Read lubukusu Likh. 19 Bible Online

Likh. 19 - lubukusu bible

Likh. 19

¹ “Wele Omunyali Owa Bioosi, Wele wenywe alabunia chikholo che sibala nisio alikho amuelesia enywe. Enyuma wako mukhamenye mu chingoba chabwe ne chinju.

²Robora chingoba chitaru alubeka mu sibala nisio Wele Omunyali Owa Bioosi, Wele wenywe alikho amuelesia enywe khuuba sisienywe.

³Lima kimiyila mala mukabemo bitonyi bitaru sibala nisio Wele Omunyali Owa Bioosi, Wele wenywe alikho amuelesia enywe khuuba sisienywe. Khola murio. Omundu yesi yesi owera owasie anyala elukhilamo.

⁴Lino nilio lilaka khuloondekhana ne omundu owilukhila mu ngoba echo khulwe khuonia bulamu bwewe ne eera owasie matundubiikha okhaaba omusiku wewe tawe.

⁵Omundu anyala aacha ne owasie mu musiru khurema kimirongooro. Anyala aaba arema kumurongooro akwisie ne eaywa esabukhamo mala yiira owasie. Omundu oyo anyala elukhila mu lukoba lulala khu ngoba chitaru chino mala aaona.

⁶Busa omulebe owo mundu ofwiile, oweyacha anyala anyoola lirima mala atimania omwiiri. Lukoba lwaba aleeyi, omulebe oyo anyala eera omwiiri akhaba omundu oyo nakhenyekha afwe tawe. Omundu oyo se ang'alilamo khukhwira owasie tawe.

⁷Lino nilio likila ne mulaka enywe murobore chingoba chitaru echo.

⁸“Wele Omunyali Owa Bioosi, Wele wenywe akhabalaaye sibala sienywe, nga ne aasuubisia bakuuka benywe mala amuelesie sibala sioosi nisio aasuubisia.

⁹Alakhola ario mwaba ne muria kamalaka kewe niko ndikho muelesia luno khulwe khumusiima niye, Wele Omunyali Owa Bioosi, Wele wenywe ne khuloonda chingila chewe. Enyuma wako murobore chingoba chichiindi chitaru che khukhwilukhilamo.

¹⁰Khola lino, nio babaandu bakhali ne bubi bakheererwa mu sibala nisio Wele Omunyali Owa Bioosi, Wele wenywe alikho amuelesia khuuba sisienywe tawe. Ne mukhola murio aba enywe se mulaba ne kumusaango kwe khufukiilila lifwa lie babaandu bakhali bamayaanu tawe.

¹¹“Omundu anyala aaba omusiku khu wasie, mala ekise alindiilile ebwaakale owasie oyo amwire, mala elukhile mu lulala khu ngoba echo.

¹²Mu sikholwa nga esio baliindi be lukoba lwewe babeene barumania areerwe mala bamwakaanisie omulebe wo mundu niye eera owenyebwa eyache lifwa elio, nio oyo eerwe.

¹³Mukhamukholela siisa tawe. Rusia mu Isiraeli kumusaango kwe khukhwira babaandu bakhalikho ne bubi tawe nio enywe mube bulayi.

¹⁴ “Okhasendia lulwakha lwo owasio, lulwarebwao khale mu sibala nisio Wele Omunyali Owa Bioosi, Wele wenywe alikho amuelesia enywe tawe.

¹⁵ “Omuloli mulala se anyala khukhola omundu akhalakilwa khu makhiikha namwe kamamayaanu niko akholile tawe. Kumusaango kukhoya kwakhalakwa ne buloli bwe babaandu babili namwe bataru.

¹⁶Omuloli aaba ne akiikhila busa omundu khumuraakho kumusaango,

¹⁷boombi balacha abuundu alala ebweeni wa Wele ne basaayi ne bakhalaki baali mu bukhalaki biise bienebio.

¹⁸Bakhalaki balaloleelesia kumusaango okwo. Buloli bwaaba ne buli bwe bubeeyi, omundu aaba ne akiikhila busa owasie,

¹⁹mukhoya mumureekho niko niye enyile khuura khu wasie oyo. Ne mukhola murio aba mularusia bumayaanu akari wenywe.

²⁰Ne babaandu babaandi balaulila ako balaria, ne mbao omundu mwinywe olakhola bumayaanu nga obwo burio lundi tawe.

²¹ Mukhekesiakho siisa tawe. Kalaba kari; bulamu khulwe bulamu, emoni khulwe moni, liliino khulwe liliino, kumukhono khulwe kumukhono ne sikele khulwe sikele.