Read lubukusu Likh. 5 Bible Online

Likh. 5 - lubukusu bible

Likh. 5

¹Musa aalaanga alala babaandu ba Isiraeli boosi mala aababoolela ali, “Isiraeli enywe Ulila kamalaka niko ndikho muboolela endaalo yino. Keyike mala mube barekerefu khukaria.

²Wele Omunyali Owa Bioosi, Wele wefwe aakhola endakaano a sikulu sia Sinai.

³Se aakhola endakaano eyo ne bakuuka benywe bong'ene tawe, ne kakhali akhola ne nafwe fwesi khuli balamu endaalo yino.

⁴Wele Omunyali Owa Bioosi aalomaloma khwinywe moni na moni a sikulu khubirira mu mulilo.

⁵Ese nema akari wenywe ne Wele Omunyali Owa Bioosi, siise esio khumuboolela enywe niko aaloma. Nakhola ndio sikila enywe mwaria kumulilo, ne se mwanyala khuniina khu sikulu tawe.

⁶“Wele Omunyali Owa Bioosi aaloma ali, ‘Ese ndi Wele Omunyali Owa Bioosi, Wele wenywe owamurusia enywe khukhwama mu sibala sia Misiri munju eye bunasioobi.

⁷“ ‘Okhaba ne bawele babaandi nekhali ese tawe.

⁸ “ ‘Okhekholela bifwaani bie sisiindu siosi siosi siili mwikulu angaaki namwe khu sibala asi namwe mu meechi asi we sibala tawe.

⁹ Okhabinamila namwe obikholele tawe, sikila ese Wele Omunyali Owa Bioosi, Wele wowo ndi Wele owe likhendekha. Ese mbukuuma babaana sikila bubwoni bwe basaasi babwe, khukhwola khu bechukhulu ne khu bisoni biaabo babambiila ese.

¹⁰Ne kakhali nekesia busiime bwase bwa buli lwosi khu baandu bakali[5] babasiima ne khuuria kamalaka kase.

¹¹ “ ‘Okhakhola embelekeu khu lisina lia Wele Omunyali Owa Bioosi, Wele wowo tawe. Wele Omunyali Owa Bioosi se akhabeele omundu yesi yesi owinyaila lisina liewe tawe.

¹² “ ‘Khebulila endaalo eya sabato khulwe khukiliinda ebe endakatifu nga Wele Omunyali Owa Bioosi, Wele wowo ne akhulaka.

¹³ Khu ndaalo sita khola kimilimo kiowo kioosi.

¹⁴Ne kakhali endaalo eya saba eli endaalo eya sabato khu Wele Omunyali Owa Bioosi, Wele wowo. Khu ndaalo ng'eneyo okhakhola kumulimo kwosi kwosi tawe, obeele ewe namwe omwana wowo omusoleeli namwe omukhaana namwe nasioobi wowo owe siseecha namwe owe siikhasi namwe eeyi yowo namwe epunda namwe ekhaafu yowo namwe omukwa yesi yesi niye ewe omenyile ne naye tawe. Nokhola orio, akhaba nasioobi bowo bosi banyala baola.

¹⁵Khebulila oli waba nasioobi mu sibala sia Misiri, mala Wele Omunyali Owa Bioosi, Wele wowo aakhurusiamo mu ngila eye kamaani kamakali ne bunyali. Khwako Wele Omunyali Owa Bioosi, Wele wowo aakhulaka khuliinda endaalo eya sabato.

¹⁶ “ ‘Ria raraao ne maao, nga Wele Omunyali Owa Bioosi, Wele wowo ne akhulaka. Khola orio oyindile, lundi nio obe bulayi mu maloba niko Wele Omunyali Owa Bioosi, Wele wowo alikho akhuelesia.

¹⁷ “ ‘Okheera tawe

¹⁸ “ ‘Okhakhola bueeyi tawe

¹⁹ “ ‘Okheeba tawe

²⁰ “ ‘Okharusia buloli bukhali ng'ali khu wasio tawe

²¹ “ ‘Okhekoomba omukhasi wo wasio tawe, okhekoomba enju yewe tawe, akhaba kumukuunda kwewe namwe nasioobi wewe owe siseecha namwe owe siikhasi namwe eeyi yewe, namwe epunda yewe namwe siosi siosi siili sio wasio tawe.’

²² “Kano kali kamalaka niko Wele Omunyali Owa Bioosi amuelesia enywe mweesi a sikulu. Aalomaloma khubirira mu mulilo, mwifuumbi ne mu siilima. Aalomaloma ne kumumilo kwe angaaki ne se atasakho kakaandi tawe. Aakaandika khu mabaale kabili ke kamalaka, mala ambelesia ese.

²³“Nga sikulu siaba ne siburukha enywe mwaulila kumumilo khukhwama mu siilima. Nio babemeelesi benywe ne basaakhulu be mu chikholo chenywe banjichakho.

²⁴Baloma bali, ‘Wele Omunyali Owa Bioosi, Wele wefwe akhwekesie efwe luyali ne kamaani kewe. Ne efwe khwauliile kumumilo kwewe khubirira mu mulilo. Endaalo yino khwaboone khuli Wele anyala aalomaloma ne omundu mala omundu achiilila khuba omulamu.

²⁵Nono siina sikila khufwe? Kumulilo kumukali kuno kulakhubunia efwe. Khwaulila Wele Omunyali Owa Bioosi, Wele wefwe ne alomaloma lundi, khulafwa.

²⁶Aliio omundu yesi yesi owamenya, enyuma we khuulila Wele omenyile mindali ne alomaloma khukhwama mu mulilo nga efwe ne khuli ku?

²⁷Ewe Musa cha siimbi, mala orekeeresie buli siindu nisio Wele Omunyali Owa Bioosi, Wele wefwe akhuboolela. Enyuma wako, olakhuboolela efwe niko Wele Omunyali Owa Bioosi, Wele wefwe akhuboolele ewe. Ne efwe khulaulila mala khukhole nga aloma.’

²⁸“Wele Omunyali Owa Bioosi aaulila niko mwamboolela. Amboolela ali, ‘Nauliile niko babaandu bano balomile. Niko balomile koosi kali ng'ali.

²⁹Bakhoya babe ne liiria khwise bario buli lwosi ne khuria kamalaka kase koosi nio nibo ne lisaaye liabwe babe bulayi khulwa mindali na mindali.

³⁰Cha mala obaboolele oli, “Kobola mu maeema kenywe.”

³¹Ne kakhali ewe yiima siimbi nase, ne ese ndakhuboolela kamalaka koosi niko ocha khubeyikia. Bakhoya bakarie ne bali mu sibala nisio ndikho mbaelesia khuuba sisiabwe.’

³²“Khwako mukhoya mube barekerefu khukhola nga Wele Omunyali Owa Bioosi, Wele wenywe ne amulakile. Mukhakalekha tawe.

³³Khe murie koosi niko Wele Omunyali Owa Bioosi, Wele wenywe amulakile. Khola murio nio mumenye, lundi nio mube bulayi ne khuyindila mu maloba niko mulikho munyoola khuuba kakenywe.”