Read lubukusu Likh. 30 Bible Online

Likh. 30 - lubukusu bible

Likh. 30

¹“Luno ese namueleesie enywe burobosi akari we chikhabi ne silaamo. Nga bibiindu bino bioosi ne bikhabe ne bimwekholekhekho mala mumenye mu kholo nimwo Wele Omunyali Owa Bioosi, Wele wenywe akhamusalanisiamo, khebulila kamakhuwa kano.

²Enywe nende be lisaaye lienywe mukhakobolele Wele Omunyali Owa Bioosi, Wele wenywe, mala mukhamurie niye ne kumwoyo kwenywe kwoosi ne liiba lienywe lioosi. Mukhare kamalaka kewe niko ese ndikho muelesia enywe endaalo yino.

³Enyuma wako, Wele Omunyali Owa Bioosi, Wele wenywe akhamukholele enywe siisa. Akhamukobosie murure mu kholo nimwo aamusalanisiamo, lundi akhamukhole enywe mube baiinda lundi.

⁴Aakhaba ne mwasalanisibwa mu sibala sie aleeyi, Wele Omunyali Owa Bioosi, Wele wenywe akhamubuusie enywe alala mala amukobosie.

⁵Nio amureere enywe mu sibala nimwo bakukawenywe bamenyanga khale mala alamukhola mube baiinda lukali lundi bakali khukhila bakuukawenywe.

⁶Wele Omunyali Owa Bioosi, Wele wenywe akhamuelesie enywe kimiooyo kie liiria, nio mu musiime niye ne kumwoyo kwenywe kwoosi ne liiba lienywe lioosi mala muchiililile khumenya mu sibala esio.

⁷Akhakobosie bilaamo bino bioosi khu benywe basiku, babamubiila enywe ne khumupia enywe siibi.

⁸Enywe mukharie Wele Omunyali Owa Bioosi ne khuloonda kamalaka kewe koosi niko ese ndikho muelesia enywe endaalo yino.

⁹Wele Omunyali Owa Bioosi, Wele wenywe akhamukhole enywe muindiaale mu bioosi nibio mukhola, muliba ne babaana bakali, ne chikhaafu chingali, ne kimikuunda kienywe kikhamemo bibiaamo bikali lukali. Wele Omunyali Owa Bioosi, Wele wenywe akhasangaale khumukhola enywe baiinda nga aakhola bakuukawenywe baaba baiinda.

¹⁰Kakhabe kario mwaba ne mumuria niye ne khuloonda kamalaka kewe koosi kakaandikwa mu sitabu sie kamalaka kewe sino. Mukhoya mukobolele Wele Omunyali Owa Bioosi, Wele wenywe ne kumwoyo kwenywe kwoosi ne liiba lienywe lioosi.

¹¹“Lilaka nilio ese ndikho muelesia enywe endaalo yino se lili liaandalafu lukali namwe se lili aleeyi lukali khukhwama khwinywe tawe.

¹² Se lili mwikulu tawe, nio akhabao oreeba ali, ‘Naanu olacha mwikulu alireere asi khwifwe nio khuliulile mala khulirie tawe?’

¹³Namwe se lili sikelekha sisiindi sie nyanja nio abeo oreeba ali, ‘Naanu khwifwe olambukha akhureerere efwe nio khuulile mala khurie?’ Tawe.

¹⁴Likhuwa lili siimbi lukali ne nanywe. Lili mu minwa kienywe ne mu miooyo kienywe, khwako khe mulirie.

¹⁵“Endaalo yino ese ndikho muelesia enywe burobosi akari we bulamu ne lifwa nende akari we kamalayi ne kamabi.

¹⁶Murie kamalaka ka Wele Omunyali Owa Bioosi, Wele wenywe niko ndikho muelesia endaalo yino khulwe khumusiima niye, ne khukhola niko niye eenya ne khuliinda kamalaka kewe koosi. Mwakhola murio, Wele Omunyali Owa Bioosi, Wele wenywe alamubiita enywe chikhabi mu sibala nisio muli siimbi khukhwingisia.

¹⁷Ne kakhali mwaba ne mulekha Wele Omunyali Owa Bioosi, Wele wenywe mala mulekhe khumuulila, ne eyi musaaya bawele babaandi ne khubakholela,

¹⁸ese muboolela enywe endaalo yino ndi mulabuna. Se mulamenya lukali mu sibala siili engelekha owa Yoritani esio nisio ooli siimbi khukhwingisia tawe.

¹⁹Luno likulu ne liloba bili buloli bwase bili ese ndikho muelesia enywe burobosi akari we bulamu ne lifwa, kari we chikhabi ne silaamo. Khwako robora bulamu nio enywe ne lisaaye lienywe mumenye.

²⁰ Siima Wele Omunyali Owa Bioosi, Wele wenywe, mu murie niye mala mube basuubilwa khu niye nio mube balamu lundi nio mumenye lukali mu sibala nisio aasuubisia khuelesia bakukawenywe, Aburahamu, Isaaka ne Yakobo.”