Read lubukusu Likh. 2 Bible Online

Likh. 2 - lubukusu bible

Likh. 2

¹ “Nio khwacha mu sichiimi lubeka lwe enyanja eya shamu nga Wele Omunyali Owa Bioosi ne amboolela. Ne khulwe chindaalo chingali khwabotookhelela sikulu sia Edomu.

²“Nio Wele Omunyali Owa Bioosi amboolela ali,

³‘Mwabotookheleele sibala sie bikulu sino khulwe siise sileeyi. Cha lubeka lwe ebunaswa.

⁴ Boolela babaandu oli, muli siimbi khubira mu sibala Edomu sie balebe benywe be lisaaye lia Esau. Balaba bari khwinywe.

⁵Nono, rekeeresia bulayi mukharakikha liie ne nabo tawe, sikila se ndikho nja khumuelesiakho kamaloba kabwe, siakhaba sikele silala tawe. Sikila naelesia lisaaye lia Esau sikulu sia Edomu nga kumukabwa kwewe.

⁶Mukule siakhulia ne kameechi ke khunywa khukhwama khu nibo.’

⁷“Khebulila nga Wele Omunyali Owa Bioosi, Wele wenywe ne amubiita enywe chikhabi mu buli siindu nisio mwakhola. Aamuliindile enywe nga mwabirire mu sichiimi sibalaayi sino. Wele Omunyali Owa Bioosi, Wele wenywe abele ne nanywe khulwe kimiiko kamakhumi kane kino. Se mwatambilekho sisiindu siosi siosi tawe.

⁸“Khwako khwachiililila ne lukeendo khwabira busa khu balebe befwe be lisaaye lia Esau ba baamenya Edomu khwayukha khwalekha kumuyila kukwama Elati ne Esioni-geberi mala khwalola lubeka lwe mu sichiimi sia Moabu.

⁹ Wele Omunyali Owa Bioosi amboolela ali, ‘Mukhanania babaandu ba Moabu, namwe mwapana ne nabo tawe kabe kario sikila ese se ndamuelesiakho enywe kamaloba kabwe kosi kosi tawe. Naelesia lukoba lwa Ari khu lisaaye lia Loti nga kumukabwa.’

¹⁰“(Ekholo eye babaandu be kamaani lundi baboofu lukali, balaangwa bali Baemi bamenyanga mu lukoba lwa Ari. Baba baleeyi busa nga Baanakimu. Baanakimu eli e kholo ekiindi eye babaandu baboofu lukali.

¹¹Nga Baanakimu, Baemi bosi bamanyikhana bali Barefaimu, ne kakhali Bamoabu babalanganga bali Baemi.

¹²Baori bosi bamenyanga mu Edomu ekhunyoa. Ne kakhali be lisaaye lia Esau babatimania baruramo, mala bamenya mu maloba ako mu bweyaangu bwe Baori. Be lisaaye lia Esau bakholela bulayi bwene nga Baisiraeli ne babakholela. Baisiraeli bosi batimania Baori khukhwama mu maloba niko Wele Omunyali Owa Bioosi aba ne aelesia Baisiraeli.)

¹³“Ne Wele Omunyali Owa Bioosi akhuboolela ali, ‘Nono yinyokha mala mwambukhe luluuchi lwa Sereti.’ Nio khwenyokha khwambukha luluuchi lwa Sereti.

¹⁴ Khukhwama e Kadeshi-barinea khukhwola nga ne khwambukha litooma lia Sereti khwakhubukula kimiiko kamakhumi kataru na munaane. Babaandu boosi ba baaba banamae baba bafwiliile mu kambi nga Wele Omunyali Owa Bioosi ne aba ne abalaka.

¹⁵Wele Omunyali Owa Bioosi ababiila khukhwola nga ne ababunia khukhwama mu kambi.

¹⁶“Enyuma we banamae abo boosi khufwa,

¹⁷Wele Omunyali Owa Bioosi amboolela ali,

¹⁸‘Endaalo yino mucha khubirira siimbi ne lulwakha lwa Moabu e Ari.

¹⁹ Ne mwimbiya Baamoni, mukhabanaania namwe mwabarangana tawe. Kabe kario sikila ese se nja khumuelesiakho enywe kamaloba ke Baamoni kosi kosi tawe. Kamaloba ako kali ke lisaaye lia Loti.’ ”

²⁰(Akhaba lundi kamaloba kano kamanyikhana nga kamaloba ke Barefaimu, lisina lie babaandu babamenyangamo. Baamori babalanganga bali Basamusumimu.

²¹Barefaimu baba baleeyi lukali nga Baanakimu. Ne kakhali Wele Omunyali Owa Bioosi ababunia ebweeni we Baamoni. Baamoni babatimania mala bamenya mu bweyaangu bwe Barefaimu.

²²Wele Omunyali Owa Bioosi aba akholele ario Baedomu, be lisaaye lia Esau. Abunia Baori ebweeni we Baedomu, akhola Baedomu baoona Baori khukhwama mu sibala siabwe mala bamenyamo mu bweyaangu bwabwe khukhwola luno.

²³Ne Bakatitori nabo babunia Bahibi babamenyanga mu birekere biicha khukhwola khu lukoba lwa Kasa mala bamenya mu bweyaangu bwabwe.)

²⁴“Yinyokha oche wambukhe litooma lia Arinoni. Nareere Sihoni omwami owe Baamori owamenya mu lukoba lwa Heshiboni mu sibala siewe mu bunyali bwowo. Mwibwaakale, mala murakikhe khukhwingisia sibala siewe.

²⁵Khukhwama endaalo yino ndarakikha khukhola babaandu be khu sibala bamurie enywe. Buli mundu olaulila kakenywe alareenga mala abe omuri.

²⁶“Nio naruma barume khukhwama mu sichiimi sia Ketemoti bacha khu mwami Sihoni owa Heshiboni ne kamakhuwa ke kumuleembe. Naloma ndi,

²⁷‘Nosiima khulekhe khubirire mu sibala siowo. Khulaloonda busa kumuyila kwong'ene se khulaukhakho tawe.

²⁸Khularuunga siakhulia nisio khulia ne kameechi niko khunywa. Ne kakhali khulekhe khubirire mu sibala siowo.

²⁹Khola orio nga be lisaaye lia Esau bamenyile Edomu ne bakhukholela efwe. Akhaba Bamoabu bosi bakhukholela bario. Khukholele orio khukhwola nga khwingila mu sibala nisio Wele Omunyali Owa Bioosi Wele wefwe akhuelesia efwe.’

³⁰“Ne kakhali omwami Sihoni owa Heshiboni se akhulekhuula khubira mu sibala siewe tawe. Wele Omunyali Owa Bioosi Wele wefwe aba amuminyaasia nio amure mu bunyali bwenywe nga lili luno.

³¹“Ne Wele Omunyali Owa Bioosi amboolela ali, ‘Lola narakikhe khura omwami Sihoni ne sibala siewe, mu bunyali bwenywe. Rakikha khukhwingisia sibala siewe mala musimenyemo.’

³²Sihoni ne babaandu bewe boosi barura khukhupana ne nafwe siimbi alukoba lwa Yaasi.

³³Ne Wele Omunyali Owa Bioosi Wele wefwe amura mu bunyali bwefwe mala khwamuula. Khwamwiira niye ne babaana bewe, ne babaandu bewe boosi.

³⁴Khwaamba chingoba chewe choosi. Khwonakakila elala buli lukoba, baseecha, bakhasi, ne babaana. Se khwaramiakho omundu omulamu tawe.

³⁵Khwabukula chikhaafu chong'ene nga kimiaandu ne kimiaandu kie mu ngoba.

³⁶Wele Omunyali Owa Bioosi Wele wefwe ara chingoba choosi khukhwama Aroeri, khu ndulo khwe litooma lia Arunoni, ne lukoba luli akari we litooma elio khukhwola Kileati mu bunyali bwefwe. Se lwabao lukoba lulwaba luleeyi khwifwe tawe.

³⁷Ne se khwacha siimbi e sibala sie Baamori namwe khu sikiingi sie luluuchi lwa Yaboki namwe khu ngoba che mu sibala sie bikulu namwe abuundu osi osi niio Wele Omunyali Owa Bioosi Wele wefwe aba ne akhulaka ali mukhachayo tawe.