Read lubukusu Yn. 1 Bible Online

Yn. 1 - lubukusu bible

Yn. 1

¹Mu khurakikha, Elomo aabao, mala Elomo aaba ne Wele, lundi Elomo aaba Wele.

²Khukhwama mu khurakikha, Elomo aaba ne Wele.

³Wele abuumba bibiindu bioosi khubirira mu niye, se siliio sisiindu na silala mu bibuumbe bioosi sisiakholwa niye ne akhaliio tawe.

⁴Elomo aaba sinoko sie bulamu ne bulamu buno bwareera buwaanga mu baandu.

⁵Buwaanga bukhosianga mu siilima ne sisiilima se siabuminyile tawe.

⁶ Wele aruma omurumwa wewe Yoana,

⁷owecha khuboolela babaandu ke buwaanga, nio boosi baulile burume mala basuubile.

⁸Niye omwene se aba buwaanga tawe; echa khuboola ke buwaanga.

⁹Buno bwaba buwaanga bwa ng'ali, buwaanga bubwiicha mu sibala ne khukhosia khu buli mundu.

¹⁰Elomo aaba mu sibala ne akhaba Wele ne abuumba sibala khubirira mu niye, sibala se siamumanya tawe.

¹¹Eecha mu sibala siewe sisiene ne kakhali babaandu bewe se bamwakaanila tawe.

¹²Kakhaba kario balala bamwakaanila mala basuubila mu niye nio abaelesia bunyali bwe khuba babaana ba Wele.

¹³Se baba ba Wele mu ngila eya busiele, eye khusaalwa nga babaana bo mundu tawe; Wele omwene niye owaba Raarawabwe.

¹⁴Elomo oyo eekhola aaba Omundu mala eechula kumwalaalo ne bung'ali, aamenya mwifwe. Khwabona luyali lwewe, luyali nilwo anyoola nga Omwana Omuteelwa owa Paapa.

¹⁵Niye Yoana aalomalomakho ali, “Yuno niye naloma ndi, ‘Alikho eecha enyuma wase, ne kakhali ali omukali khu khukhila ese sikila aabao ese ne khasaalwa tawe.’ ”

¹⁶Akhubiitanga efwe fweesi chikhabi chingali khukhwama mu bwichufu bwe kumwalaalo kwewe.

¹⁷Wele aana Lilaka khubirira khu Musa ne kakhali kumwalaalo ne bung'ali biechela mu Yesu Kristo.

¹⁸Se aliio Omundu owabonakho Wele tawe, ne akhali Omwana ooli Wele, lundi ooli ne Paapa, omwene oyo niye oomanyisia Wele khwifwe.

¹⁹Bayaudi be bunyali mu Yerusalemu baruma basaayi balala ne Balawi khu Yoana bamureebe bali, “Ewe niwe naanu?”

²⁰Yoana se aloba khu bakobosia tawe, ne kakhali alomaloma busa abuwaanga ali, “Ese se ndi Kristo tawe.”

²¹ Bamureeba bali, “Nono ewe niwe naanu? Ewe oli Elicha?” Yoana abakobosia ali, “Se ndi niye tawe.” Bamureeba bali, “Ewe niwe omung'oosi chana?” Abakobosia ali, “Tawe.”

²²Bamuboolela bali, “Nono khuboolele, Khwenyekha khukobosele bakhurumire likhuwa. Ewe wamwene welanga oli naanu?”

²³ Yoana aabakobosia mu khurumikhira kamakhuwa niko omung'oosi Isaya aaloma: “Ese ndi kumumilo kwo mundu oboola ne ali mu sichiimi ali, ‘Kololosia engila Omwami abirirekho.’ ”

²⁴Barumwa barumirwe ne Bafarisayo,

²⁵bareeba Yoana bali, “Waaba ne okhali Kristo, namwe Elicha namwe omung'oosi tawe, siina sikila ne obatiisia?”

²⁶Yoana aabakobosia ali, “Ese mbatiisia ne kameechi, ne kakhali omundu mulala aamwimilemo niye enywe mukhamanyile tawe.

²⁷Alikho echa enyuma wase, ne ese se nolaana aakhaba khukangulula biraaro biewe tawe.”

²⁸Kano koosi kakholekha mu Betania, ebukwe we luluuchi lwa Yoritani, niio Yoana aabatiisilianga.

²⁹Endaalo eloondakho Yoana abona Yesu ne echa niio ali. Aloma ali, “Lola Limeeme lia Wele lirusiao bubwoni bwe sibala!

³⁰Yuno niye nalomalomengekho nga naboolile ndi, Omundu alikho echa enyuma wase, mala ali omukali khukhukhila ese, sikila abao ese ne khasaalwa tawe.

³¹Ese samwene se namumanya tawe, ne kakhali necha ne mbatiisia ne kameechi nio mumanyisie niye khu baandu ba Isiraeli.”

³²Ne Yoana arusia buloli bwewe ali: “Nabona Roho ne eekha nga liuusi khukhwama mwikulu mala aamubaakho.

³³Naba siili khumanya ndi niye tawe, ne kakhali Wele, owanduma khubatiisia ne kameechi aba aambooleele ali, ‘Olabona Roho ne eekha khu mundu; Omundu oyo niye oobatiisia ne Roho Omutakatifu.’ ”

³⁴Yoana aloma ali, “Namuboone niye, lundi ndusia buloli ndi ali Omwana owa Wele.”

³⁵Endaalo eloondakho Yoana aba emile ao lundi ne babeeka bewe babili,

³⁶nga abona Yesu ne alikho aabira aaloma ali, “Lola, elio lili Limeeme lia Wele!”

³⁷Babeeka babili chana baaulila ne aloma kano mala baloonda khu Yesu.

³⁸Yesu ekhebukha ababona ne bamuloondilekho, mala abareeba ali, “Mulikho muyiima siina?” Bamukobosia bali, “Rabii, omenyile waena?” (Likhuwa Rabii liboola lili, “Omwekisia.”)

³⁹Abakobosia ali, “Yiicha mubone.” (Chaba embi chisa ekhumi che ekolooba.) Nio bacha naye babona niio amenya mala bekhala naye endaalo eyo yoosi.

⁴⁰Mulala khwaabo aba Andereya wandaaye owa Simoni Petero.

⁴¹Ao ne nao anyoola wandaaye Simoni mala amuboolela ali, “Khwanyoolile Masiiya.” (Masiiya liboola, “Kristo.”)

⁴²Mala ayila Simoni khu Yesu. Yesu alola Simoni mala aloma ali, “Lisina liowo lili Simoni okhwa Yoana, ne kakhali okhalangwe Kefa.” (Lisina Kefa nilio Petero sifuno sialio “Lulwanda.”)

⁴³Endaalo eloondakho Yesu arura khucha Kalilaya. Anyoola Filipo mala amuboolela ali, “Nondekho!”

⁴⁴Filipo aba ama mu Betesaita, mu lukoba nimwo Andereya ne Petero bamenya.

⁴⁵Filipo anyoola Natanieli mala amuboolela ali, “Khwanyoolile oyo niye Musa aandikakho mu sitabu sie Lilaka, bang'oosi bosi baandika khu makhuwa kewe. Ali Yesu okhwa Yosefu, khukhwama e Nasareti.”

⁴⁶Natanieli naye areeba ali, “Silayi siosi siosi sinyala siama Nasareti ku?” Filipo akobosia ali, “Yiicha mala obone.”

⁴⁷Nga Yesu ne abona Natanieli namwichakho aboolela Natanieli ali, “Lola Omuisiraeli wa ng'ali okhalimo bubacha tawe!”

⁴⁸Natanieli amureeba ali, “Umanyile oriena?” Yesu akobosia ali, “Khubone nga obeele ne wikhaale aasi we kumutuli Filipo nakhakhulaanga tawe.”

⁴⁹Natanieli amukobosia ali, “Omwekisia, ewe oli Omwana owa Wele! Ewe oli Omwami owa Isiraeli!”

⁵⁰Yesu amukobosia ali, “Ewe osuubila sikila namakhuloma ndi khubone ne wikhaale aasi we kumutuli? Olabona bibiindu bikali biboofu khukhila lino!”

⁵¹ Mala ababoolela ali, Ndikho muboolela bung'ali mulabona likulu liekuukhe mala Malaika ba Wele baniina ne beekha khu Mwana wo Mundu.