Read lubukusu Likh. 26 Bible Online

Likh. 26 - lubukusu bible

Likh. 26

¹“Mulengisia sibala nisio Wele Omunyali Owa Bioosi, Wele wenywe alikho amuelesia sibe sisienywe mala mu sibukule ne khu simenyamo. Ne mumalile murio,

² buli mulala khwinywe akhoya abiikhe mu sikono sitonyi sie khunyoa sia buli sibiaalwa nisio akesile khukhwama mu sibala nisio Wele Omunyali Owa Bioosi, Wele wenywe alikho amuelesia enywe mala ache nabio abuundu aaroborwa e khusaaya.

³Ache khu musaayi ooli omwimeelesi siise esio mala omuboolele ali, ‘Ese luno fukiilila ebweeni wa Wele Omunyali Owa Bioosi, Wele wowo ndi nengile mu sibala nisio niye asuubisia bakuuka befwe ali akhakhuelesie efwe.’

⁴“Omusaayi alakaanila sikono mala asire ebweeni wa alutare ya Wele Omunyali Owa Bioosi, Wele wowo.

⁵Ne ewe mu moni cha Wele Omunyali Owa Bioosi, Wele wowo olakobolela mu makhuwa kano: ‘Kuuka wase aba omuuyauyi busa, Omuaramu. Acha ne be nju yewe batiiti busa mala ebweeneyo baaba ekholo emboofu eye kamaani lundi eye babaandu bakali.

⁶Bamisiri bakhukholela efwe kamabi, bakhunaania mala bakhuyingilila khwakhola kimilimo nga banasioobi.

⁷Nio khwalilila Wele Omunyali Owa Bioosi, Wele we bakuuka befwe akhuyeete efwe. Wele Omunyali Owa Bioosi aaulila khulila khwefwe aabona khunaanisibwa, khwefwe, kimilimo ne bumiinikhi nibwo khwabamo.

⁸Nio aakhurusia efwe e Misiri ne bunyali bwewe bukali ne kamaani. Aakhola kamayia, kamakhuwa ke khuukia nende, bibiindu biriisia.

⁹Akhureera efwe ano mala akhuelesia efwe sibala sino nisio kamabeele ne bubuukhi biseleetekhanga.

¹⁰Nio, luno Wele Omunyali Owa Bioosi ese ndikho khureerera ewe sitonyi sie khunyoa sie likesa nilio wambelesie.’ “Olara asi sikono ebweeni wa Wele Omunyali Owa Bioosi, Wele wowo mala omusaayileo.

¹¹Lundi okhoya wekhoyele bibiindu bilayi bioosi nibio Wele Omunyali Owa Bioosi, Wele wowo akhuelesie ewe nende be nju yowo, Balawi nende baakwa nibo omenyile nabo.

¹² “Buli mwiiko kwa khataru aana silala khwikhumi sie bibiaamo biowo khu Balawi, baakwa, bafuubi, nende banamulekhwa, nio buli niio bamenya babe ne bibiindu bioosi nibio benya khulia. Okwo kuli kumwiiko kwa silala khwikhumi. Nga ne omala khukhola lino,

¹³boolela Wele Omunyali Owa Bioosi, Wele wowo oli, ‘Narusiisie sitonyi sitakatifu khukhwama munju mwase. Nasiieleesie khu Balawi, baakwa, bafuubi, nende banamulekhwa, khuloondekhana ne lilaka liowo. Se nabeele omureengu namwe se nebiliile liosi liosi khu malaka kowo ka silala khwikhumi tawe.

¹⁴Se naliile silala khwikhumi ne ndi mu masika namwe nga nabeele omunyaalu tawe. Se naanile silala khwikhumi nga esaka khulwo omufu tawe. Nariire lilaka liowo, Wele Omunyali Owa Bioosi, Wele wase, mala nakhola khuloondekhana nende koosi niko ewe wandaka khukhola.

¹⁵Ne oli abuundu wowo atakatifu mwikulu, lola asi, mala obiite babaandu bowo Isiraeli chikhabi, biita chikhabi akhaba sibala nisio kamabeele ne bubuukhi biseleetekhanga nisio wakhuelesie efwe, nga ne wasuubisia bakuuka befwe.’

¹⁶“Endaalo yino Wele Omunyali Owa Bioosi, Wele wenywe alikho amulaka murie kamalaka koosi. Khwako, ba barekerefu mukarie ne kumwoyo kwenywe kwoosi ne liiba lienywe.

¹⁷Endaalo yino wafukiiliile oli Wele Omunyali Owa Bioosi ali Wele wowo, lundi wafukiiliile oli olamuria, ne khuloonda kamalaka kewe koosi, ne khukhola koosi niko alaka.

¹⁸ Endaalo yino Wele Omunyali Owa Bioosi amufukiilile enywe nga babaandu bewe, nga ne aamusuubisia enywe, mala aamulaka murie kamalaka kewe koosi.

¹⁹Alamukhola enywe mube bakali khukhila ekholo ekiindi yosi yosi niyo aabuumba. Alakhola ario khulwe efuma[12] ne lukoosi ne luyali khu lisina liewe. Mulaba ekholo endakatifu khu Wele Omunyali Owa Bioosi, Wele wenywe nga ne aamulaka.”