Read lubukusu Likh. 20 Bible Online

Likh. 20 - lubukusu bible

Likh. 20

¹“Ne mucha khupana ne basiku benywe mala mubone kamakaari ke mwiie, ne chifarasi ne banamae bakali khukhila babenywe, mukhabaria tawe. Wele Omunyali Owa Bioosi, Wele wenywe owamureesia enywe khukhwama e Misiri, ali nanywe.

²Ne muchiile mwiie, omusaayi eecha ebweeni mala alomalome ne banamae.

³Akhamuboolele enywe ali, ‘Baisiraeli rekeeresia! Endaalo yino mulikho mucha khuupana ne basiku benywe. Mukhafwa kimiooyo tawe, mukhaba baari khu basiku benywe tawe, namwe mwareenga mwaayaaya tawe,

⁴sikila Wele Omunyali Owa Bioosi, Wele wenywe alikho acha nanywe mala alamupanila mala amuelesie enywe bukhili.’

⁵“Banamae bakhulu bakhalomalome khu baandu bali, ‘Aliio omundu ano owombaakhe enju embia mala akhaakira ebweeni wa Wele mu lisaaya tawe? Aaba naliio akhoya ache engo. Lekha akhole ario, ne busa akhola ario eererwa mwiie, mala omundu okundi aana enju yewe eyo ebweeni wa Wele mu lisaaya.

⁶Aliio omundu yesi yesi ano owabialile busa ari liruuti lie kimisabibu, ne akhanyoola bubweyaangu bwe khubuta kimisabibu tawe? Aaba ne aliio akhoya ache engo. Lekha akhola ario, ne busa akhola ario eererwa mwiie, mala omundu okundi eekhoyela kamatuunda.

⁷Aliio omundu ano okhwele omukhaana abe omukhasi wewe mala akhamubukula tawe? Aaba ne aliio ache engo. Lekha akhola ario, ne busa akhola ario eererwa mwiie, mala omundu okundi aabukula omukhaana niye oyo aakhwa.’

⁸“Babemeelesi bakhulu balareeba lundi babaandu bali, ‘Aliio omundu niye kamafuki kewe keelulukha sikila buuri? Kaaba kario ache engo. Akhola ario akila babaandu boosi bafwa kimiooyo.’

⁹Babemeelesi ne bamalile khulomaloma khu banamae, banamae babemeelesi baroborwe khukhwimeelela buli sipupu sie banamae.

¹⁰“Nga ne mucha khwibwaakala lukoba, lie khunyoa eelesia babaandu be lukoba olwo bubweyaangu bwe khureerao kumuleembe akari wenywe nabo.

¹¹Baaba ne bafukiilila kumuleembe mala bekula bilibwa biabwe sikila enywe, babaandu be lukoba olwo boosi balaba banasioobi benywe.

¹²Ne kakhali babaandu be lukoba olwo ne bakhafukiilila khuuba ne kumuleembe ne nanywe tawe ne kakhali baarobora khu khuupana, botookhelela lukoba olwo.

¹³Wele Omunyali Owa Bioosi, Wele wenywe ne ara lukoba olwo mu bunyali bwenywe, yiira buli mundu owe siseecha olimo.

¹⁴Ne kakhali munyala mwabukula bakhasi ne babaana, bibiaayo nende buli siindu siili mu lukoba. Munyala mwalia buli siindu sie basiku benywe. Wele Omunyali Owa Bioosi, Wele wenywe amueleesie enywe.

¹⁵Mulakholela murio chingoba choosi chiili aleeyi, chikhali che chikholo chiili siimbi ne nanywe tawe.

¹⁶“Ne nga ne muaamba chingoba chiili mu sibala nisio Wele Omunyali Owa Bioosi, Wele wenywe alikho amuelesia, mukhalekhakho sisiindu siosi siosi ne sili silamu tawe.

¹⁷Bunisilia elala babaandu boosi: Bahiti, Baamori, Bakanaani, Baperisi nende Bahibi ne Bayebusi nga Wele Omunyali Owa Bioosi, Wele wenywe ne alaka.

¹⁸Beere nio bakhamweyikia enywe khukhola bibiindu biabwe bioosi bie khusinya nibio bakholelanga bawele babwe tawe. Mwakhola murio, aba mukhola bubwoni khu Wele Omunyali Owa Bioosi, Wele wenywe.

¹⁹“Ne mubotookhelela lukoba khulwe biise bileeyi ne khulwibwaakala nio mulubukule, mukharema kimirongooro tawe. Munyala mwalia kamatuunda kakio. Kimirongooro se kili basiku benywe tawe.

²⁰Ne kakhali munyala mwarema kimirongooro nikio mumanya muli se kili kie kamatuunda tawe mala mukirumikhire khuyaba kamaloo ne khubuusia liloba lie khukhwibuulilamo khukhwola nga lukoba ne luambwa.”