Read lubukusu Likh. 4 Bible Online

Likh. 4 - lubukusu bible

Likh. 4

¹Nio Musa aboolela babaandu ali, “Baisiraeli, ria kamalaka koosi niko ndikho mwekisia enywe mala mukhole nga kenyekha. Mwakhola murio, mulayindila mala mwingile ne khumenya mu sibala nisio Wele Omunyali Owa Bioosi, Wele owe bakuuka benywe alikho amuelesia.

² Mukhatasakho liosi liosi khu niko ese mulakile tawe, lundi mukharusiakho liosi liosi tawe. Ria kamalaka ka Wele Omunyali Owa Bioosi, Wele wenywe, niko muelesie enywe.

³ Enywe mwabene mwabona niko Wele Omunyali Owa Bioosi akhola a sikulu sia Baali-peori. Eera buli mundu owasaaya Baali,

⁴ne kakhali enywe mumwasuubila Wele Omunyali Owa Bioosi, Wele wenywe mu siili balamu khukhwola endaalo yino.

⁵“Lola ese namwekisia enywe kamalaka koosi nga Wele Omunyali Owa Bioosi, Wele wase ne aandaka, mukhoya mukhole khuloondekhana ne nako ne mucha mu sibala nisio mucha khumenya.

⁶Ba barekeerefu mukhuria kamalaka kano. Ne mukhola murio, mulekesia babaandu be chikholo chichiindi muli enywe muli bakesi lundi be liiulila.

⁷“Se eliio ekholo ekiindi yakhaba ne eli eye kamaani kamakali eli ne wele ooli siimbi ne nayo, nga Wele Omunyali Owa Bioosi, Wele wefwe ne ali nafwe tawe. Buli lwosi ne khwenya buyeeti khumusaba, Wele Omunyali Owa Bioosi abechanga siimbi ne nafwe.

⁸Se eliio ekholo ekiindi yakhaba ne eli eye kamaani lukali, eeli ne kamalaka kaali busa nga niko ese mwekeesie enywe endaalo yino tawe.

⁹Ba barekerefu nio mulekhe khukhwibilila niko mwabona ne chimoni chenywe. Boolela babaana benywe ne babechukhulu benywe.

¹⁰Khebulila endaalo niyo mwemela ebweeni wa Wele Omunyali Owa Bioosi, Wele wenywe a sikulu sia Sinai[3]. Wele Omunyali Owa Bioosi amboolelamo ali, ‘Buusia babaandu alala. Nenya baulile nilio nenya khuloma. Nio beyike khuuba ne liiria khwise. Biise bioosi nibio balimenyela mu sibala baliekisia babaana babwe khuuba ne liiria khwise.’

¹¹ “Boolela babaana benywe nga mwacha mwema mu maayo mwe sikulu sisiaba ne sifuniikhwe ne lifuumbi lisiro ne sisiilima ne kumulilo kukwatirira kwacha mu ngaaki.

¹²Baboolele nga Wele Omunyali Owa Bioosi ne alomaloma ne nanywe khukhwama mu mulilo, nga ne mwamuulila ne alikho alomaloma ne se mwamubonakho mu sifwaanani siosi siosi tawe.

¹³ Amuboolela ke endakaano yewe niyo aakhola ne nanywe mala aamuboolela khuria kamalaka kewe ekhumi. Aakaandika khu mabaale kabili.

¹⁴ Wele Omunyali Owa Bioosi amboolela ese mweyikie enywe kamalaka koosi niko mularia mu sibala nisio muli siimbi khwingilamo.

¹⁵“Endaalo niyo Wele Omunyali Owa Bioosi aalomaloma khwinywe khubirira mu mulilo khu sikulu sia Sinai, se mwabonakho efwaani yosi yosi tawe. Khwako ba barekerefu.

¹⁶ Mukhakhola murio mwakhola bubwoni khulwe khukhwikholela bifwaani bie sisiindu siosi siosi siakhaba sio omundu owe siseecha namwe owe siikhasi tawe.

¹⁷ Mukhekholelakho sifwaani sie esaang'i namwe enyuni,

¹⁸namwe sie sisiindu siosi siosi simoola namwe eng'eeni tawe.

¹⁹Mukhakhola murio mwasaaya bie mu ngaaki nga enyanga namwe kumwesi namwe ching'enieesi namwe sisiindu siosi siosi sie mu ngaaki tawe. Ebio bili bibiindu nibio Wele Omunyali Owa Bioosi, Wele wenywe aelesia babaandu babaandi boosi buli abuundu khu sibala khubisaaya.

²⁰ Ne kakhali enywe Wele Omunyali Owa Bioosi aamubukula amurusia khukhwama mu Misiri, sibala sisiaba nga sisiooso khwinywe nio mube babaandu be kumukabwa kwewe nga ne muli luno.

²¹ Khutasa khwako, Wele Omunyali Owa Bioosi ambambila ese lirima sikila enywe, nio echuba ali ese se nambukha luluuchi lwa Yoritani tawe. Amboolela ali ese se khache mu sibala silayi nisio niye alikho acha khumuelesia enywe nga kumukabwa tawe.

²²Ese ndafwila mu sibala sino. Se ndambukha luluuchi tawe. Ne kakhali enywe muli siimbi khulwambukha mala mubukule kamaloba kengakha ako.

²³Ba barekerefu. Mukhebilila endakaano niyo Wele Omunyali Owa Bioosi, Wele wenywe akhola ne nanywe tawe. Mukhakhola murio mwekholela bifwaani nibio; Wele Omunyali Owa Bioosi, Wele wenywe aamukaania enywe tawe,

²⁴ sikila Wele Omunyali Owa Bioosi, Wele wenywe ali ne likhendekha, ali nga kumulilo kuburukha.

²⁵“Akhaba enyuma we khumenya mu sibala khulwe siise sileeyi ne khusaala babaana ne babechukhulu, lundi mwasaakhulua, mukhakhola bubwoni khulwe khukhwikholela sifwaani sie sisiindu siosi siosi tawe. Buno buli bubwoni ebweeni wa Wele Omunyali Owa Bioosi, Wele wenywe. Ne mukhola murio mulaambia Wele Omunyali Owa Bioosi lirima.

²⁶Likulu ne liloba bili buloli khwinywe endaalo yino, mwaba ne mukharia Wele Omunyali Owa Bioosi tawe, mulabunisibwa elala mu sibala nisio mulikho mucha khwambukha Yoritani mala mwingisie. Se mucha khumenyamo siise sileeyi tawe.

²⁷ Wele Omunyali Owa Bioosi alamusalanisia enywe mu baandu Be chikholo chichiindi, lundi mube batiiti mu kholo nimwo Wele Omunyali Owa Bioosi alimusalanisiamo.

²⁸Ebweeneyo mulikholela bawele ba bakholwa ne babaandu, bababechwa khukhwama khu mirongooro ne khu mabaale. Baliba bawele bakhanyala babona namwe baulila, namwe balia, namwe baunyila tawe.

²⁹ Ne kakhali akhaba ebweeneyo mukhaenje Wele Omunyali Owa Bioosi, Wele wenywe, mwaba ne mu muenja ne kumwoyo kwenywe kwoosi mukhamunyoole.

³⁰Kamakhuwa kano ne kamwekholekhakho mala mube mu butinyu mu biise ebio, muliyuukha khu Wele Omunyali Owa Bioosi, Wele wenywe mala mumuulile.

³¹Wele Omunyali Owa Bioosi, Wele wenywe ali owe siisa. Se alimulekha enywe, namwe amubunie, namwe ebilile endakaano niyo akhola ne bakuuka benywe tawe.

³²“Yibaasia ke biise bibiabira, mu biise nibio mwaba ne mukhasaalwa tawe. Lola enyuma khukhwola khu biise nibio Wele abaang'anilamo omundu khu sibala. Lola buli abuundu khu sibala. Sisiindu siosi siosi siboofu nga sino sisiekholekhakho namwe siauliilikhakho ku?

³³Babaandu bosi bosi, ba baamenya enyuma we khuulila Wele ne alomaloma khu nibo khubirira mu mulilo nga enywe ne mwaulila balikhoo ku?

³⁴Namwe wele yesi yesi oweaana khucha mala abukule babaandu be ekholo khukhwama mu kholo ekiindi, mala abakhole babe babewe nga Wele Omunyali Owa Bioosi, Wele wenywe ne aamukholela enywe mu Misiri alikhoo ku? Wele Omunyali Owa Bioosi amukholela enywe ario khulwe khurumikhira kamakhako, bimanyisio, bie khuukia, liie, kamaani ne bibiindu bie khuriisia.

³⁵ Wele Omunyali Owa Bioosi amwekesie enywe lino nio mumanye muli niye ali Wele ne okundi se aliio tawe.

³⁶Aakhola enywe muulile kumumilo kwewe khukhwama mwikulu. Aamwekesia kumulilo kwewe kumukali khukhwama khu sibala mala alomaloma khwinywe khubirira mu mulilo okwo.

³⁷Wele Omunyali Owa Bioosi asiima bakuuka benywe, mala aamurobora enywe, omwene aamurusia enywe khukhwama mu Misiri khubirira mu bunyali bwewe bukali.

³⁸Aoona chikholo chichiindi chimboofu lundi che kamaani lukali khumukhila enywe nio aamureera enywe mala aamuelesia sibala siabwe khuuba sisienywe. Sili sisienywe khukhwola luno.

³⁹Manya mala musuubile endaalo yino, khebulila muli Wele Omunyali Owa Bioosi ali Wele mwikulu ne khu sibala Wele okundi se aliio tawe.

⁴⁰Khwako ria kamalaka kewe koosi niko ndikho muelesia enywe endaalo yino, mala mulaba bulayi, enywe ne lisaaye lienywe. Ne mukhola murio, mulayindila mu sibala nisio Wele Omunyali Owa Bioosi, Wele wenywe alikho amuelesia enywe mindali na mindali.”

⁴¹ Nio, Musa aara alubeka chingoba chitaru ebukwe we luluuchi lwa Yoritani.

⁴²Nicho omundu yaba anyala elukhilamo mala aona aaba ne eriire omundu ne akheteekile khumwiira tawe. Oyo ofwiile ne akhabechanga omusiku wewe tawe, omwiiri anyala elukhila mu lulala khu ngoba chino mala aona.

⁴³Khu be kholo eya Rubeni lwabayo lukoba lwa Beseri khu mweyeywe kwe mu sichiimi, khu be kholo eya Kati lwabayo lukoba lwa Ramoti, mu sibala sia Kileati ne khu be kholo eya Manase lwabayo lukoba lwa Kolani, mu sibala sia Bashani.

⁴⁴Kano kali kamalaka ka Wele niko Musa aelesia Baisiraeli.

⁴⁵Aababoolela ne bamalile khurura mu Misiri.

⁴⁶Baba engelekha we luluuchi lwa Yoritani mu litooma lilialoleelela Beti-peori, mu sibala sia Sihoni. Sihoni aba omwami owe Baamori ba bamenyanga Heshiboni. Musa ne babaandu ba Isiraeli baula Baamori nga Baisiraeli baba ne bamile e Misiri.

⁴⁷Baisiraeli bengisia sibala sia Sihoni ne sibala sia Oku omwami owa Bashani. Abo baba babaami babili be Baamori babamenyanga ebukwe we luluuchi lwa Yoritani.

⁴⁸Sibala sino siama khu lukoba lwa Aroeri khu ndulo khwe litooma lia Arinoni khukhwola khu sikulu sia Sirioni,[4] nisio sikulu sia Herimoni.

⁴⁹Lundi siatubaasia ne litooma lioosi liliaba ebukwe we luluuchi lwa Yoritani mala siacha khukhwola khu Nyanja eya chumbe eli asi we sikulu sia Pisika.