Read lubukusu Likh. 31 Bible Online

Likh. 31 - lubukusu bible

Likh. 31

¹Musa achiililila khuboolela babaandu ba Isiraeli boosi kamakhuwa kano.

² Aababoolela ali, “Ese luno ndi bukhulu bwe kimiiko emia ndala ne kamakhumi kabili. Se nyala khumwimeelela enywe lundi tawe. Wele Omunyali Owa Bioosi aamboolela ali ese se ndambukha luluuchi lwa Yoritani tawe.

³Wele Omunyali Owa Bioosi, Wele wenywe omwene niye olamuraangirira enywe ebweeni wenywe mala abunie chikholo chimenyileyo, nio enywe mwingisie sibala siabwe. Ne Yoshua alaba omwimeelesi wenywe nga Wele Omunyali Owa Bioosi ne aloma.

⁴ Wele Omunyali Owa Bioosi alikholela babaandu be chikholo echo niko aakholela Sihoni ne Oku, babaami be Baamori mala aababunia nibo ne sibala siabwe.

⁵Wele Omunyali Owa Bioosi alamuelesia enywe bukhili khu nibo mala mukhoya mubakhole busa bulayi bwene nga ese mulakile.

⁶Ba ne kamaani ne bunyindaafu. Mukhabaria namwe mwabareengera tawe. Wele Omunyali Owa Bioosi, Wele wenywe alaba ne nanywe. Se alamuchangalaasia namwe aamwanjukhe enywe tawe.”

⁷Khwako, Musa aalaanga Yoshua mala aamuboolela mu moni che babaandu ba Isiraeli boosi ali, “Ba ne kamaani lundi omunyindaafu. Ewe niwe olemeelela babaandu ba Isiraeli bano khukhwingila mu sibala nisio Wele Omunyali Owa Bioosi aasuubisia bakuuka babwe, bayeete khukhwola nga ne basingisia.

⁸ Wele Omunyali Owa Bioosi omwene alakhuraangirira ewe mala abe ne nawe. Se alikhuchangalaasia namwe akhwanjukhe ewe tawe. Khwako okharia namwe wafwa kumwoyo tawe.”

⁹Nio Musa aandika Lilaka lino mala aaelesia basaayi balawi ba basutanga lisanduku lie ndakaano ya Wele Omunyali Owa Bioosi ne khu bemeelesi ba Isiraeli boosi.

¹⁰ Musa aabalaka ali, “Somela Baisiraeli lilaka lino enyuma wa buli miiko saba khu mwiiko nikwo kamakobi kalekhuulilwangakho ne kwolile. Lundi soma kano lukali a Naikara eye Bisali,

¹¹babaandu ba Isiraeli boosi ne becha khusaaya Wele Omunyali Owa Bioosi, Wele wenywe abuundu aaroborwa. Soma boosi ne barekeeresie.

¹²Laanga alala babaandu be siseecha, be siikhasi ne babaana ne baakwa bamenyile mu ngoba chenywe nio buli mundu akaulile ne khukhweyika khuria Wele Omunyali Owa Bioosi, Wele wenywe ne khukhola nga kamalaka kano koosi ne kaloma.

¹³Mu ngila yino be lisaaye liaabwe bakhaulilakho Lilaka lia Wele Omunyali Owa Bioosi, Wele wenywe tawe baleyika khumuria niye mu bulamu bwabwe bwoosi nibwo balamenya mu sibala nimwo muli siimbi khumenyamo, engelekha owa Yoritani.”

¹⁴Wele Omunyali Owa Bioosi aaboolela Musa ali, “Se olamenya siise sileeyi tawe. Laanga Yoshua mala mwingile mu Liiema lie kumuse, nio ese muelesie lilaka lie bunyali.” Musa ne Yoshua baacha mu Liiema lie kumuse.

¹⁵Wele Omunyali Owa Bioosi aababonekhelayo mu lileesi liliema amuliango kwe Liiema.

¹⁶Wele Omunyali Owa Bioosi aboolela Musa ali, “Oli siimbi khufwa, ne enyuma we lifwa liowo babaandu se balaba basuubilifu khwise tawe. Balafunaka endakaano niyo ese nakhola ne nabo. Balandekha mala basaaye bawele be sibala nisio balikho bengilamo.

¹⁷Khwako ese ndabaambila lirima, mbekisekho mala mbalekhe mala babunisibwe. Butinyu bukali ne bumayaanu bikhabakwekho. Nio balome bali, ‘Bibiindu bino bilikho bikhwekholekhakho sikila Wele wefwe se ali ne nafwe tawe.

¹⁸Ne ng'ali ese khabalekhe endaalo eyo sikila bumayaanu bwoosi nibwo bakhola bwe khusaaya bawele babaandi.

¹⁹“ ‘Khwako, aandika kumwenya kuno mala okweyikie babaandu ba Isiraeli. Lekha bembe sikila kuliba buloli bwase khu nibo.

²⁰Ndabayila mu sibala nisio kamabeele ne bubuukhi biseleetekhanga nisio nasuubisia bakuuka babwe. Ebweeneyo balaba ne biakhulia bioosi nibio benya mala balamenya bulayi. Enyuma wako, balaaukha mala bakholele bawele babaandi, bandeekelesie ese ne khufunaka endakaano yase.

²¹Ne kakhali enyuma we butinyu bukali ne bumayaanu ne bibanyoolile, kumwenya kuno kukhabareebe, sikila kulaba ne kusimbwa busa ne lisaaye liabwe. Aakhaba ese ne siili khabengisie mu sibala nisio nabasuubisia khu baelesia tawe, namanyile niko balikho bebaasia.’ ”

²²Endaalo eyo ne ng'ene Musa aandika kumwenya mala ekisia babaandu ba Isiraeli.

²³ Nio Wele Omunyali Owa Bioosi aelesia Yoshua okhwa Nuni kamalaka ne amuboolela ali, “Ba ne kamaani ne bunyindaafu. Olaraangirira babaandu ba Isiraeli bengile mu sibala nisio nabasuubisia. Ndaba ne nawe.”

²⁴Musa aandika kamakhuwa ke Lilaka lino mu sitabu. Se alekhakho sisiindu siosi siosi enje tawe.

²⁵Nga ne aamala aaboolela basaayi balawi, ba basutanga Lisanduku lie ndakaano ya Wele Omunyali Owa Bioosi ali

²⁶“Bukula sitabu sie kamalaka sino mala musire siimbi ne Lisanduku lie Ndakaano ya Wele Omunyali Owa Bioosi, Wele wenywe. Sikhoya simenyeo nga buloli khwinywe.

²⁷Sikila ese manyile po nga ne muli bareengu lundi be sileka. Lola, mwabeele bareengu khu Wele Omunyali Owa Bioosi mu bulamu bwase, aba mulaba bareengu muriena ese ne fwiile.

²⁸Buusia alala ebweeni wase basaakhulu boosi ne banamae bakhulu be chikholo chenywe nio, mbaboolele bibiindu bino. Likulu ne liloba bibe buloli bwase khwinywe.

²⁹Manyile ndi enyuma we lifwa liase ng'ali mulaba baabi mala mulalekha kamalaka niko ese mulakile. Ne mu biise bibiicha, butinyu bukhamukwekho mwaba ne mukhola kamabi ebweeni wa Wele Omunyali Owa Bioosi ne khumuambia niye lirima khubirira mu bikholwa bienywe.”

³⁰Nono, Musa aaloma kamakhuwa ke kumwenya kwoosi khukhwola nga ne aamala babaandu ba Isiraeli boosi ne barekeeresie: