Read lubukusu Likh. 28 Bible Online

Likh. 28 - lubukusu bible

Likh. 28

¹ “Mwaaba ne muria Wele Omunyali Owa Bioosi, Wele wenywe ne khuuba barekerefu mu malaka kewe koosi niko ese ndikho muelesia enywe endaalo yino, alamukhola mube ne bunyali khu kholo chichiindi choosi khu sibala.

²Ria Wele Omunyali Owa Bioosi, Wele wenywe mala chikhabi chino choosi chilaba chichenywe:

³“Wele Omunyali Owa Bioosi alabiita chikhabi chingoba chenywe ne kimikuunda kienywe.

⁴“Wele Omunyali Owa Bioosi alamubiita enywe chikhabi musaale babaana bakali munyoole biakhulia bikali, chikhaafu chingali ne bibiaayo bikali.

⁵“Wele Omunyali Owa Bioosi alabiita chikhabi bibiaalwa bienywe nende biakhulia nibio mwamiamo bioosi.

⁶“Alamubiita enywe chikhabi mu buli siindu nisio mukhola.

⁷“Basiku benywe ne bamwibwaakala enywe, Wele Omunyali Owa Bioosi akhabakhole bakhilwe. Ne becha khumwibwaakala enywe balechela khu ngila ndala ne kakhali bakhelukhile khu ngila saba.

⁸“Wele Omunyali Owa Bioosi akhabiite chikhabi bibiaaki bienywe ne khubiita chikhabi kimilimo kienywe kioosi. Alamubiita enywe chikhabi mu sibala nisio alikho amuelesia khuuba sisienywe.

⁹“Wele Omunyali Owa Bioosi akhamukhole enywe mube ekholo endakatifu nga ne aamusuubisia enywe. Alakhola ario mwaba ne muria kamalaka kewe ne khuloonda koosi niko amulaka.

¹⁰Ne chikholo choosi che sibala chilabona chili enywe muli babaandu ba Wele Omunyali Owa Bioosi mala chilamuria enywe.

¹¹Wele Omunyali Owa Bioosi alamuelesia enywe babaana bakali, chikhaafu chingali ne bibiaamo bikali lukali mu sibala nisio aasuubisia bakuuka benywe ali akhamuelesie enywe.

¹²Alareera efula mu siise sisienyekha khukhwama mu ngaaki, mala abiite chikhabi kimilimo kienywe kioosi. Enywe mulekopia chikholo chichiindi ne kakhali enywe se mulekopa khukhwama khu kholo yosi yosi tawe.

¹³Wele Omunyali Owa Bioosi, Wele wenywe alamukhola enywe mube nga babemeelesi ne se muliba baloondi tawe, buli lwosi mulaba angaaki we chikholo chichiindi. Kaliba kario mwaba barekerefu mu khuria kamalaka niko ndikho muelesia enywe endaalo yino.

¹⁴Ne mukhalekha kamalaka niko ndikho muelesia endaalo yino mala mwasaaya ne khukholela bawele babaandi tawe.

¹⁵“Ne kakhali mwaba be sileka khu Wele Omunyali Owa Bioosi, Wele wenywe namwe mulekhe khuuba barekerefu mu khuria kamalaka koosi niko ese ndikho muelesia enywe endaalo yino, aba bilaamo bino bioosi bilamwichakho.

¹⁶“Wele Omunyali Owa Bioosi alalaama chingoba chenywe ne kimikuunda kienywe.

¹⁷“Wele Omunyali Owa Bioosi alalaama bibiaalila bienywe nende biakhulia nibio mwamiamo.

¹⁸“Lisaaye lienywe lilalaamwa, alala ne bibiaamo bienywe ne chikhaafu ne kamakheese.

¹⁹“Mulalaamwa mu buli siindu nisio mukhola.

²⁰“Mwaaba ne mukhola kamabi ne mulekha Wele Omunyali Owa Bioosi, Wele Omunyali Owa Bioosi alamureerera bilaamo, likoyaana ne changalaalo, buli mu siindu nisio mukhola khukhwola nga ne mulabunisibwa khangu.

²¹Alareerao lufu khukhwola nga lulamumala enywe mweesi, se akhabeo okharame mu sibala nimwo muli siimbi khucha tawe.

²²Wele Omunyali Owa Bioosi, alareera lufu lwe khuambisiana, ne kamabiimba ne kamaima, siimiyu ne khuungu eye khukhwoomia yonake bibiaamo bienywe. Kamaraba kano kalaba ne nanywe nabwila mufwa.

²³Efula se likwa tawe ne kamaloba kenywe kaloma kaandalale nga sichuuma.

²⁴Mu bweyaangu bwe efula Wele Omunyali Owa Bioosi alareera lutamuusi lukali ne khuungu engali elimo kumuyekhe nabwila mulabuna.

²⁵“Wele Omunyali Owa Bioosi alakhola basiku benywe bamuule enywe. Mulichila khu ngila ndala ne mulikho mucha khubebwaakala ne kakhali mukhelukhile khu ngila saba mala chikholo che khu sibala chikhareenge sikila kamwekholekha khwinywe.

²⁶Ne mufwa, kimibili kienywe kikhabe siakhulia sie chinyuni ne chisaang'i. Ne se alabao omundu olachioona tawe.

²⁷Wele Omunyali Owa Bioosi alareera kamabiimba khwinywe nga ne aakhola khu Bamisiri. Alakhola kimibili kienywe kibe ne kamaboondo, kimibili kienywe kilechulakho chingooso, muleyakalaka ne se mulaona tawe.

²⁸Wele Omunyali Owa Bioosi alamukhola enywe mukwe kamalalu, lundi mubofule mala mukoyaane mu bwongo.

²⁹Mulaabaasia busa eyi neyi kumuusi nga babofu mala mulatiimatiima busa, se mulanyoola chingila tawe. Mulamiinwa ne khunuulwa buli lwosi se alabao omundu akhaba mulala olamuyeeta enywe tawe.

³⁰“Mwinywe omundu alikhwa omukhasi mala omundu okundi niye olamubukula abe omukhasi wewe. Olombakha enju, ne se olamenyamo tawe. Olabiaala kimisabibu mwiruuti ne se olaliakho kamatuunda ke kimisabibu tawe.

³¹Chikhaafu chowo chilakhoonyelwa ebweeni wowo, ne se olaliaakho enyama yosi yosi tawe. Chipunda chowo chilakhuruurwa chibukulwe ne ololeleele ne se balakhukoboselia tawe. Kamakheese kowo kalaelesibwa khu basiku bowo ne se alabao omundu akhaba mulala olakhuyeeta ewe tawe.

³²Babaana bowo basoleeli ne bakhaana balaanwa nga banasioobi khu baakwa ewe ne ololeleele. Buli ndaalo olaluiilila chimoni chowo ne olindiilila oli wakana babaana bowo balakalukha.

³³Ekholo engeni elabukula bibiaamo biowo bioosi bie mu mukuunda kwowo ne kimilimo kiowo. Okhapisibwe siibi ne khukhwomwa mu bulamu bwowo bwoosi.

³⁴Nibio obona bilakhulalusia.

³⁵Wele Omunyali Owa Bioosi alaelesia bikele biowo ne kamasikamo kamaboondo kamarafu kakhanyala kaona tawe. Kamabiimba kalakhwichulakho khukhwama khu murwe khukhwola khu siikhandakilo.

³⁶“Wele Omunyali Owa Bioosi alamubukula enywe nende omwami wenywe niye mwarobora amuyile mu sibala sikeni nisio enywe namwe bakuuka benywe mukhamanya tawe. Ebweeneyo mulakholela bawele ba babeechwa khukhwama khu mirongooro nende khu mabaale.

³⁷Mu bibala nimwo Wele Omunyali Owa Bioosi akhamusalanisiemo, babaandu bakhesiindukhe sikila sisiikholeekhe khwinywe. Mukhabe lusimo lundi be khuchekheelelwa.

³⁸“Mulamiicha bumiicho bukali ne mulakesa busa bikeekhe, sikila chisike chilalia bibiaamo bienywe.

³⁹Mulabiaala kimisabibu mu mikuunda kienywe mala mukiliinde, ne kakhali se mulanywa endali namwe mulie kamatuunda ke kimisabibu tawe, sikila biisa bilalia chisakia.

⁴⁰Mukhabiaale kimiseituni buli abuundu mu sibala sienywe ne kakhali se mukhanyoolekho kamafura ke kimiseituni tawe, sikila chiseituni chilakhukhumukha asi ne chisiili chimbisi.

⁴¹Mulasaala babaana basoleeli ne bakhaana mulabatibia sikila balayilwa nga mu mbaambe eye liie.

⁴²Kimirongooro kienywe kioosi ne bibiaamo bilaliibwa ne chisike.

⁴³“Baakwa bamenyile mu sibala sienywe balanyoola bunyali buli lwosi, ne kakhali enywe mulaboombelelwa bunyali buli lwosi.

⁴⁴Balaba ne chirupia che khumwekopia enywe ne kakhali enywe se mulaba ne chirupia che khubekopia nibo tawe. Ekhumaliilikha balamwamiia enywe.

⁴⁵“Bilaamo bino bioosi bilamwichakho, mala bilaba khwinywe nanywe khukhwola nga ne mubuna, sikila se mwaria Wele Omunyali Owa Bioosi, Wele wenywe ne khuliinda kamalaka niko aamuelesia enywe tawe.

⁴⁶Bino bikhekesie bukhalaki bwa Wele khwinywe ne khu lisaaye lienywe mindali na mindali.

⁴⁷Kalaba kario sikila aba se mwakholeele Wele Omunyali Owa Bioosi, Wele wenywe mu liekhoya ne busangaafu tawe, aakhaba ne mwabeele nende buli siindu.

⁴⁸Khwako, mulakholela basiku benywe nibo Wele Omunyali Owa Bioosi alikho acha khuruma beche mwinywe. Mulaba ne njala, bulesia ne sichula, mulataamba buli siindu. Balamurakho lichooki lie sichuuma khukhwola nga ne mubunila elala.

⁴⁹Wele Omunyali Owa Bioosi alalekhuula ekholo khukhwama aleeyi, ekholo eye lulomo nilwo enywe mukhamanyile tawe. Balamwichamo khangu nga efuruusi.

⁵⁰Bali barafu lundi se balaba ne siisa khu mundu yesi yesi omuele namwe omusaakhulu tawe.

⁵¹Balalia chikhaafu chenywe ne bibiaamo mala enywe mufwe njala. Se balamulekhela enywe siakhulia siosi siosi, endali, kamafura ke chiseituni, chikhaafu namwe kamakheese tawe, khukhwola nga enywe ne mubuna.

⁵²Chikholo chino chiliibwaakala buli lukoba mu sibala nisio Wele Omunyali Owa Bioosi, Wele wenywe alikho amuelesia enywe. Chingoba chichabotookhelesibwa ne kamasiisi kamaleeyi mu nicho mwasuubilamo chilakwa.

⁵³“Ne enywe mukhalie babaana benywe babeene nibo musaala, basoleeli ne bakhaana nibo Wele Omunyali Owa Bioosi, Wele wenywe aamuelesia mulakhola murio nga basiku benywe ne balamwibuulila ne busulunyu nibwo mulabamo.

⁵⁴Akhaba omundu we lukoosi lukali lundi owasaalwa khu luuya lwe bubwami yesi alemana wandaaye ne omukhasi wewe omwene niye asiima ne babaana bewe siakhulia.

⁵⁵Se akhaelesiekho yesi yesi khu nibo, enyama yosi yosi eye babaana bewe nibo alikho alia tawe, sikila se ali ne sisiindu sisikaale tawe, mukhwibuulila ne mu siibi nisio basiku benywe balamupisia enywe mu ngoba chenywe.

⁵⁶Omukhasi omukoosi lukali lundi owasaalwa khu luuya lwe babaami mwinywe okhaswalanga siikhandakilo siewe asi tawe sikila ali omukoosi lukali yesi akhabe ne chinge nga omusaakhulu wewe.

⁵⁷ Nga basiku ne bakhebuulile lukoba lwewe akhabe ne njala lukali mala eenye siakhulia ne enyuma akhalie mu bwikisi omwana niye asaalile ne ngobi, omuseecha wewe niye asiima namwe babaana bewe se bakhamanyekho tawe.

⁵⁸“Mwaaba ne mukharia mu busuubilifu kamalaka kano koosi kakaandikwa mu sitabu sino tawe, mwaba ne mukharia lisina lia Wele Omunyali Owa Bioosi, Wele wenywe tawe,

⁵⁹Wele Omunyali Owa Bioosi alamureerera enywe ne babaana benywe kiminaanio kie khuukia, kimirafu mala kia mindali alala ne bulwaale bubi bwa mindali.

⁶⁰Lundi alamureerera enywe buli bulwaale bubi nibwo mwabona mu Misiri ne se mulaona tawe.

⁶¹Lundi akhamureerere enywe bulwaale chingano choosi ne kiminaanio kikhaandikwa mu sitabu sie kamalaka sino tawe. Wele Omunyali Owa Bioosi akhamukholele enywe ario khukhwola nga mubuna.

⁶²Aakhaba ne muli bakali nga ching'enieesi, bakeekhe mwinywe bong'ene bakhaone, sikila mwaba barengu khu Wele Omunyali Owa Bioosi, Wele wenywe.

⁶³Nga Wele Omunyali Owa Bioosi ne asangaalila khumukhola enywe muindiaale ne khumukhola enywe mutasikhe, akhasangaalile ario khumureerera enywe butinyu ne khumubunia. Mukharusibwe mu sibala nisio muli siimbi khwingisia.

⁶⁴“Wele Omunyali Owa Bioosi alamusalanisia enywe mu kholo choosi che mu sibala buli abuundu mala ebweeneyo mulakholela bawele ba babeechwa khukhwama khu mirongooro ne khu mabaale, wele nibo enywe namwe bakuukawenywe abeele bakhasaayanga tawe.

⁶⁵Se mulinyoola kumuleembe abuundu osi osi mu kholo chino tawe. Ne kakhali Wele Omunyali Owa Bioosi akhare mwinywe liliembeelela, chisoni ne khufwa kumwoyo.

⁶⁶Buli lwosi bulamu bwenywe bukhabe mu butinyu. Kumuusi ne siilo mukhabe ne buuri bukali lukali, lundi buli lwosi mulamenya mu buuri bwe lifwa.

⁶⁷Buli siindu nisio mubona, kimiooyo kienywe kikhaape lukali. Buli mutikhinyi mukhekoombenge muli andi ebeele ekolooba, buli ekolooba mwikoomba muli andi kubeele kumutikhinyi.

⁶⁸Wele Omunyali Owa Bioosi alamukoboselia enywe mu meeli e Misiri aakhaba ne aaloma ali se mulikobolayo tawe. Ebweeneyo mukhakhake khukhwekusia khu basiku nga banasioobi, ne kakhali se akhabeeo okheenye khumukula enywe tawe.”