Read lubukusu Likh. 6 Bible Online

Likh. 6 - lubukusu bible

Likh. 6

¹“Lino lili lilaka nilio Wele Omunyali Owa Bioosi, Wele wenywe aandaka ese mwiyikie enywe. Murie kamalaka kano ne muli mu sibala nisio muli siimbi khwingisia mala mumenyemo.

²Enywe ne lisaaye lienywe khe murie Wele Omunyali Owa Bioosi, Wele wenywe khubirira mu khuria kamalaka kewe koosi niko ndikho muelesia enywe. Khola murio mu limenya lienywe lioosi nio muyindile.

³Khwako Isiraeli ulila mala mube barekerefu khukaria nio mube bulayi lundi nio mutasiikhe lukali ne mumenya mu sibala nisio kamabeele ne bubuukhi biseleetekhanga nisio Wele Omunyali Owa Bioosi, Wele owe bakuuka benywe aamusuubisia enywe.

⁴ “Isiraeli ulila: Wele Omunyali Owa Bioosi, Wele wefwe, ali mulala.

⁵ Okhoya osiime Wele Omunyali Owa Bioosi, Wele wowo ne kumwoyo kwowo kwoosi, ne kamaani kowo koosi.

⁶ Khebulila kamalaka niko ese ndikho khuelesia endaalo yino.

⁷Yekisia babaana bowo kamalaka kano. Kalomalome ne wikhaale munju mwowo, lundi ne olikho okeenda khu ngila, ne olikho ouluukha lundi ne olikho okhola kimilimo.

⁸Kaboe khu makhono kowo mala okafware mwikosi kabe kakhukhebusia.

⁹Kaandike khu lwiiki lwowo ne khu bilibwa biowo.

¹⁰ “Wele Omunyali Owa Bioosi, Wele wenywe alikho acha khumuyila enywe mu sibala nisio aalaka bakuuka benywe Aburahamu, Isaaka ne Yakobo ali akhamuelesie enywe. Sibala esio sili ne chingoba chimboofu lundi chindayi nicho mukhombakha tawe.

¹¹Lundi sili ne chinju chichechula bibiindu bilayi nibio mukharaamo tawe. Lundi sili ne chisebele nicho enywe mukhaayaba tawe, nende kamaruuti ne kimikuunda kie kimiseituni nikio enywe mukhabiaala tawe. Wele Omunyali Owa Bioosi ne amureera mu sibala sino, mala mulie mwikure,

¹²mukheebilila Wele Omunyali Owa Bioosi owamurusia mu Misiri niio mwaba banasioobi tawe.

¹³ Ria Wele Omunyali Owa Bioosi, Wele wenywe, mukholele ne khumusaaya niye yeng'ene ne khukhwechuba mu lisina liewe.

¹⁴Mukhasaaya bawele be babaandu babaandi nibo mumenyile nabo tawe.

¹⁵Wele Omunyali Owa Bioosi, Wele wenywe ooli mwinywe yuno ali Wele owe likhendekha. Mwaba ne mukhakhola niko enya tawe, alimuambila lirima mala amubunie murure khu sibala.

¹⁶ “Mukhara Wele Omunyali Owa Bioosi, Wele wenywe khwikela nga mwakhola ne muli Masa tawe.

¹⁷Mube barekerefu mu khuria kamalaka ka Wele Omunyali Owa Bioosi, Wele wenywe niko aamuelesia enywe.

¹⁸Khola kaali kamaluungi lundi kamalayi, ebweeni wa Wele Omunyali Owa Bioosi nio mube bulayi, nio mwingisie ne khubukula kamaloba kamalayi ke kumukabwa. Kali kamaloba niko Wele Omunyali Owa Bioosi aasuubisia khuelesia bakuuka benywe.

¹⁹Mulaoona basiku benywe baalimo boosi, basiku baali ebweeni wenywe nga Wele Omunyali Owa Bioosi ne asuubisia.

²⁰“Mu siise sisiicha babaana benywe balimureeba enywe bali, ‘Sifuno sie kamalaka kano sili siina?’

²¹Baboolele muli, ‘Efwe khwaba banasioobi bo mwami Farao owe Misiri. Ne kakhali Wele Omunyali Owa Bioosi aakhureesia efwe khubirira mu bunyali bwewe bukali.

²²Wele Omunyali Owa Bioosi aakhola kamaya nende bie khuukia biboofu lundi biriisia mu sibala sia Misiri ne khu Farao ne enju yewe.

²³Akhurusia efwe khukhwama Misiri khukhureera efwe ano ne khukhuelesia efwe sibala sino, nga ne aaba ne aasuubisia bakuuka befwe.

²⁴Nio Wele Omunyali Owa Bioosi, Wele wefwe aakhulaka efwe khurie kamalaka kano koosi ne khumuria niye. Khwaaba ne khukhola khurio, khuliba bulayi buli lwosi nio achiililile khu khuliinda efwe nga luno.

²⁵Khwaaba ne khuria buli sisiindu mu burekeerefu ebweeni wa Wele Omunyali Owa Bioosi, Wele wefwe nga aakhulaka, aba silaba sisiindu sie buluungi.’ ”[6]