Read lubukusu Likh. 29 Bible Online

Likh. 29 - lubukusu bible

Likh. 29

¹Kano niko kamakhuwa ke ndakaano niyo Wele Omunyali Owa Bioosi aalaka Musa akhole ne babaandu ba Isiraeli mu sibala sia Moabu. Endakaano yino yaba khutasa khu niyo aakhola nabo a sikulu sia Sinai.

²Musa aalaanga alala babaandu ba Isiraeli boosi mala aababoolela ali, “Mwabeene mwabona koosi niko Wele Omunyali Owa Bioosi aakhola khu Farao, omwami owe Misiri, ne bakholi bewe ne khu sibala sioosi ebweeni wenywe.

³Mwabona kamakhako, kamaya, nende bie khuukia biboofu nibio Wele Omunyali Owa Bioosi aakhola.

⁴Ne khukhwola khu ndaalo yino Wele Omunyali Owa Bioosi akhamuelesia enywe limanya, libona namwe liiulila tawe.

⁵Khu miiko kamakhumi kane ese namwimeelela mwabira mu sichiimi, ne kakhali chingubo chenywe se chatabuukhe tawe, namwe biraaro bienywe se biatabuukhe tawe.

⁶Se mwalia siakhulia namwe mwanywa endali namwe kamalwa tawe. Kaba kario nio enywe mumanye muli Wele Omunyali Owa Bioosi, ali Wele wenywe.

⁷Ne kakhali efwe nga khwola abuundu ano, omwami Sihoni owa Heshiboni ne omwami Oku owa Bashani barura bakhwibwaakala efwe, mala efwe khwabaula.

⁸ Khwabukula sibala siabwe, mala khwasikaba chikholo cha Rubeni, Kati nende balala khu kholo eya Manase.

⁹Khwako ba barekerefu khukhola koosi kaali mu ndakaano yino nio muindiaale.

¹⁰“Endaalo yino enywe mweesi mwemile ebweeni wa Wele Omunyali Owa Bioosi, Wele wenywe. Babemeelesi benywe ne basaakhulu ne banamae bakhulu babaandu be siseecha boosi.

¹¹Aakhaba bakhasi, nende babaana ne baakwa bamenyile mwinywe, nende bamwasakilanga enywe chiikhu ne khumusutila kameechi bosi bali ano.

¹²Mweesi muli ano endaalo yino, khukhola endakaano ne Wele Omunyali Owa Bioosi, Wele wefwe, niyo alikho akhola ne nanywe.

¹³Wele Omunyali Owa Bioosi eenya amukhole enywe luno khuuba babaandu bewe, alaba Wele wenywe, nga ne aamusuubisia enywe nende bakuuka benywe, Aburahamu, Isaaka ne Yakobo.

¹⁴Wele Omunyali Owa Bioosi se alikho akhola endakaano eye liliechuba yino ne nanywe mweng'ene tawe.

¹⁵Alikho akhola ne nafwe fweesi khukhwimile ano ebweeni wewe, endaalo yino akhaba nende be lisaaye liefwe bakhasaalwa tawe.

¹⁶“Enywe mumanyile nga ne khwamenya mu Misiri, lundi nga ne khwabira mu sibala sie chikholo chichiindi.

¹⁷Mwabona bifwaani biabwe bie khusinya bibiakholwa khukhwama khu mirongooro, kamabaale, efwesa nende esahabu.

¹⁸Ba burekeerefu nio akhabao omundu owe siseecha namwe owe siikhasi, be munju yosi yosi namwe ekholo eyimile ano endaalo yino olekelesia Wele Omunyali Owa Bioosi, Wele wefwe mala ache akholele bawele be chikholo chichiindi tawe. Kano kaliba nga lusia lwe kumurongooro kukhula kube simelwa silulu lundi sie bufwisi.

¹⁹Omundu akhabao endaalo yino olikho oulila kamakhuwa ke endakaano eye liliechuba yino mala ebiite omwene chikhabi ne aloma ali, ‘Ndaba busa bulayi nakhakhola sileka.’ Lilienelio lilamubunia enywe mweesi, balayi ne baabi sitube.

²⁰Wele Omunyali Owa Bioosi se alabeela omundu nga oyo ario tawe. Ne kakhali lirima lia Wele Omunyali Owa Bioosi ne likhendekha bilamuburukhirakho, mala bilaamo bioosi bibiaandikwa mu sitabu sino bilamwichakho nabwila Wele Omunyali Owa Bioosi alamubunisila enywe elala.

²¹Wele Omunyali Owa Bioosi alamukhola niye abe silolelo ebweeni we chikholo choosi cha Isiraeli. Kakhekholekhe kario khuloondekhana ne bilaamo bioosi bie endakaano bibiaandikwa mu sitabu sie kamalaka sino.

²²“Mu selukho eyiicha, lisaaye lienywe enyuma wenywe ne baakwa khukhwama mu bibala bie aleeyi balibona butinyu ne bulwaale nibwo Wele Omunyali Owa Bioosi areerire mu sibala sienywe.

²³ Kimikuunda kiliba bitalalie bikhasaala bibiaamo tawe, kikhafuunikhwe ne kumulilo nende chumbe se siliio silibiaalwa tawe. Aakhaba enyoonyi se limelamo tawe. Sibala sienywe sikhabe busa nga chingoba cha Sodomu ne Komora nende Atima ne Seboimu nicho Wele Omunyali Owa Bioosi abunia nga ne aba ne akhalala lukali.

²⁴Chikholo choosi chilireeba chili, ‘Siina sikila Wele Omunyali Owa Bioosi ne akhola kano khu sibala sino? Sifuno sie lirima liewe lirafu sili siina?’

²⁵Ne babaandu bakhakobosie bali, ‘Sikila balekelesia endakaano niyo Wele Omunyali Owa Bioosi, Wele owe bakuuka babwe aakhola ne nabo nga ne aabarusia mu Misiri.

²⁶Bakholela bawele babaandi ne khubasaaya, bawele nibo yaba bakhamanya namwe basaayanga tawe.

²⁷Khwako Wele Omunyali Owa Bioosi aambila babaandu be sibala sino lirima mala areera khu sibala siabwe bilaamo bioosi bibiaandikwa mu sitabu sino.

²⁸Wele Omunyali Owa Bioosi aabarusia mu sibala siabwe mu lirima liewe likali mala abamwaata mu sibala sikeni, khukhwola endaalo yino bali ebweeneyo.’

²⁹“Bibiindu bikhamanyikhaane bili bia Wele Omunyali Owa Bioosi, Wele wefwe ne kakhali nibio niye aakhwekesia bili bibiefwe ne lisaaye liefwe khulwa mindali na mindali. Khukhoya khurie kamalaka kano koosi.