Read lubukusu Likh. 8 Bible Online

Likh. 8 - lubukusu bible

Likh. 8

¹“Ria mu burekeerefu kamalaka koosi niko naama khumuelesia enywe endaalo yino, nio mumenye, mutasiikhe mube bakali mala mwingisie sibala nisio Wele Omunyali Owa Bioosi asuubisia khuelesia bakuuka benywe.

²Khebulila nga Wele Omunyali Owa Bioosi, Wele wenywe ne amurangirira enywe khu lukeendo luleeyi khubirira mu sichiimi kimiiko kibirire kamakhumi kane kino. Aamukhola mweboombia mala aamukela enywe nio amanye nisio mwenya khukhola, ne munyala mwaria kamalaka kewe namwe tawe.

³ Aamukhola enywe mweboombia mwaulila enjala, mala amuelesia mana mwalia, siakhulia nisio enywe ne bakuuka benywe mwaba musiili khuliakho tawe. Aakhola lino khumwekesia enywe ali omundu se amenya khulwe kumukaati kwong'ene tawe, ne kakhali khu buli sisiindu siosi siosi nisio Wele Omunyali Owa Bioosi aloma.

⁴Chingubo chenywe se chatabuukhe khulwe kimiiko kamakhumi kane kino namwe enywe se mwabimbile bikele tawe.

⁵Manya nono muli Wele Omunyali Owa Bioosi, Wele wenywe amuukuuma enywe nga paapa owe babaana ne auukuuma babaana bewe.

⁶Nono, mukhoya murie kamalaka ka Wele Omunyali Owa Bioosi, Wele wenywe. Loonda chingila chewe mala mu murie niye.

⁷Wele Omunyali Owa Bioosi, Wele wenywe alikho amureera enywe mu sibala siili silayi sie chisebele che kameechi chichukha mu matooma ne mu bikulu.

⁸Sili sibala sie ngaanu ne shayiri, chisabibu, chinduli, kamatuunda kamakomanga, kimiseituni ne bubuukhi.

⁹Kali kamaloba niko muliliamo siakhulia siikhawa tawe, se mulitaamba tawe, chinyaanda che sibala esio chili bichuuma, ne munyala mwayaba koopa khukhwama mu bikulu biasio.

¹⁰Mukhalie mala mwikure mala musiime Wele Omunyali Owa Bioosi, Wele wenywe khulwe khumuelesia enywe sibala sie ngakha.

¹¹ “Ba barekerefu ne busa mukhola murio mwebilila Wele Omunyali Owa Bioosi, Wele wenywe khulwe khulekha khuria kamalaka kewe niko ndikho muelesia enywe endaalo yino tawe.

¹²Mukhalie mwikure, mwombakhe chinju chindayi che khumenyamo.

¹³Chikhaafu chenywe ne kamakheese, efwesa yenywe ne esahabu, ne bibiindi bioosi nibio muliba nabio bilitasikha.

¹⁴Ne munyoolile bibiindu bino bioosi mukheniinia mala mwebilila Wele Omunyali Owa Bioosi, Wele wenywe owamureesia enywe khukhwama Misiri niio mwaba banasioobi tawe.

¹⁵Wele Omunyali Owa Bioosi aamurangirira mwabira mu sichiimi sibalaayi lundi siriisia, niio chindemu che bufwisi ne walute chaba. Sichiimi esio siaba sisioomu, lundi siikhali ne kameechi tawe. Wele Omunyali Owa Bioosi aakhola kameechi kaama mu lwanda.

¹⁶Aamuelesia enywe mana mu sichiimi mwalia, siakhulia nisio bakuuka benywe baba ne bakhaliakho tawe. Amukholela ario nio amukhole mweboombie lundi amukele nio ekhumaliilikha amukholele bulayi.

¹⁷Mukhaloma muli, ‘Kamaani kefwe ne bunyali bwefwe nibio bibiakila khwanyoola buiinda buno tawe.’

¹⁸Mukhoya mukhebulile Wele Omunyali Owa Bioosi, Wele wenywe. Niye omuelesianga bunyali bwe khuba baiinda. Akholanga ario sikila aliinda endakaano niyo aakhola ne bakuuka benywe nga ne kali luno.

¹⁹Ne mwaba ne mwibilila Wele Omunyali Owa Bioosi, Wele wenywe mala mwasaaya bawele babaandi ne khubakholela, ese mukaania enywe luno ndi ng'ali mukhabune.

²⁰Mulibuna nga chikholo nicho Wele Omunyali Owa Bioosi alakholanga ne chibuna enywe ne muloleleele. Kaliba kario mwaba ne mukharia Wele Omunyali Owa Bioosi, Wele wenywe tawe.