Read lubukusu Likh. 7 Bible Online

Likh. 7 - lubukusu bible

Likh. 7

¹ “Wele Omunyali Owa Bioosi, Wele wenywe alamuyila mu sibala nisio mucha khwingisia. Alaoona chikholo chingali chiili ebweeni wenywe. Alamuonelamo chikholo saba chimboofu lundi che kamaani khumukhila enywe chiruremo. Chikholo echo chili che Bahiti, Bakirikashi, Baamori, Bakanaani, Baperisi, Bahibi ne Bayebusi.

²Wele Omunyali Owa Bioosi, Wele wenywe akhare babaandu bano mu bunyali bwenywe mala mubaule. Mukhoya mubabunisilie elala. Mukhakholakho endakaano yosi yosi ne nabo, namwe mubakholele siisa tawe.

³Mukhakhwanakho ne nabo tawe, lundi mukhafukiilila babaana benywe basoleeli nende bakhaana bayilana nabo tawe.

⁴Mwakhola murio, babaandu abo baliyuusia babaana benywe balekhe khuloonda Wele Omunyali Owa Bioosi mala basaaye bawele babaandi. Nio Wele Omunyali Owa Bioosi akhamuambile enywe lirima mala amubunie khangu murure mu sibala.

⁵ Ne kakhali mukhabakholele muri: Mukhatechulake chialutare chabwe, muumbulake chinjeko chabwe ne khurema bifwaani biabwe bia wele Asiera. Lundi mwosie bifwaani biabwe.

⁶ Mukhakhole lino sikila enywe muli batakatifu ba Wele Omunyali Owa Bioosi, Wele wenywe. Aamurobora enywe khukhwama mu baandu be khu sibala boosi mube babaandu be kumukabwa kwewe.

⁷“Wele Omunyali Owa Bioosi se aamusiima enywe mala aamurobora sikila mwaba bakali khukhila babaandu babaandi tawe. Enywe mwaba ekholo endiiti khu sibala sioosi.

⁸Ne kakhali Wele Omunyali Owa Bioosi aamusiima enywe mala eenya khuliinda liliechubo nilio aakhola khu bakuuka benywe. Lilienelio nilio likila Wele Omunyali Owa Bioosi ne amuonia enywe ne kamaani kewe kamakali mala aamukhola mube balekhuule khukhwama munju eye bunasioobi, khukhwama mu bunyali bwa Farao omwami owa Misiri.

⁹ Khwako manya muli Wele Omunyali Owa Bioosi, Wele wenywe ali Wele. Lundi ali omusuubilifu. Aliindanga endakaano ne khukhwekesia busiime bwewe bwa buli ndaalo mu selukho chingali chaabo ba bamusiima niye ne khuria kamalaka kewe.

¹⁰Ne aananga kumunaanio khwaabo babamubiila niye mu ngila eye khubabunia. Se alekhaanga khuaana kumunaanio khwaabo babamubiila tawe.

¹¹Khwako ba barekerefu khukhola khuloondekhana ne kamalaka niko ndikho muelesia enywe luno.

¹² “Mwaaba ne murekeeresia kamalaka kano mala mwakaliinda ne khukaria, Wele Omunyali Owa Bioosi, Wele wenywe akhaliinde endakaano ne khumwekesia enywe busiime bwa buli lwosi, nga ne asuubisia bakuuka benywe.

¹³Alamusiima enywe ne khumubiita enywe chikhabi, nio amukhole mutasiikhe mube bakali mala mube ne babaana bakali. Alaana chikhabi khu mikuunda kienywe, nio mube ne bibiaamo, endali ne kamafura. Alamubiita enywe chikhabi khulwe khumuelesia chikhaafu chingali ne kamakheese. Alamueleselia enywe chikhabi chino choosi mu sibala nisio aasuubisia bakuuka benywe ali alimuelesia enywe.

¹⁴Enywe mulibiitwa chikhabi khukhila chikholo choosi. Buli omuseecha namwe omukhasi aliba no mwana. Ne chikhaafu chenywe se chikhasuune tawe.

¹⁵Wele Omunyali Owa Bioosi aakhamurusiekho bulwaale bwoosi. Bulwaale bumayaanu bwe e Misiri nibwo mwamanya se bulimwichakho tawe. Ne kakhali Wele Omunyali Owa Bioosi alielesia bulwaale obwo boosi babamubiila enywe.

¹⁶Ne mukhoya mubunie babaandu boosi nibo Wele Omunyali Owa Bioosi, Wele wenywe alira mu bunyali bwenywe. Mukhabakholela siisa namwe mwasaaya bawele babwe tawe, sikila lilienelio liliba kumureko khwinywe.

¹⁷“Mukhaloma muli, ‘Babaandu bano bali be kamaani khu khukhila efwe, nono se khunyala khwabarusiamo tawe.’

¹⁸Mukhabaria tawe. Ne kakhali khebulila niko Wele Omunyali Owa Bioosi, Wele wenywe aakholela Farao omwami owe Misiri ne khu baandu bewe boosi.

¹⁹Khebulila kamakhako kamakali niko mwabona, bimanyisio ne bibiindu bie khuukia ne kamaani ne bunyali bukali nibwo Wele Omunyali Owa Bioosi, Wele wenywe arumikhira khumukhola enywe mube balekhuule. Alibunia babaandu nibo muriire bano boosi, mu ngila ng'eneyo.

²⁰Khutasa khwako, Wele Omunyali Owa Bioosi, Wele wenywe alabarumira nibo butinyu[7] khukhwola nga basiili balamu mwinywe ne babekisa balibunisibwa.

²¹Mukharia babaandu bano tawe, sikila Wele Omunyali Owa Bioosi, Wele wenywe ali ne nanywe, ali Wele omukali lundi niye babaandu baria.

²²Akhaoone chikholo chino chirure ebweeni wenywe siangeekhe siangeekhe. Se mulanyala khuchibunia choosi khangu busa mu siise silala tawe, sikila mwaba ne mukhola murio chisaang'i che mundaa chilatasikha mala chibe ne kamaani lukali khwinywe.

²³Wele Omunyali Owa Bioosi, Wele wenywe akhare basiku benywe mu bunyali bwenywe mala abakoyaanie bamwiembeelele khukhwola nga ne babunisibwa.

²⁴Akhare babaami babwe mu bunyali bwenywe. Mukhabeere mala balibililwa se aliio olinyala khumukhiingilila enywe tawe, mulabunia buli mundu.

²⁵Mulaambia bifwaani bie bawele babwe biye. Mukhekoomba efwesa namwe esahabu eeli khu bifwaani tawe lundi mukhabukula ebe eyenywe tawe. Mwaba ne mukhola murio, ebio bilaba kimireko khwinywe. Bibiindu ebio bisinya Wele Omunyali Owa Bioosi, Wele wenywe.

²⁶Mukhareerakho silala khu bifwaani bino mu chingo chenywe tawe, busa mukhola murio mwaba silaamo nga nibio. Bibukule khuba biibi lundi bisinya, sikila bili asi we silaamo sia Wele Omunyali Owa Bioosi.