba basaayi ba Wele Omunyali Owa Bioosi, nga Wele Omunyali Owa Bioosi omwene ne aalaka.

³“Buli lwosi ne muaana ekhaafu namwe likheese nga embosio, basaayi balaelesibwa kamayi, chinyanyilo nende bie munda.

⁴Balanyoola sitonyi sie khunyoa sie biakhulia, endali ne kamafura ne bufuumbo bwe kamakheese.

⁵Khola murio sikila Wele Omunyali Owa Bioosi, Wele wenywe aabarobora nibo khukhwama mu kholo chenywe choosi khumukholela niye.

⁶“Omulawi yesi yesi owenya, anyala aama mu lukoba lwosi lwosi mu Isiraeli aacha abuundu aaroborwa khusaaya Wele Omunyali Owa Bioosi.

⁷Anyala akholayo nga omusaayi wa Wele Omunyali Owa Bioosi, Wele wewe, nga Balawi babaandi bakholanga ebweeneyo.

⁸Alanyoola sikelo sie siakhulia silekhaana nga sie basaayi babaandi lundi alatasa khu nibio anyoola khukhwama engo wewe.

⁹“Nga ne mulengila mu sibala nisio Wele Omunyali Owa Bioosi, Wele wenywe alikho amuelesia enywe, mukhaloonda kimiima kimibi kie chikholo chiili ebweeneyo tawe.

¹⁰ Mukhoosia babaana benywe basoleeli ne bakhaana nga chimbosio namwe biianwa tawe. Lundi omulakusi namwe omung'oosi omubeeyi, namwe omumenieelesi namwe omulosi akhabao mwinywe tawe.

¹¹ Omundu oyeeta babaandu khulwe khurumikhira kamayia akhabao tawe. Omubini namwe orumikhira babafwa khumanya ke biise bibiicha akhabao tawe.

¹²Wele Omunyali Owa Bioosi, Wele wenywe abiila babaandu bakhola bibiindu bie khusinya bino. Niko kakila Wele Omunyali Owa Bioosi ne alikho aoona chikholo chino chirure mu sibala ebweeni wenywe.

¹³ Enywe mukhabaakho ne buubi bwosi bwosi bukila mwekiichibwa ebweeni wa Wele Omunyali Owa Bioosi, Wele wenywe tawe.”

¹⁴“Chikholo nicho mucha khukhwingisia kamaloba kacho chiulilanga ke bafumu ne balakusi. Ne kakhali Wele Omunyali Owa Bioosi, Wele wenywe se amufukiilila enywe mukhole lino tawe.

¹⁵ Wele Omunyali Owa Bioosi, Wele wenywe alamurumira enywe omung'oosi nga ese khukhwama mwinywe babeene, mala mukhoya mu murie niye.

¹⁶“Khu ndaalo niyo mwakhung'aana a sikulu sia Sinai lino nilio mwakhola. Mwaloma muli, ‘Se khwenya khuulilakho lundi Wele Omunyali Owa Bioosi, Wele wefwe ne alomaloma, namwe mubone kumulilo kwewe kumukali tawe, busa khukhola khurio khwafwa!’

¹⁷Nio Wele Omunyali Owa Bioosi amboolela ese ali, ‘Niko balomile kali ng'ali.

¹⁸Ndibarumira omung'oosi nga ewe khukhwama mu baandu babwe babeene. Ese khaboolele omung'oosi nisio alomaloma, mala akhaboolele babaandu buli siindu nisio ese mulaka.

¹⁹ Akhalomalome mwisina liase ne ese khaukuume buli mundu okhalobe khumuria niye.

²⁰Ne omung'oosi yesi yesi ne akhaka khulomaloma burume mu lisina liase, mala Ese se namulakile khukhola ario tawe, namwe aaba ne ali omung'oosi olomaloma mu lisina lie bawele babaandi, akhoya afwe.’

²¹“Munyala mwebaasia muli, ‘Khumanya khuriena burume bwo mung'oosi ne bwama khu Wele Omunyali Owa Bioosi?’

²²Omung'oosi aaba ne alomaloma mu lisina lia Wele Omunyali Owa Bioosi mala niko aloma se kakholekha tawe, aba se buli burume bwa Wele Omunyali Owa Bioosi tawe. Omung'oosi oyo akhoya alomalome mu bunyali bwewe omwene, mala mukhamuria niye tawe.”