Read lubukusu Likh. 24 Bible Online

Likh. 24 - lubukusu bible

Likh. 24

¹ “Omundu anyala aakhwa omukhasi mala enyuma eulila ali se amwenya tawe, sikila amuboonemo kumwiima nikwo akhasiima tawe. Akhoya aandike chibarwa che khumulekha, amuelesie mala amuoone arure mungo mwewe.

²Ne arurire mungo omwo, anyala aacha khuteekha khu museecha okundi.

³Omuseecha owe khabili oyo yesi anyala alekhe khusiimisibwa ne omukhasi oyo. Yesi aandike chibarwa che khumulekha, amuelesie mala amuoone arure mungo mwewe. Namwe omuseecha wewe owa khabili anyala aafwa.

⁴Omuseecha wewe owe khunyoa se amukobosia lundi tawe, sikila omukhasi oyo abeele omunyaalu. Aaba ne amwiilakho lundi bulaba bumayaanu khu Wele Omunyali Owa Bioosi. Mukhareera bumayaanu buno mu sibala nisio Wele Omunyali Owa Bioosi, Wele wenywe alikho amuelesia khuuba sisienywe tawe.

⁵“Omundu ne ali no mukhasi omwea, akhacha mwiie, namwe akhole kimilimo kikiindi kiosi kiosi tawe alabeelwa, akhakhola kimilimo tawe, khulwe kumwiiko mulala, nio amenye engo asangaasie omukhasi wewe.

⁶“Ne wikopia omundu sisiindu, okhabukula lususi lwewe nilwo arumikhirangakho khusia tawe, sikila aba alikho aruunga bulamu bwewe.

⁷ Omundu aanyoolekha ne eeba Omuisiraeli wasie eelukha naye mala aamukhola nasioobi wewe namwe aamukusia mu bunasioobi, omundu oyo akhoya eerwe. Mu ngila yino mularusiao bumayaanu akari wenywe.

⁸ “Omundu ne alwala bulwaale bwe kamakele, akhoya abe omurekeerefu khukhola bulayi bwene nga basaayi balawi ne balimwekesia. Balimwekesia nga ese ne nabalaka.

⁹ Khebulila niko Wele Omunyali Owa Bioosi, Wele wenywe akhola Miriamu nga ne mwaba ne mwama e Misiri.

¹⁰ “Ne wikopia owasio sisiindu, okhacha munju mwewe wabukula sisiindu sie khuambiilila likobi liewe tawe.

¹¹Lindila enje mala olekhe omwene akhureerere sie khuambiilila.

¹²Aaba ne ali omutaambi okhasibiikha siilo sioosi tawe.

¹³Mukoboselie buli ekolooba nio ebiimbe akone liilo mala alakhubiita chikhabi. Ne niko okholile ako kalaba kamaluungi ebweeni wa Wele Omunyali Owa Bioosi, Wele wowo.

¹⁴ “Okhamiina omukholi omutaabi lundi ooli omubanani mu khumuelesia kumuruungo kwewe tawe, akhaba ne ali Omuisiraeli wasio namwe omukwa omenyile mu lukoba lulalakho khu ngoba chenywe.

¹⁵Buli endaalo enyanga ne siili khukwa tawe, muruunge khulwe kimilimo kie ndaalo eyo. Sikila ali omutaambi mala chinganakani chewe choosi chili khu rupia echo. Khola orio ne busa akhola ario aalilila Wele Omunyali Owa Bioosi mala ewe onyoolekhe khuuba omumayaanu.

¹⁶ “Bapaapa se beerwa khulwe bumayaanu bwe babaana babwe tawe, ne babaana nabo se beerwa khulwe bumayaanu bwe bapaapa tawe. Buli mundu aleerwa khulwe bumayaanu bwewe.

¹⁷ “Okhatiimia bung'ali bwe bakwa ne bafuubi tawe, lundi okhabukula sisibiimbilo sia namulekhwa nga sie khuambiilila kumuruungo tawe.

¹⁸Khebulila muli enywe mwaba banasioobi mu Misiri mala Wele Omunyali Owa Bioosi, Wele wenywe amusikula khukhwama ebweeneyo. Khwako mulaka enywe mukhole lino.

¹⁹“Ne okesa biakhulia biowo khukhwama mu mukuunda mala wibilile bilala nibio okesile, okhakobolayo wabibukula tawe. Bili bie baakwa, bafuubi, nende banamulekhwa. Khola orio nio Wele Omunyali Owa Bioosi, Wele wowo akhuelesie chikhabi mu buli siindu nisio okhola.

²⁰Ne obuta kamatuunda ke kumuseituni, okhakobolayo wabuta kasikalekho tawe, kali ke baakwa, bafuubi nende banamulekhwa.

²¹ Ne obuusia kamatuunda ke kumusabibu, okhakobolayo khu bisina lukhola khabili tawe, kamatuunda ke kimisabibu kasikalekho kali ke baakwa, bafuubi nende banamulekhwa.

²²Khebulila muli enywe mwaba banasioobi mu Misiri, khwako ese mulaka enywe, mukhole lino.”