Read lubukusu Likh. 27 Bible Online

Likh. 27 - lubukusu bible

Likh. 27

¹Nono Musa alala ne babemeelesi ba Isiraeli, balaka babaandu bali, “Ria kamalaka koosi niko ese ndikho muelesia enywe endaalo yino.

² Khu ndaalo niyo mwambukhilakho luluuchi lwa Yoritani mala mwingile mu sibala nisio Wele Omunyali Owa Bioosi, Wele wenywe alikho amuelesia enywe, mularaao kamabaale kamabalaayi mala mukaakhe luloongo.

³Mukhaandikekho kamalaka kano koosi. Wele Omunyali Owa Bioosi, Wele we bakuuka benywe alikho amuelesia enywe sibala nisio kamabeele ne bubuukhi biseleetikhanga nga ne aamusuubisia enywe.

⁴Ne mumalile khukhwambukha luluuchi lwa Yoritani, yimisia kamabaale kano khu sikulu sia Ebali, nga ese ne ndikho mulaka endaalo yino mala muakhekho luloongo.

⁵ Ebweeneyo mukhombakheyo alutare eye kamabaale khulwa Wele Omunyali Owa Bioosi, Wele wenywe. Alutare eyo ekharwakho sichuuma siosi siosi tawe.

⁶Alutare yosi yosi niyo muliombakhila Wele Omunyali Owa Bioosi, Wele wenywe ekhoya yombakhilwe kamabaale kakhabeechwa tawe. Khubwenokhwo mukhaanilekho biianwa bie khukhwosia khu Wele Omunyali Owa Bioosi, Wele wenywe.

⁷Lundi mukhaanilekho chimbosio che kumuleembe mala muliileo. Ebweeneyo mukhekhoye ebweeni wa Wele Omunyali Owa Bioosi, Wele wenywe.

⁸Khu mabaale kakaakhwakho luloongo ako, andikakho kamalaka koosi karuriirikhe bulayi.”

⁹Musa, ne basaayi Balawi baboolela babaandu ba Isiraeli boosi bali, “Isiraeli sila, mala mundekeeresie. Endaalo yino enywe mwabeele babaandu ba Wele Omunyali Owa Bioosi, Wele wenywe.

¹⁰Khwako khe mumurie mala muliinde kamalaka kewe koosi niko ese ndikho muelesia enywe endaalo yino.”

¹¹Endaalo eyo eng'ene Musa aboolela babaandu ba Isiraeli ali,

¹² “Enywe ne mwambuukhe luluuchi lwa Yoritani, chikholo chino chileema khu sikulu sia Kerisimu khulwe khumubiita chikhabi. Chikholo cha Simioni, Lawi, Yuda, Isakari, Yosefu ne Benjamini.

¹³Ne chikholo chino chileema khu sikulu sia Ebali khulwe khulaama: Rubeni, Kati, Asheri, Sebuluni, Dani ne Nafutali.

¹⁴Balawi balaboolela babaandu kamakhuwa kano ne kumumilo kuuliilikhana:

¹⁵ Omundu yesi yesi okhola sifwaani sie libaale, namwe sie kumurongooro, namwe sie siibia mala asisimikhe mu bwikisi alaamwe.” Ne babaandu boosi balikobosia bali “Kabe kario.”

¹⁶ “Omundu yesi yesi okharia maawe namwe raraawe tawe alaamwe.” Ne babaandu boosi balikobosia bali “Kabe kario.”

¹⁷ “Omundu yesi yesi osendia lulwakha lwo owasie alaamwe.” Ne babaandu boosi balikobosia bali “Kabe kario.”

¹⁸ “Omundu yesi yesi otiimia omubofu khu lukeendo lwewe alaamwe.” Ne babaandu boosi balikobosia bali, “Kabe kario.”

¹⁹ “Omundu yesi yesi otiimia bung'ali bwo omukwa, omufuubi ne namulekhwa alaamwe.” Ne babaandu boosi balikobosia bali, “Kabe kario.”

²⁰ “Omundu yesi yesi okona nende mukha raraawe alaamwe sikila aba aambiisie raraawe chisoni.”[13] Ne babaandu boosi balikobosia bali, “Kabe kario.”

²¹ “Omundu yesi yesi okona ne esaang'i alaamwe.” Ne babaandu boosi balikobosia bali, “Kabe kario.”

²² “Omundu yesi yesi okona ne wandaaye omukhaana, abeele omwana owa raraawe namwe owa maawe alaamwe.” Ne babaandu boosi balikobosia bali, “Kabe kario.”

²³ “Omundu yesi yesi okona ne masalaawe alaamwe.” Ne babaandu boosi balikobosia bali, “Kabe kario.”

²⁴“Omundu yesi yesi owira owasie mu bwikisi alaamwe.” Ne babaandu boosi balikobosia bali, “Kabe kario.”

²⁵“Omundu yesi yesi ofukiilila asoya khukhwira omundu okhali ne bubi tawe alaamwe.” Ne babaandu boosi balikobosia bali, “Kabe kario.”

²⁶ “Omundu yesi yesi okharia mala akhola nga kamalaka kano ne kaloma tawe alaamwe.” Ne babaandu boosi balikobosia bali, “Kabe kario.”