Read lubukusu Likh. 34 Bible Online

Likh. 34 - lubukusu bible

Likh. 34

¹Musa arura khu sibala sie kumweyeywe sia Moabu, aaniina aacha khu sikulu sia Nebo khu ndeleelwa khwe sikulu sia Pisika, ebukwe owa Yeriko. Ebweeneyo Wele Omunyali Owa Bioosi aamwekesia sibala sioosi khukhwama Kileati khucha khukhwola khu lukoba lwa Dani

²lundi aamwekesia sibala sioosi sia Nafutali, sibala sia Efuraimu ne Manase sibala sia Yuda sioosi khukhwama mumbo khukhwola khu nyanja eya Mediterenia ebukwe.

³Aamwekesia sibala sia Yuda ne sie kumweyeywe ne litooma lioosi lia Yuda khukhwola Soari. Yeriko lulwalangangwa lukoba lwe kimikheendu.

⁴ Nio, aboolela Musa ali, “Sino sili sibala nisio nasuubisia Aburahamu, Isaaka ne Yakobo ndi, ndielesia be lisaaye liabwe. Nakhufukiilile osibone, ne kakhali se ndakhulekha wambukhe ocheemo tawe.”

⁵Nio, Musa omukholi wa Wele Omunyali Owa Bioosi aafwiila ebweeneyo mu sibala sia Moabu nga Wele Omunyali Owa Bioosi ne aloma.

⁶Wele Omunyali Owa Bioosi amusiikha mu litooma lilialoleelela lukoba lwa Beti-peori. Ne khukhwola endaalo yino se aliio omundu omanyile abuundu abweene niio aasiikhwa tawe.

⁷Nga Musa ne afwa aba ne bukhulu bwe kimiiko emia ndala ne kamakhumi kabili. Aba busa ne kamaani nga buli lwosi, ne chimoni chewe se chabofula tawe.

⁸Babaandu ba Isiraeli bamulila khu ndaalo kamakhumi kataru mu mweyeywe kwa Moabu. Nio siise sie khumulila siaawa.

⁹Yoshua okhwa Nuni echusibwa ne bukesi sikila Musa aba aamurobora niye. Babaandu ba Isiraeli baria Yoshua mala baliinda kamalaka niko Wele Omunyali Owa Bioosi abaelesie khubirira khu Musa.

¹⁰ Omung'oosi akhabakhoo mu Isiraeli nga Musa tawe. Wele Omunyali Owa Bioosi aalomaloma ne Musa moni na moni.

¹¹Akhabakhoo omung'oosi okundi owakholakho kamayia nende bie khuukia nibio Wele Omunyali Owa Bioosi aruma Musa khukhola mu sibala sie Misiri tawe. Musa aakhola kano khu Farao omwami owa Misiri nende khu bakholi bewe boosi ne khu sibala siewe sioosi.

¹²Akhabakhoo omung'oosi okundi onyala aaba ne kamaani kamakali ne khukhola bikholwa bikali lundi biriisia nibio Musa aakhola ebweeni we Baisiraeli tawe.