Read lubukusu Yn. 10 Bible Online

Yn. 10 - lubukusu bible

Yn. 10

¹Yesu aloma ali, “Ndikho muboolela bung'ali, omundu ocha mu siiko sie kamakheese mala se engilila mu silibwa tawe ne kakhali abirira abuundu aandi osi osi, oyo ali omwifwi lundi omunuuli.

²Omundu owingilila mu silibwa ali omwaayi we kamakheese.

³Omuliindi owe silibwa amwikulilangayo, kamakheese kaulilanga kumumilo kwewe nga nalaanganga kamasina kaako buli sia lilala mala akarangirira akarusia enje.

⁴Enyuma we khukareera enje, akarangirira mala kamuloondakho, sikila kamanyile kumumilo kwewe.

⁵Se kanyala kaloonda khu mundu okundi busa tawe, kamwilukha, sikila se kamanyile kumumilo kwewe tawe.”

⁶Yesu ababoolela lukano luno ne se bamanyilisia nisio abakho tawe.

⁷Nio Yesu aboola lundi ali, “Ndikho muboolela bung'ali, Ese niise silibwa sie kamakheese.

⁸Babaandi boosi babeecha khale ebweeni wase bali babefwi lundi banuuli, ne kakhali kamakheese se kabarekeeresia nibo tawe.

⁹Ese niise silibwa. Yesi yesi obirira mwise alaonisibwa; alengila mukari ne khurura enje mala alanyoola kamaayilwe.

¹⁰Omwifwi echanga khukhwiba, khukhwira ne khukhwonaka khwong'ene. Ese nechile nio mwole khuba ne bulamu mu bwichufu.

¹¹“Ese niise omwaayi omulayi. Omwaayi Omulayi erusia khufwa khulwe kamakheese.

¹²Omukholi busa okhali omwaayi omwene makheese tawe, nabona sisuuche ne siicha elukha, alekha kamakheese nio sisuuche sitiila kamakheese ne khukasalanisia.

¹³Omukholi elukha sikila ali busa omuandike ne sabala kamakheese ne kali siindu khu niye tawe.

¹⁴Ese niise omwaayi omulayi. Manyile baali babaase ne babaase bamanyile ese.

¹⁵ Nga Paapa ne nase ne khumanyaane, mu ngila ng'eneyo sesi manyile kamakheese kase ne kosi kamanyile. Ese fukiilila khuaana bulamu bwase fwe, sikila niko.

¹⁶Kamakheese kase kakaandi kaliio kakhali mu siiko muno tawe. Khukhwola ngareere kosi; kalarekeeresia kumumilo kwase mala kalaba lituuli lilala no mwaayi mulala.

¹⁷“Paapa asiima ese sikila nafukiilila khuaana bulamu bwase, nio mbunyoole lundi.

¹⁸Se aliio omundu obukula bulamu bwase khukhwama khwise tawe. Mbuana mukhufukiilila khwase khwe mu bulekhuule. Ndi ne bunyali bwe khu buaana ne khu bubukula lundi. Kano niko Paapa wase andaka khukhola.”

¹⁹Liliabukhana lundi liabao mu baandu sikila kamakhuwa kano.

²⁰Bakali balomanga bali, “Ali ne sisieeno! Alaluukhe! Siina sikila ne mu murekeeresia.”

²¹Ne kakhali babaandi balomanga bali, “Omundu owe sisieeno se anyala alomaloma ari tawe! Sisieeno sinyala siriena khukhola babofu babone?”

²²Ne naikara eye khukhebulila khurwa alubeka khwe Lukaangu khu Wele yaba mu Yerusalemu mu biise bie kumunaane.

²³Yesu aba alikho akeenda mu matooche ka Solomoni mu Lukaangu

²⁴mala babaandu ne bamwibusiao bamureeba bali, “Ewe ola khuayaayisia mu mebaasio khukhwola liina? Khuboolele bung'ali abuwaanga, ewe Kristo?”

²⁵Yesu abakobosia ali, “Namubooleele khale, ne se mwasuubiile tawe. Bibiindu nibio ese khola khulwe bunyali bwa Paapa wase nibio bilomaloma nga abeele samwene ne ndoma;

²⁶ne kakhali enywe se musuubila tawe; sikila se muli kamakheese kase tawe.

²⁷Kamakheese kase karekeeresianga kumumilo kwase, ese ngamanyile, mala kanoondangakho.

²⁸Ngaelesianga bulamu bwa mindali, mala se kalifwa tawe. Se aliio onyala anuula tawe.

²⁹Paapa wase owambelesia kano ali omukali khukhila boosi, ne se aliio onyala akanuula khukhwama khu Paapa tawe.

³⁰Paapa nase khuli mulala.”

³¹Babaandu lundi bangala kamabaale bali bamupe.

³²Yesu ababoolela ali, “Nakholile bikholwa bikali bilayi mu moni chenywe nibio Paapa ambelesia ese khole. Sikholwa siina sikila ne mwenya khu khukhupa ese kamabaale?”

³³ Bakobosia bali, “Se khwenya khu khupa ewe kamabaale sikila bikholwa bilayi tawe, ne kakhali sikila embelekeu yowo! Ewe oli omundu busa, ne olikho owekhola khuba Wele!”

³⁴ Yesu aabakobosia ali, “Kaandikwa mu Lilaka lienywe kali Wele aboola ali, ‘Enywe bawele,’

³⁵khumanyile khuli niko liiandiko liboola kali ng'ali khulwa mindali; ne Wele alaanga babaandu nibo aelesia burume bwewe abo ali bawele.

³⁶Ne khwise, Paapa aandobora mala aanduma mu sibala. Munyala nono, khuboola muriena muli ese khola embelekeu sikila nalomile ndi, ese Omwana owa Wele?

³⁷Naaba ne khakhola bibiindu nibio Paapa wase eenya khole tawe, mukhasuubila ese tawe.

³⁸Ne kakhali naaba ne mbikhola, mwakhaba ne mukhasuubila ese tawe, mwenyekha musuubile bikholwa biase, nio mwoole khumanyila elala, muli, Paapa ali mwise ne ese ndi mu Paapa.”

³⁹Bakhaka lundi khuamba Yesu ne kakhali efubarura mu makhono kabwe atiba.

⁴⁰ Nio Yesu akobola lundi engelekha we luluuchi lwa Yoritani abuundu niio Yoana abatiisilianga, mala amenyayo.

⁴¹Babaandu bakali bamwichakho baloma bali, “Yoana se akholakho kamayia tawe, ne buli siindu nisio aaloma khuloondekhana no mundu yuno siaba ng'ali.”

⁴²Mala babaandu bakali ebweeneyo basuubila mu Yesu.