Read lubukusu Likh. 25 Bible Online

Likh. 25 - lubukusu bible

Likh. 25

¹“Baisiraeli babili banyala baaba ne bulomani mala baacha mu koti. Omukhalaki anyala abisia akari wo oyo owe bumayaanu nende ooli ne kumusaango.

²Omundu aaba owe kumusaango ne akhalakilwe bukhupe, omukhalaki alamwalisia mafumala mala bamupe biboko omukhalaki ne aloleleele. Akhoya anyoole bukali bwe bukhupe khuloondekhana ne kamakhiikha niko akholile.

³ Akhoya aebwe biboko bibioola kamakhumi kane, ne se bibira ao tawe. Khubisia ao khukhila owasio afwocholwa mu baandu.

⁴ “Okhaboa eeyi emunwa ne olikho okirumikhira khuula biakhulia tawe.

⁵ “Babaandu babili wandaaye ne wandaaye ne bamenya alala, mala mulala khu nibo afwe ne akhasaala omwana omusoleeli tawe, nono namulekhwa wewe se alateekha khu mundu okundi busa okhali owe nju eyo tawe. Mulamue akhoya abukule namulekhwa oyo nga omukhasi wewe mala akhole kimilimo kia wandaaye.

⁶Omwana owe sisoleeli omubele niye balasaala alatiuukhwa lisina lia raraawe owafwa, nio lisaaye liewe lichiililile mu Isiraeli.

⁷ Ne wandaaye woyo owafwa ne akhenya khukobosia mulamue tawe, namulekhwa oyo alacha khu bemeelesi be lukoba asilibwa mala alome ali, ‘Mulamwa se eenya lisina lia wandaaye lichiililile mu Isiraeli tawe. Se eenya khukholela ese kimilimo nikio wandaaye aakholanga tawe.’

⁸Babemeelesi be lukoba balalaanga omundu oyo mala balomalome naye. Aaba ne asiloba khukobosia namulekhwa,

⁹namulekhwa oyo alamuchaakho ebweeni we babemeelesi be lukoba, amufuule siraaro silala, amufuuche mu moni mala alome ali, ‘Kano niko kakekholekha khu mundu okhenya lisaaye lia wandaaye lichiililile tawe.’

¹⁰Enju yewe elamanyikha mu Isiraeli nga, ‘Enju yo mundu owafuulwa siraaro.’ ”

¹¹“Babaandu babili baaba ne balikho bapana mala omukhasi owa mulala khu nibo aakhaka khuyeeta omuseecha wewe khulwe khukhala omundu okundi oyo kumubili,

¹²okhamukholela siisa tawe mukhale kumukhono.

¹³ “Okhaba ne bipiimilo bibili mulolooti yowo, sibalaayi ne sitiiti tawe.

¹⁴Okhaba ne bikelo bibili munju mwowo, sibalaayi ne sitiiti tawe.

¹⁵Rumikhira sipiimilo ne sikelo sisienyekha lundi sia ng'ali, nio omenye kimiiko kimikali mu sibala nisio Wele Omunyali Owa Bioosi, Wele wowo alikho akhuelesia ewe.

¹⁶Wele Omunyali Owa Bioosi abiila babaandu babeanga ne bakhola bibiindu nga ebio.

¹⁷ “Khebulila niko Baameleki bamukholela enywe nga mwaba ne mwama Misiri.

¹⁸Se baba ne buuri khu Wele tawe. Bamuloondakho bamwibwaakala khu lukeendo nga ne mwaba ne mulwiile mala beera balala mwinywe ba baba enyuma.

¹⁹Khwako, Wele Omunyali Owa Bioosi, Wele wenywe acha khumuelesia sibala mala amukhole mwingilemo sibe sisienywe. Alamuelesia kumuleembe. Basiku bamenyile siimbi nanywe se balaba butinyu khwinywe tawe. Ne amalile khukhola ario, yiira Baameleki boosi, nio akhabao olibakhebulila lundi tawe. Mukhebilila lino tawe.