Read lubukusu Likh. 23 Bible Online

Likh. 23 - lubukusu bible

Likh. 23

¹“Mbao omundu owalatwa, namwe niye kumubili kwe buseecha kwakhalwa onyala engila mu libuusiana khusaaya Wele Omunyali Owa Bioosi tawe.

²“Mbao omundu oweyasiimba namwe owe lisaaye liewe okhengile mu libuusiana lie babaandu ba Wele Omunyali Owa Bioosi tawe.

³ “Mbao Omuamoni namwe Omumoabu, namwe yesi yesi khu be lisaaye liabwe, akhaba mu selukho eye khumi olingila mu libuusiana lie babaandu ba Wele Omunyali Owa Bioosi tawe.

⁴ Kali kario sikila nibo bamwimana enywe biakhulia ne kameechi nga ne mwaba khu lukeendo ne mwama e Misiri. Lundi baruunga Balamu okhwa Beori khukhwama mu lukoba lwa Petiori mu Mesopotamia khu mulaama enywe.

⁵ Kakhaba kario Wele Omunyali Owa Bioosi, Wele wenywe se aarekeeresia ka Balamu tawe, ne kakhali aakaluukhasia silaamo siaaba chikhabi, sikila aamusiima enywe.

⁶Mukhaenja khuuba ne kumuleembe ne chikholo chino namwe mubenyele buiinda mu bulamu bwenywe bwoosi tawe.

⁷“Mukhabiila Baedomu tawe, bali balebe benywe. Lundi mukhabiila Bamisiri tawe, sikila mwaba baakwa mu sibala siabwe.

⁸Khukhwamila khu selukho eya khataru khuchiililila be lisaaye lie Baedomu ne Bamisiri banyala bengila mu libuusiana lie babaandu ba Wele Omunyali Owa Bioosi.

⁹“Ne muli mu kambi siise sie liie, mukhoya mulobe sisiindu siosi siosi sinyala siamukhola enywe mwaba banyaalu khuloondekhana ne kumwiima.

¹⁰Omundu omunyaalu aaba ne aliio mwinywe sikila eroorere ne ali mu marooro siilo, akhoya arure enje we kambi akhakobola tawe.

¹¹Oli ekolooba esiinge, mala oli enyanga ekwa akobole mu kambi.

¹²“Ba nende abuundu enje we kambi niio babaandu banyala bacha khukhwiyeeta.

¹³Suta lusaala ne bulwaani bwowo. Ne wenya khukhwiyeeta onyala wayaba liloo wachaamo mala ne omalile welilisia.

¹⁴Ekambi yenywe ekhoya ebe endakatifu. Wele Omunyali Owa Bioosi, Wele wenywe akeendangamo khumuonia enywe ne khukhwira basiku benywe. Khola murio nio Wele Omunyali Owa Bioosi akhabona sisiindu siosi siosi sinyaalu sinyala siakila Wele Omunyali Owa Bioosi amufutarira tawe.

¹⁵“Nasioobi aaba ne elukha khukhwama wo mukhulu wewe mala eeche khwiwe omuyeete okhamukobosiayo tawe.

¹⁶Anyala aamenya mu lukoba lwosi lwosi khu ngoba chenywe, nilwo omwene arobore mukhaba bakhalafu khu niye tawe.

¹⁷ “Akhabao omundu yesi yesi munju ya Wele Omunyali Owa Bioosi owe siikhasi namwe owe siseecha okhola bulaaya tawe.

¹⁸Mukhayila chirupia chinyoolekhe khukhwama mu bueeyi namwe che chingila chimayaanu munju ya Wele Omunyali Owa Bioosi tawe. Wele Omunyali Owa Bioosi abiila bikholwa bioombi ebio.

¹⁹ “Ne wikopia chirupia, namwe siakhulia namwe sisiindu sisiindi siosi siosi khu Muisiraeli wasio, okharaakho bukhala tawe.

²⁰Onyala waraakho bukhala khu nibio wikopia baakwa, ne okhakholela orio Omuisiraeli wasio tawe. Khola orio nio Wele Omunyali Owa Bioosi, Wele wowo akhuelesie ewe chikhabi mu buli sisiindu nisio okhola mu sibala nisio olikho ocha khumenya.

²¹ “Ne wichuba khu Wele Omunyali Owa Bioosi, Wele wowo khumukholela sisiindu siosi siosi, okhalekha khukhola nisio wechuba khukhola tawe. Wele Omunyali Owa Bioosi, Wele wowo alenya okhole sisiindu esio sikila khu khwechuba khwowo, mala buli bumayaanu waaba ne okhakhola nga wechuba tawe.

²²Ne waaba ne okhechuba tawe, aba se wakholile bumayaanu tawe.

²³Okhoya okhole nisio oloma oli okhola sikila wamwene wechubile Wele Omunyali Owa Bioosi, Wele wowo.

²⁴“Ne wingila mu liruuti lio wasio lie kimisabibu, onyala walia kamatuunda ke kimisabibu niko wenya. Ne okharaakho liosi liosi mu ndubi tawe.

²⁵Ne wingila mu lusaambu lwe biakhulia lwo wasio, onyala walia biakhulia bioosi bioosi nibio onyala wabuta ne kamakhono kowo, ne kakhali okhabikesakho ne ngeso tawe.