Read lubukusu Likh. 9 Bible Online

Likh. 9 - lubukusu bible

Likh. 9

¹“Isiraeli ulila. Endaalo yino oli siimbi khwambukha Luluuchi lwa Yoritani mala wingisie sibala sie chikholo chimboofu lundi che kamaani lukali khukhukhila ewe. Chingoba chabwe chili chimbalaayi, ne kamasiisi kamaleeyi kakaniina mu ngaaki.

²Babaandu abo bali baleeyi lundi be kamaani. Bali be lisaaye lia Anaki, mwaulila ne liboolwa lili, ‘Mbao onyala eema ebweeni we Baanaki tawe.’

³Khwako manya endaalo yino muli Wele Omunyali Owa Bioosi, Wele wenywe niye olarangira ebweeni wenywe nga kumulilo kutirira. Akhabaule mala ababunie. Ne enywe mukhabaoone mala mubabunie khangu nga Wele Omunyali Owa Bioosi amulakile.

⁴“Enyuma wa Wele Omunyali Owa Bioosi, Wele wenywe khurusiamo babaandu bano, mukhaloma muli, ‘Khwaba baluungi nio liakila Wele Omunyali Owa Bioosi akhureera mu sibala sie engakha sino tawe.’ Ne kakhali Wele Omunyali Owa Bioosi akhatimanie chikholo echo sikila bumayaanu bwacho.

⁵Wele Omunyali Owa Bioosi, Wele wenywe se alikho atimania chikholo chino ebweeni wenywe sikila buluungi bwenywe namwe bung'ali bwenywe tawe. Ne kakhali alikho akhola ario sikila bumayaanu bwe chikholo chino nio echusie likhuwa nilio aalaka bakuuka benywe Aburahamu, Isaaka ne Yakobo.

⁶Khwako manya muli Wele Omunyali Owa Bioosi, Wele wenywe se alikho amuelesia enywe sibala sie ngakha sino sikila muli baluungi tawe. Enywe muli babaandu be sileka.

⁷“Mukhebilila nga mwaambia Wele Omunyali Owa Bioosi, Wele wenywe lirima likali mu sichiimi tawe. Khukhwama khu ndaalo niyo mwarekukhilakho khukhwama e Misiri khukhwola khu ndaalo niyo mwoleelekho ano, mwaba barengu khu niye.

⁸Akhaba a sikulu sia Sinai mwaambia Wele Omunyali Owa Bioosi lirima likali mala aaba eenya khumubunia enywe.

⁹ Naniina nacha khu sikulu khukhwakaanila kamabaale ke kamalaka, kamalaka ke endakaano niyo Wele Omunyali Owa Bioosi akhola ne nanywe. Namenyayo chindaalo kamakhumi kane mala se nalia namwe nanywa sisiindu siosi siosi tawe.

¹⁰Wele Omunyali Owa Bioosi ambelesia ese kamabaale kabili niko omwene aandikakho. Kamabaale ako kabaakho kamakhuwa koosi niko Wele Omunyali Owa Bioosi aalomaloma ne nanywe khukhwama mu mulilo khu ndaalo niyo mwebusiliakho a sikulu.

¹¹Enyuma we chindaalo kamakhumi kane, Wele Omunyali Owa Bioosi ambelesia ese kamabaale kabili ke kamalaka ke endakaano.

¹²“Nio Wele Omunyali Owa Bioosi amboolela ali, ‘Yiikha asi khangu sikila babaandu bowo, nibo warangirira khukhwama mu Misiri bakholile kakhali ng'ali tawe. Bayuukhile khale balekhile niko nabalaka. Bekholeele sifwaani.’

¹³“Khutasa khwako, Wele Omunyali Owa Bioosi amboolela ali, ‘Naboone ndi babaandu bano bali ne sileka.

¹⁴Ndekhe mala mbabunie, nio akhabao omundu olibakhebulila lundi tawe. Ne ese, ndakhukhola ewe obe ekholo emboofu lundi eye kamaani khukhila nga nibo ne bali.’

¹⁵“Nio nayukha nekha khukhwama khu sikulu. Ne naba nasutile kamabaale kabili kakaandikwakho endakaano. Chimemu che kumulilo charuranga khukhwama mu sikulu.

¹⁶Nalola mala nabona ndi enywe mwaba mwakaluukhane khale mwalekhile niko Wele Omunyali Owa Bioosi aba ne amulaka. Mwaba mwekholeele sifwaani sie euunwa endoro.

¹⁷Nio ese, namwaata asi kamabaale kabili ke kamalaka ako, nakaarakakila ebweeni wenywe.

¹⁸Nakona mafumala ebweeni wa Wele Omunyali Owa Bioosi nga yaba ne nakholanga khu ndaalo kamakhumi kane. Se nalia namwe nanywakho sisiindu tawe. Nakhola ndio sikila enywe bubwoni bwoosi nibwo mwakhola ebweeni wa Wele Omunyali Owa Bioosi mala mwamuambia lirima.

¹⁹ Ese naria lirima lirafu lia Wele Omunyali Owa Bioosi sikila enywe. Naria ndi Wele Omunyali Owa Bioosi eenya khumubunia enywe. Ne kakhali biise ebio, aambulila ese.

²⁰Lundi, Wele Omunyali Owa Bioosi, aakhalalila Aruni lukali eenya khumwiira. Ne kakhali siise sienesio nasabila Aruni yesi.

²¹Ese nabukula sisiindu simayaanu, sifwaani sie euunwa nisio mwakhola nasioosia, nasiarakaka, nasisia siaba sinosie nga lipukhuulu. Naanya lipukhuulu elio mu luuchi lulwama mu sikulu.

²² “Lundi enywe, mwaambia Wele Omunyali Owa Bioosi, Wele wenywe lirima nga mwaba Tabera, Masa, ne Kiburoti-Hataaba.

²³ Ne nga aamuruma khukhwama Kadeshi-barinea namulaka muche mubukule sibala nisio aaba ne alikho amuelesia enywe mwingisie, mwamukholela sileka. Se mwamusuubila namwe mwamuria tawe.

²⁴Mwaba barengu khu Wele Omunyali Owa Bioosi khukhwama nga ese ne mumanya enywe.

²⁵“Nio nakona mafumala ebweeni wa Wele Omunyali Owa Bioosi khu ndaalo kamakhumi kane echo, sikila Wele Omunyali Owa Bioosi aaba abisiisie khumubunia enywe.

²⁶Ne kakhali ese nasaba Wele Omunyali Owa Bioosi ndi, ‘Ee Omwami WELE, okhabunia babaandu bowo ne kumukabwa kwowo tawe. Ewe wamwene owabareesia khukhwama Misiri ne kamaani kowo kamakali ne bunyali.

²⁷Khebulila bakholi bowo Aburahamu, Isaaka ne Yakobo mala okhaloleelesia sileka sie babaandu bano namwe, bubi ne bubwoni bwabwe tawe.

²⁸Wakhola orio, be mu sibala nimwo wakhurusiamo baliloma bali, “Wele Omunyali Owa Bioosi se anyala khubayila mu sibala nisio aabalaka tawe sikila beele ababiila. Abarusia e Misiri nio abeerere mu sichiimi.”

²⁹Kakhaba kario babaandu bano bali babowo, nibo ewe warusia mu Misiri ne bunyali bwowo bukali ne kamaani.’