Read lubukusu Likh. 33 Bible Online

Likh. 33 - lubukusu bible

Likh. 33

¹Chino nicho chikhabi nicho Musa omundu owa Wele aabiita babaandu ba Isiraeli ne akhafwa tawe.

²Aaloma ali: “Wele Omunyali Owa Bioosi aama khu sikulu sia Sinai, enyokhela khwifwe khukhwama Edomu, aakhosia buwaanga bwewe khukhwama khu sikulu sia Parani aarura mu batakatifu chielefu ekhumi, ne kumulilo kwe bumemu mu mukhono kwewe kumuseecha.

³Wele Omunyali Owa Bioosi asiima babaandu bewe, boosi nibo arobora bali mu buliindi bwewe, mala bakhuloonda ewe, lundi baloonda kakowo,

⁴nga Musa ne aakhuelesia kamalaka, kabe ke babaandu ba Yakobo.

⁵Wele Omunyali Owa Bioosi aaba omwami mu Yesuruni, nga babemeelesi be babaandu babuusiana, chikholo cha Isiraeli choosi alala.

⁶Lekha ekholo eya Rubeni emenye, ekhafwa tawe, aakhaba babaandu bayo ne bali batiiti.”

⁷Aaloma kano khu kholo eya Yuda, “Ee Wele Omunyali Owa Bioosi, rekeeresia kamalilo ke ekholo eya Yuda, mala obakobosie khu basiaabwe. Bapanile mala obayeete khu khuupana ne basiku babwe.”

⁸ Ne khuloondekhana ne kholo eya Lawi aaloma ali, “Wele Omunyali Owa Bioosi, elesia balawi Tumimu, ne Urimu,[15] nibo ewe wasiima. Ewe wabara khwikela e Masa, wabayinganisilia a meechi ka Meriba.

⁹Balekha bapaapa babwe ne ba maayi babwe, se babaliinda tawe, balekha bawandaaye ne babaana babwe, sikila baria likhuwa liowo, mala baliinda endakaano yowo.

¹⁰Bakhekisie Baisiraeli kamalaka kowo ne kamekisio kowo, bakhoselie bupani ebweeni wowo, ne biianwa bie khukhwosia bimuufu khu alutare yowo.

¹¹Wele Omunyali Owa Bioosi, biita chikhabi bibiindu biabwe, lundi fukiilila kimilimo kiabwe, khupa oule basiku babwe, abo ba baabiila nio bakhanyoola kamaani lundi tawe.”

¹²Khu kholo eya Benjamini aaloma ali, “Basiime ba Wele Omunyali Owa Bioosi bali asi we buliindi bwewe, abaliindanga biise bioosi, aakhaba ne bauluukha babechanga mu buliindi bwewe.”

¹³Ne khu kholo eya Yosefu aaloma ali, “Wele Omunyali Owa Bioosi akhoya abiite chikhabi kamaloba kaabwe, abareerere kamame khukhwama mu ngaaki, ne chinuma che kameechi chirubure,

¹⁴ne kamatuunda kamalayi karobera kumuumu, ne bibiaamo bikali bie kimieesi kie likesa,

¹⁵ne bibiaamo bilayi bie mu ngulu, ne bibiaamo bibioola bie bikulu bia mindali,

¹⁶alala ne biianwa bilayi bie khu liloba, ne asiimisibwa oyo omenyile khu Sinai. Lekha chikhabi chino chibe khu kholo eya Yosefu, sikila aaba omwimeelesi mu bawandaaye.

¹⁷Yosefu ali ne kamaani ke euunwa embele, ne chinjika chewe chili chinjika che emboongo, alabirumikhira khusindikha babaandu be chikholo chichiindi, boosi, khukhwola be aleeyi lukali. Bano bali chielefu ekhumi ba Efuraimu lundi chielefu chingali ba Manase.”

¹⁸Ne khu kholo eya Sebuluni aaloma ali, “Ekholo eya Sebuluni yekhoya ne murura, ne ekholo eya Isakari sangaalila mu maeema kenywe.

¹⁹Bakhalaange babaandu bache khu sikulu, ne ebweeneyo bakhaane chimbosio chindayi, bumenyo bwabwe buli mu bie mu nyanja ne kimiaandu kiabwe mu muyekhe kwe enyanja.”

²⁰Khu kholo eya Kati aaloma ali, “Fumia Wele oelesia be kholo eya Kati kamaloba! Bakati bakhamenyeyo nga etalang'i bakhatabulake kamakhono ne kimirwe kie babaandu.

²¹Beroborera sibala silayi, babemeelesi baebwa sitonyi siabwe, bafukiilila lilaka lia Wele Omunyali Owa Bioosi nga babemeelesi ba Isiraeli ne bebuusia alala.”

²²Ne khu kholo eya Dani aloma ali, “Ekholo eya Dani eli etalang'i endoro, esunanga khukhwama Bashani.”

²³Ne khu kholo eya Nafutali aaloma ali, “Ekholo eya Nafutali, busiime bwa Wele Omunyali Owa Bioosi bubanyala, muli ne chikhabi chingali cha Wele Omunyali Owa Bioosi, enyanja eya Kinereti mumbo ne ebunafubo elaba eyenywe.”

²⁴Ne khu kholo eya Asieri aaloma ali, “Ekholo eya Asieri ebiitwa chikhabi lukali mu baasiabwe, lekha sibala siewe sibeemo kimiseituni kimikali khulwe kamafura.

²⁵Bilibwa bienywe bikhakholwe khukhwama khu bichuuma ne kumukasa, ne kamaani kenywe kakhabeemo buli lwosi.”

²⁶Musa amaliilisia mu khuloma ali, “Yeshuruni, se aliio oli nga Wele tawe, okeendanga mu ngaaki khumuyeeta enywe, owe kamaani ne ali mu ngaaki.

²⁷Wele owa mindali ali bumenyo bwowo, kamakhono kewe ka mindali kalamuliinda enywe. Alitimania basiku benywe ebweeni wenywe mala amuboleele enywe ali, ‘Babunie.’

²⁸Khwako Baisiraeli balamenya mu muleembe, babaana ba Yakobo bong'ene, mu sibala sie biakhulia ne endali, niio likulu likwisianga kamame.

²⁹Baisiraeli muli ne chikhabi, mbao baali nga enywe tawe, babaandu nibo Wele Omunyali Owa Bioosi aaonia. Wele Omunyali Owa Bioosi ali engabo yenywe, ne embalu eye bukhili bwenywe! Basiku benywe bakhamwichekho ne buuri, ne kakhali mukhabaswalakilile asi.”