Read lubukusu Likh. 21 Bible Online

Likh. 21 - lubukusu bible

Likh. 21

¹“Omundu anyoolekha ne ererwe mu lukoongo mu sibala nisio Wele Omunyali Owa Bioosi, Wele wenywe alikho acha khumuelesia mala enywe se mwamanyile omwiirire tawe.

²Kaaba kario, aba babemeelesi ne bakhalaki benywe banyala barura bache mala bapiima buleeyi bwe khukhwama niio kumubili kunyoolekhe khukhwola khu buli lukoba khu ngoba chiili siimbi.

³Babemeelesi be lukoba luli siimbi khukhila chichiindi khukhwola niio kumubili kwanyooleekhwe balarobora emasoti endayi.

⁴Bakibukula bakiyile mu litooma nilio bakhalimakho namwe liabiaalwamo tawe, litooma elio libe lie khakheechi. Ebweeneyo bakikhonyeleyo.

⁵Basaayi balawi boosi balachayo, sikila Wele Omunyali Owa Bioosi, Wele wenywe aabarobora nibo khumukholela niye ne khuaana chikhabi mu lisina lia Wele Omunyali Owa Bioosi. Nibo babisia kimisaango kie bulomani ne burangani.

⁶Ne Basaakhulu boosi khukhwama mu lukoba luuli siimbi lukali abuundu niio kumubili kwo mundu oweriirwe, balasaabila kamakhono kabwe khu mosoti niyo bakhonyela mu litooma.

⁷Barusie buloli ne baloma bali, ‘Efwe se khwerire omundu yuno tawe lundi se khwaboone ne bamwiira tawe.

⁸Wele Omunyali Owa Bioosi beela Isiraeli babaandu bowo nibo wareesia barura Misiri. Khubeele, mala okhabalila Isiraeli mu khwirwa khwo mundu okhali ne kamakhiikha yuno tawe.’ Ne mukholile murio mulabeelwa bubi bwenywe.

⁹Nio, mu khukhole niko Wele Omunyali Owa Bioosi enya, semulabalilwa mu bwiri bwo mundu oyo tawe.”

¹⁰“Ne mucha mwiie khu khuupana ne basiku benywe, Wele Omunyali Owa Bioosi, Wele wenywe alimuelesia enywe bukhili mala mubabukule nga baboe.

¹¹Mulala khwinywe ne aboone omukhasi owe lukoondo lulayi mu baboe abo anyala amukhwa mala oyo aaba omukhasi wewe.

¹²Mubukule omuyile engo wowo. Ebweeneyo alabeka lichuune[11] liewe mala akhale kamatere.

¹³Ekaluukhasie chingubo. Alamenya munju mwowo alililemo paapa ne maawe khu mwesi mulala. Enyuma wako, onyala wamukhwa aaba omukhasi wowo. Alaba omukhasi wowo ne ewe olaba omuseecha wewe.

¹⁴Ne okhasiimisibwa ne naye tawe, mulekhuule ache osi osi niio enya. Se okhoyeele omukusie namwe omukhole khuuba nasioobi tawe, sikila aba wamalile khumurusiamo lukoosi lwewe.”

¹⁵“Omundu aaba ne bakhasi babili. Anyala asiima mulala mala abiila okundi. Bakhasi abo boombi banyala bamusaalila babaana basoleeli ne omubele wewe se ali omwana wo omukhasi niye asiima tawe.

¹⁶Nga Omundu oyo ne abisia khukaba kimiaandu, akhababila omusoleeli wo mukhasi niye asiima khulwe khumuelesia sitonyi sio omubele tawe.

¹⁷Akhoya aane sitonyi siboofu khukhwola khabili sie kimiaandu kiewe khu musoleeli wewe omubele, akhaba ne akhali omusoleeli wo omukhasi niye akhasiima tawe. Omundu oyo akhoya aelesie omusoleeli wewe omubele bung'ali bwewe sikila omwenoyo niye ooli kamaani kewe ke khunyoa.”

¹⁸“Omundu aaba no omusoleeli onaania lundi omureengu, omusoleeli okharia paapa ne maawe tawe, akhaba ne bamukololosia.

¹⁹Raraawe ne maawe bakhoyeele bamuyile ebweeni we basaakhulu babemeelesi be lukoba niio bamenyile mala bamwimisie a silibwa.

²⁰Balaboolela basaakhulu bali, ‘Omusoleeli wefwe yuno ali omureengu, owe sileka lundi ali ne mbelekeu. Ali owe kumuliuliu lundi omumeesi.’

²¹Nio babaandu be lukoba olwo boosi balamupa kamabaale afwe. Murusie bumayaanu akari wenywe. Buli mundu mu Isiraeli alaulila sisiekholeekhe mala alaria.”

²²“Omundu ne akholile bumayaanu nibwo akhoyeele eerwe, akhoya eerwe mala kumubili kwewe kusungwe khu murongooro.

²³ Ne kakhali kukhasungwachakho siilo sioosi tawe. Kukhoya kusiikhwe endaalo eyo neng'ene, sikila omundu niye kumubili kwewe kusungwacha khu murongooro ali ne silaamo sia Wele. Mukhanyaalutia sibala nisio Wele Omunyali Owa Bioosi, Wele wenywe alikho amuelesia enywe tawe.”