Read lubukusu Likh. 3 Bible Online

Likh. 3 - lubukusu bible

Likh. 3

¹“Nio khwacha lubeka lwe bunaswa khwaluungikha sibala sia Bashani. Ne omwami Oku owa Bashani arula ne babaandu bewe boosi akhwibwaakala siimbi alukoba lwa Etrei.

²Ne kakhali Wele Omunyali Owa Bioosi amboolela ali, ‘Mukhamuria tawe. Ndikho nja khura niye ne babaandu bewe ne sibala siewe sioosi mu bunyali bwenywe. Mukhole niko mwakholela Sihoni omwami owe Baamori owamenyanga mu Heshiboni.’

³“Nio Wele Omunyali Owa Bioosi ara akhaba omwami Oku ne babaandu bewe mu bunyali bwefwe mala khwabeera boosi.

⁴Siise esio khwaamba chingoba chewe choosi. Se lwabao lukoba nilwo khukhatiila tawe. Khwatiila chingoba choosi alala kamakhumi sita, ne lukoongo lwa Arikobu lwosi niio Omwami Oku amiianga.

⁵Chingoba chino choosi chaba chabotookhelelwa ne lisiisi lileeyi lukali, bilibwa bileeyi ne bichuuma bibiikala bilibwa. Lundi biabao birekere bikali bikhaba ne biabotookhelesibwa ne kamasiisi tawe.

⁶Khwababunia elala nga khwakhola omwami Sihoni owa Heshiboni, khwonakaka buli lukoba, khwabunia baseecha, bakhasi ne babaana.

⁷Ne kakhali khwabukula chikhaafu choosi ne kimiaandu kie mungoba.

⁸“Nono siise esio khwanuula babaami be Baamori babili abo sibala siili ebukwe we luluuchi lwa Yoritani khwatiila, khukhwama mu litooma lia Arinoni khukhwola khu sikulu sia Herimoni.

⁹(Basidoni balanganga sikulu sia Herimoni bali Sirioni ne Baamori basilanganga bali Seniri)

¹⁰Khwatiila sibala sioosi sisieteleela ne kamaloba koosi ka Kileati ne ka Bashani khucha khukhwola ebukwe khu chingoba cha Saleka ne Etrei.”

¹¹(Omwami Oku yeng'ene owarama khu Barefaimu. Sitanda[1] siewe siaba siakholwa khukhwama khu sichuuma[2] sili mu Raba mu Baamoni. Siaba buleeyi chimita chine ne bukhiikha chimita chibili khuloondekhana ne sikelo sie siise esio.)

¹²“Nga Khwabukula sibala siaba sisiefwe. Naelesia chikholo cha Rubeni ne Kati sibala khukhwama khu lukoba lwa Aroeri siimbi ne litooma lia Arinoni ne akhaba ne malala khu maloba ke sibala sie bikulu sia Kileati alala ne chingoba chasio.

¹³Ne balala khu kholo eya Manase nabaelesia sibala sisiaba ne sisikale sioosi sia Kileati, ne Bashani sioosi nisio Oku aba ne amiia lukoongo lwa Arikobu lwoosi.” (Bashani siaba siamanyikhana nga sibala sie Barefaimu.

¹⁴Yairi khukhwama mu kholo eya Manase abukula lukoongo lwoosi lwa Arikobu, Bashani, khucha khukhwola khu lwakha lwa Keshuri ne Maaka. Atiuukha birekere ebio lisina liewe. Abitiuukha ali Hafoti-yairi mala bisimanyikhana busa birio khukhwola luno,)

¹⁵“Naelesia be nju eya Makiri khukhwama mu kholo eya Manase kamaloba ka Kileati.

¹⁶Ne khu kholo cha Rubeni ne Kati nabaelesia sibala sisiama khu Kileati khukhwola khu litooma lia Arinoni. Akari we litooma niio aaba lulwakha lwabwe khukhwola khu luuchi lwa Yaboki niio lulwakha lwe Baamoni lwaba.

¹⁷Lubeka lwe mumbo lulwakha lwola khu luuchi lwa Yoritani, lwacha khukhwama khu nyanja eya Kalilaya lubeka lwe ebunaswa, lwekha khukhwola khu nyanja eya Araba, yaani enyanja eya Chumbe khukhwola khu miikha kia Pisika lubeka lwe ebukwe.

¹⁸ “Ne siise esio, namulaka ndi, ‘Wele Omunyali Owa Bioosi, Wele wenywe amuelesie enywe sibala sino mumenyemo. Ra mu baandu benywe be liie kamaani ke liie boosi barangire ebweeni we Baisiraeli.

¹⁹Ne kakhali bakhasi benywe bong'ene, ne babaana ne chikhaafu (manyile ndi muli ne chikhaafu chingali) balasikala enyuma mungoba nicho muelesie enywe.

²⁰Mukhole murio khukhwola nga Wele Omunyali Owa Bioosi ne ayeeta babasienywe ne bengila mu maloba niko Wele Omunyali Owa Bioosi, Wele wenywe abaelesia engelekha owa Yoritani. Enyuma wako munyala mwakobola buli mulala mu maloba kewe niko namuelesia.’

²¹“Ne nalaka Yoshua ndi, ‘Wabona koosi niko Wele Omunyali Owa Bioosi Wele wowo akholela babaami babili abo, Sihoni ne Oku. Wele Omunyali Owa Bioosi akhakhole busa ario khu bwami bwoosi nibwo muchamo.

²²Okhabaria tawe sikila Wele Omunyali Owa Bioosi, Wele wenywe alamupanila.’

²³ “Nio nasaba Wele Omunyali Owa Bioosi ne mwekoonjelela ndi,

²⁴‘Ee Omwami WELE, ewe niwe orakikhe khukhunjekesia ese omukholi wowo bukali bwowo ne kamaani kowo, se aliio wele okundi mwikulu namwe khu sibala, onyala wakhola bibiindu bie khuukia nga bibiowo tawe.

²⁵Nosiima, khusaba ndekhuule nje mbone kamaloba kamalayi engelekha we luluuchi lwa Yoritani, sibala silayi sie bikulu bia Lebanoni.’

²⁶“Ne kakhali Wele Omunyali Owa Bioosi ambambila lirima sikila enywe mala amboolela ali, ‘Wanyalile orio! Okhararakho khu kano lundi tawe!

²⁷Cha khu ndeleelwa khwe sikulu sia Pisika. Ne wolilekho, lola ebunaswa, ebunafubo, ebukwe, ne mumbo. Loleelesia bulayi nisio obona, sikila ewe se olambukha luluuchi lwa Yoritani luno tawe.

²⁸Ne kakhali eelesia Yoshua kamalaka mala omuremo kumwoyo omutinyilisie. Niye olemeelela babaandu bano mala banyoole kamaloba niko olabona ako.’

²⁹Nio khwasikala mwitooma lilialoleelela lukoba lwa Beti-peori.”