Read lubukusu Likh. 32 Bible Online

Likh. 32 - lubukusu bible

Likh. 32

¹Likulu ulila, ne ese ndomaloma, lekha sibala siulile niko ndomaloma.

²Lekha kamekisio kase kakwe nga kamame ke efula, kamakhuwa kase kabe khu liloba nga luume, nga efula namonyekeele khu bunyaasi butoro, lundi nga efula efunyakala khu bimelwa bitoro.

³Sikila ndilangilila lisina lia Wele Omunyali Owa Bioosi, fumia Wele sikila ali omukali!

⁴Wele Omunyali Owa Bioosi ali omuliindi wase owe kamaani, kimilimo kiewe kili kimimiliiu, sikila chingila chewe choosi chili bung'ali. Wele omusuubilifu ookhali ne bumayaanu tawe, ali owa ng'ali lundi omuluungi.

⁵Ne kakhali enywe mwamukholeele bubwoni, se mwolaana khuuba babaana bewe lundi tawe, sikila bumayaanu bwenywe, eselukho emayaanu lundi embeeyi.

⁶Enywe babaandu basilu bataamba likesi, mwenya muruungie Wele Omunyali Owa Bioosi? Se ali paapa wenywe, owamubuumba enywe, owamukhola enywe mala akhola mwakaliia?

⁷Khebulila biise bibiabira, yibaasia ke chiselukho che kimiiko kikiabira, reeba kukaao, ne alakhwekesia, basaakhulu benywe, ne balamuboolela.

⁸ Wele owe Angaaki Lukali nga ne aelesia chikholo kimikabwa kiabwe, nga ne aaukhasia babaandu, aarao chinjakha che babaandu khuloondekhana ne bukali bwe babaandu bewe.

⁹Kumukabwa kwa Wele Omunyali Owa Bioosi kuli babaandu bewe, Baisiraeli bali kumukabwa kwewe.

¹⁰Aabanyoola mu sibala sie sisiangalaamwe, mu sichiimi sie ekhuungu, sitambamo siindu, aabaelesia buliindi, aabalela, abaliinda nga oliinda endolelo ye emoni yewe.

¹¹Wele Omunyali Owa Bioosi akhiingilila Isiraeli khukwa, nga efuruusi ne yekesia kamana kayo khupurukha, ne ketiila khu ndaa chayo,

¹²Wele Omunyali Owa Bioosi yeng'ene niye owabemeelela, wele omukwa se amuyeeta niye tawe.

¹³Aabara mu bikulu mala aabaliisia bibiaamo bie mu mukuunda. Aabaelesia bubuukhi khukhwama khu lwanda, ne kamafura khukhwama mu mabaale ke lulwaanda luandalafu.

¹⁴Chikhaafu chabwe ne chimbusi biaana kamabeele kamakali, baba ne chikhaafu chindayi ne chimbusi, baba ne ngaanu endayi ne kumuketu kwe endali endayi.

¹⁵Ne kakhali Baisiraeli banera, mala baapa liteki, banera, bamiuukha, mala balekha Wele owababuumba, mala balekha lulwanda lulwabaonia.

¹⁶Bakhola Wele aaba ne likhendekha khu bawele baakwa, bikholwa biabwe biamuaambia lirima.

¹⁷ Baana chimbosio khu bisieeno, se biaba Wele tawe, khu bawele nibo bakhamanya tawe, khu bawele bakeni babechao ekhumaliilikha, nibo bakuukawenywe bakharia tawe.

¹⁸Se mwenaana khu Lwanda lulwamuelesia enywe bulamu tawe, mwebilila Wele owamusaala.

¹⁹Wele Omunyali Owa Bioosi abona lino, mala ababiila, sikila bubeeleli khu baana bewe basoleeli nende bakhaana.

²⁰Aaloma ali, “Ndabekisakho, ndabona khutabusia khwabwe nga khulaba, sikila bali eselukho emayaanu, babaana bakhali basuubilwa tawe.

²¹ Banderemo likhendekha khukholela bibiindu biikhali wele tawe, bambaambiisie lirima sikila bifwaani biabwe. Nono ndarumikhira babaandu bakhali ne bukhala tawe, khubaraamo likhendekha ndabaambia lirima khubirira khu kholo esilu.

²²Lirima liase lilaburukha nga kumulilo, kwaburuukhe kwolile emakoombe,”[14] kwosia sibala ne bibiaamo biasio, lundi kwoosia kimisiingi kie bikulu.

²³Ese ndababuusiakho butinyu, ndabalasa mbamalilekho buembo bwase,

²⁴balaulila enjala, balabunisibwa ne kumuumu kumurafu ne lufu luubi. Ese ndabarumira chisaang'i che mundaa, ne chindemu che bufwisi.

²⁵Liie lilareera lifwa khu ngila che chingoba, ne butinyu mu chingo. Basoleeli baele ne bakhaana be eyabwaana balibunisibwa, akhaba onuuna nende owe chimbuchi.

²⁶Neenya ndi, “Mbabunisilie elala, nio omundu olibakhebulila akhabao tawe,”

²⁷Ne kakhali se neenya mbaambwe lirima sikila omusiku tawe, busa basiku babwe bakheniinie, balome bali, “efwe khwakhilile, Wele Omunyali Owa Bioosi se akholile lino tawe!”

²⁸Bali ekholo ekhaulila tawe, lundi se bali ne limanya tawe.

²⁹Baba bakesi, aandi bamanyile lino, bakhamanyile kamakhuwa kalibekholekhakho biise bibiicha!

³⁰Omundu mulala yeng'ene aapa ariena babaandu eelefu? Ne babaandu babili bong'ene baapa bariena babaandu chielefu ekhumi? Ne kakhali aba kamaani ka Wele kabalekhile, aba Wele Omunyali Owa Bioosi aabalekhile.

³¹Bawele babwe se bali nga Wele wefwe tawe, aakhaba basiku babeene bamanyile kano.

³²Kamatuunda ke kimisabibu kabwe, kaama khu misabibu kia Sodomu, mu mikuunda kia Komora. Chisabibu chabwe chili che buchiba, kamatuunda ke kimisabibu kabwe kali ke buchiba, chisakia chakio chili chindulu,

³³endali yabwe eli buchiba bwe chindemu, buchiba burafu bwe kamaaramba.

³⁴“Ese se namanya kano, se kekalilwa mu mabiikhilo kase?

³⁵ Ese niyachanga, lundi mbukuumanga, baali siimbi khukwa, endaalo eye butinyu bwabwe eli siimbi, ne kumunaanio kwabwe kulikho kwicha khangu.

³⁶ Wele Omunyali Owa Bioosi alaliinda babaandu bewe, ne kakhali alaba ne siisa khu bakholi bewe, lundi abona kamaani kabwe ne kawele, ne se aliio oramire, nasioobi namwe omulekhuule tawe.

³⁷Nio alome ali, ‘Bawele babwe bali waena?’ Lulwanda nilwo belukhilamo.

³⁸Naanu babalichanga kiminawa kie chimbosio chabwe, ne banywa endali eye biianwa biabwe bie khunywa? Lekha bawele abo beche bamuyeete, lekha nibo bamuliinde.

³⁹Nono bona muli ese seng'ene ndi Wele, ne Wele okundi se aliio ne khali ese tawe. Niira lundi ndamusia, mbumisia lundi mbonia likoonjo, ne se aliio onyala efubarura khwise tawe.

⁴⁰Ese suta kumukhono kwase mu ngaaki ne nichuba ndi, nga ne menya khulwa mindali,

⁴¹ndaakala embalu yase eye bumemu ne ndakirumikhira mu bukhalaki, ndeyacha basiku base, ne khuelesia kumunaanio abo babambiila.

⁴²Buembo bwase bulechulakho kamafuki kabwe, ne embalu yase eleera babaandu boosi babakhiingilila ese. Sifuki silama khwaabo babeerwa nende baali mu mbaambe, khukhwama khu bemeelesi be basiku be lichuune lileeyi.

⁴³ Be chikholo enywe, mukhoya mufumie babaandu ba Wele Omunyali Owa Bioosi, Wele Omunyali Owa Bioosi aukuumanga boosi babeera babaandu bewe, eyachanga khu basiku bewe, lundi abeelanga bubwoni bwe babaandu bewe.”

⁴⁴Musa ne Yoshua okhwa Nuni bacha mala bembela babaandu kumwenya kuno kwoosi.

⁴⁵Nga Musa ne aaba ne amala khuboolela babaandu ba Isiraeli boosi kamakhuwa kano koosi,

⁴⁶aababoolela ali, “Bona bung'ali muli muria kamalaka niko ese naama khumuelesia enywe endaalo yino koosi. Boolela babaana benywe barie mu burekeerefu kamekisio ka Wele koosi.

⁴⁷Kamekisio kano se kali kamakhuwa ka busa kakhalimo bukhala tawe. Kali bulamu bwenywe. Khemukarie mala mulamenya kimiiko kimikali mu sibala siili engelekha owa Yoritani esio nisio muli siimbi khumenyamo.”

⁴⁸ Endaalo eyo neng'ene Wele Omunyali Owa Bioosi aaboolela Musa ali,

⁴⁹“Niina khu bikulu bia Abarimu khu sikulu sia Nebo mu sibala sia Moabu sisialoleelela lukoba lwa Yeriko, mala obone sibala sia Kanaani nisio ndi siimbi khuelesia babaandu ba Isiraeli bamenyemo.

⁵⁰Olafwila khu sikulu sienesio nga wandaayo Aruni ne aafwiila khu sikulu sia Hori.

⁵¹Kalaba kario sikila enywe mwembi mwakholela ese bumayaanu nga ne mwaba a meechi ka Meriba, siimbi ne lukoba lwa Kadeshi mu sichiimi sia Sini. Mwaba bareengu khwise, se mwambelesia ese luyali mu moni che babaandu ba Isiraeli muli ese ndi omutakatifu tawe.

⁵²Olabona sibala esio aleeyi, ne se olengila mu sibala nisio ndikho mbelesia babaandu ba Isiraeli tawe.”