Read lubukusu Likh. 22 Bible Online

Likh. 22 - lubukusu bible

Likh. 22

¹ “Waaba ne obona ekhaafu namwe likheese lio Muisiraeli wasio ne lilikho likeendakeenda busa, okhalekha khuyeeta tawe. Mukoboselieyo.

²Ne omwenelio aaba ne amenyile aleeyi, namwe ewe waaba ne okhamanyile omwenelio tawe, libukule oche nalio engo wowo. Omwenelio ne eecha khulienja, muelesie.

³Waaba ne onyoola epunda, khola orio, akhaba engubo yewe, namwe sisiindu siosi siosi nisio Omuisiraeli wasio atibiisie mala ewe wasinyoola, okhalekha khuyeeta tawe.

⁴“Ne obona epunda yo Muisiraeli wasio namwe ekhaafu yakwile khu ngila, okhalekha khumuyeeta tawe. Muyeete enyosie sisiaayo siewe.

⁵“Babaandu be siikhasi bakhafwara chingubo che babaandu be siseecha tawe namwe babaandu be siseecha bakhafwara chingubo che babaandu be siikhasi tawe. Wele Omunyali Owa Bioosi, Wele wenywe abiila babaandu bakholanga bibiindu nga ebio.

⁶“Ne onyoola siswi sie nyuni khu murongooro namwe asi, ne enyuni eng'ene yakoneele kamaki namwe kamaana, okhaamba maawe ne kamaana tawe.

⁷Onyala wabukula kamaana, ne kakhali okhoya opurusie maawe, nio omenye bulayi lundi nio oyindile.

⁸“Ne wombakha enju embia, khupilakho ererwe obotookhelesie. Nio okhaba ne kumusaango kwe sifuki sio omundu owamakho aakwa afwa tawe.

⁹ “Okhabiaala bumiicho bwe chingano chibili mu mukuunda kwowo kwe kimisabibu tawe. Wakhola orio, biakhulia ebio bioosi bilareerwa ebweeni wa Wele Omunyali Owa Bioosi.

¹⁰“Okhaboa eeyi ne punda khu lichooki lilala chilime tawe.

¹¹“Okhafwara engubo eyakholwa khukhwama khu bufuumbo bwe kamakheese alala nende bwe ngubo eya katani tawe.

¹² “Ruka buusi bukali mala oboe buyenje khu ndulo chine che sisibiimbilo siowo.

¹³“Omundu anyala aakhwa omukhaana abe omukhasi wewe, mala enyuma abisie ali se amwenya tawe.

¹⁴Anyala alomaloma bubi khu mukhaana oyo mala aambie omukhaana oyo chisoni. Anyala aloma ali nakhwa omukhasi yuno, ne kakhali nga aaba naye, omukhaana yuno se aanyoolekha khuuba owe yabwana tawe.

¹⁵“Kaaba kario, raraawe ne maawe bo mukhaana bakhoya bareere simanyisio khu basaakhulu be lukoba asilibwa sisiokesia sili omukhaana aba owe yabwana.

¹⁶Raraawe owo mukhaana alaboolela basaakhulu abo ali: Naelesia omundu yuno omukhaana wase amukhwe abe omukhasi wewe ne luno se amwenya tawe.

¹⁷Omundu yuno alomile ke chisoni khu mukhaana ali, ‘Omukhaana wenywe se aaba owe yabwana tawe.’ Ne kakhali sino nisio sisiekesia sili omukhaana wenywe aaba owe yabwana. Ne balaala chingubo echo ebweeni we basaakhulu be lukoba.

¹⁸Nio basaakhulu be lukoba abo balabukula omuseecha oyo mala bamupe kimikhomwa.

¹⁹Balamuraakho kumuruungo kwe chishekeli bitonyi emia ndala che efwesa mala baelesie raraawe owo mukhaana chirupia echo, sikila omundu oyo areerire chisoni khu mukhaana Muisiraeli. Khutasa khwako, omukhasi oyo, alachiililila khuuba omukhasi wewe, mala mu bulamu bwewe bwoosi se amuoona tawe.

²⁰“Ne kakhali niko omundu oyo aloma kaaba ng'ali, sisiekesia sili omukhaana aba owe yabwana siaaba ne siikhaliio tawe,

²¹babukula omukhasi oyo bamurusie enje we enju eya raraawe, niio babaandu be lukoba olwo balamupila kamabaale bamwire. Akholile sisiindu sie chisoni mu baandu befwe khulwe khukhola bueeyi ne asimenya munju eya raraawe. Mu ngila yino mularusiao bumayaanu akari wenywe.

²²“Omundu aanyoolekha ne alikho akona ne omukhasi wo owasie, boombi bakhoya berwa. Mu ngila yino mularusiao bumayaanu akari wenywe.

²³“Omundu aanyoolekha mu lukoba ne alikho akona ne omukhaana niye omundu okundi akhwele.

²⁴Bombi bakhoya bayilwe enje we lukoba mala bapwe kamabaale bafwe. Omukhaana afwa sikila se aakukuula khulaanga buyeeti tawe, akhaba ne aba mu lukoba. Ne omundu oyo afwa sikila akona ne omukhaana niye owasie aba ne akhwele. Mu ngila yino mularusia bumayaanu akari wenywe.

²⁵“Omundu aakwa khu mukhaana niye omundu okundi akhwele ne bali mundaa, omundu oyo yeng'ene niye owirwa.

²⁶Se siliio silekholekha khu mukhaana tawe, sikila se akholile bumayaanu bubwolaana lifwa tawe. Kumusaango okwo kuli nga kwo mundu owibwaakala omundu okundi mala amwiira.

²⁷Omundu oyo akwile khu mukhaana oyo mundaa, ne akhaba ne akukuulile omundu omuyeeta se abeleo tawe.

²⁸ “Omundu aakwa khu mukhaana owe yabwana mala anyoolekhwa, akhoya

²⁹aruunge raraawe wo mukhaana bitonyi kamakhumi karaano bie fwesa mala omukhaana oyo alaba omukhasi wewe sikila aamukwakho busa ne kamaani mala aamwoonaka. Aba se alimuoona mu bulamu bwewe bwoosi tawe.

³⁰ “Omundu se akhoyeele abukule omukhasi owa raraawe tawe. Akhakonakho nende yesi yesi khu bakhasi ba raraawe tawe.”