Read lubukusu Yn. 11 Bible Online

Yn. 11 - lubukusu bible

Yn. 11

¹ Omundu owalaangwa bali Lasaro owamenyanga mu Betania aaba omulwale. Betania lwaba lukoba nilwo Maria no mukooko wabwe Marita bamenyanga.

² (Maria yuno niye owachukha kamafura kaunya bulayi, khu bikele bio Mwami mala akeeyela lichuune liewe; Lasaro owaba omulwale aba wandaaye.)

³Bakooko bewe baruma likhuwa khu Yesu bali, “Omwami omusaale wowo omukoosi ali omulwale.”

⁴Nga Yesu aulila, aloma ali, “Bulwaale buno se buleera Lasaro tawe; buliio khulwe khureera luyali khu Wele, mala elaba engila niyo Omwana owa Wele alanyoolelamo luyali.”

⁵Yesu aba asiima Marita no mukooko wewe ne Lasaro.

⁶Ne kakhaba kario nga anyoola likhuwa bali Lasaro ali omulwale, akona khabili niio aaba eyo.

⁷Nio aboolela babeeka bewe ali, “Khe khukobole e Buyuda.”

⁸Babeeka bewe chana bamukobosia bali, “Omwekisia nyinga eyo busa, babaandu be bweneyo benyile khu khupa ewe kamabaale, mala wenya khukobolayo?”

⁹Yesu abakobosia ali, “Enyanga se ebechangao chisa ekhumi na chibili buli ndaalo tawe ku? Khwako yesi yesi okeendela mu buwaanga bwe nyanga se etuya tawe, sikila abona buwaanga bwe sibala sino.

¹⁰Ne aaba nakeenda mu silo etuya, sikila se ali ne buwaanga tawe.”

¹¹Yesu aloma kano, mala atasakho ali, “Omusaale wefwe Lasaro aakonile, ne ndacha mala musiisimusie.”

¹²Babeeka bamukobosia bali, “Omwami, aaba ne alikho akona kane aone.”

¹³Yesu aaba alikho alomaloma khuloondekhana ne lifwa lia Lasaro ne nibo bebaasia bali alomile ke khukona liilo lia busiele.

¹⁴Nio Yesu ababoolela abuwaanga ali, Lasaro afwiile.

¹⁵Ne ese nasangaalile sikila enywe, sikila se nabeleyo naye tawe, nio musuubile. Khe khuche niio ali.

¹⁶Tomasi (olaangwa Mukhwana) aboolela babeeka basie ali, “Fweesi khe khuche nio khufwe naye.”

¹⁷Nga Yesu ne ola, anyoola Lasaro amalile mu siliindwa chindaalo chine.

¹⁸Betania lwaba embi chi kilomita chitaru khukhwama Yerusalemu.

¹⁹Ne Bayaudi bakali baba bechile khubona Marita ne Maria khu baoleelesia sikila lifwa lia wandayaabwe.

²⁰Nga Marita ne aulila bali Yesu alikho echa, arura enje khucha khumwakaanila, ne Maria naye arama munju.

²¹Marita aboolela Yesu ali, “Omwami, ewe obao andi wandaayase safwiile tawe!

²²Ne manyile ndi akhaba luno siosi siosi nisio olasaba Wele alakhuelesia.”

²³Yesu amuboolela ali, “Wandaayo alalamukha.”

²⁴Marita akobosia ali, “Manyile ndi alilamukha khu ndaalo emaliilisi.”

²⁵Yesu amuboolela ali, “Ese niise lilamukha ne bulamu. Yesi yesi osuubila mwise alamenya, akhaba nafwa;

²⁶ne yesi yesi omenya mala asuubila mwise salifwa tawe. Ewe osuubila kano?”

²⁷Marita amukobosia ali, “Yee Omwami, suubila ndi ewe oli Kristo, Omwana owa Wele, owarekekha khukhwicha mu sibala.”

²⁸Marita nga amala khuloma kano, akobolayo alaanga wandaaye Maria mu bwikisi mala amuboolela ali, “Omwekisia ali ano, mala alikho akhulaanga ewe.”

²⁹Nga Maria naulila kano, enyokha khangu arura enje khumwakaanana.

³⁰(Abeele Yesu akhoola mu sirekere tawe, aaba asiili abuundu niio Marita aba namwakaanane.)

³¹Babaandu baba munju ne Maria ne bamuoleelesia. Nga babona ne enyokha khangu narura enje bamuloondakho. Bebaasia bali alikho acha khulilila esiliindwa.

³²Maria ola niio Yesu aaba, ne abwene ne abwene nga namubona, akwa mu bikele biewe. Aloma ali, “Omwami, obao andi wandaayase safwiile tawe!”

³³Yesu amubona ne alikho alila, lundi abona babaandu ba baba naye ne balikho balila. Nio kumwoyo kwewe kwechula bubeeleli, mala anaanisibwa lukali po.

³⁴Abareeba ali, “Mu musiikhile waena?” Bamukobosia bali, “Omwami, khowiche obone.”

³⁵Yesu aliila.

³⁶Bayaudi baloma bali, “Bona nga beele ne amusiima lukali!”

³⁷Ne balala khu nibo baloma bali, “Se akhola omubofu abona tawe ku? Andi sakhiingilile lifwa lia Lasaro?”

³⁸Yesu anaanisibwa lundi lukali mala acha e siliindwa. Siliindwa esio siaba nga libina mala baba bekalileyo kubaale.

³⁹Yesu arusia lilaka ali, “Rusiayo kubaale oku.” Marita omukooko owo mundu ofwiile chana akobosia ali, “Omwami, bubolo bulaba bukali, abeele mu siliindwa chindaalo chine!”

⁴⁰Yesu amuboolela ali, “Se khuboolele ndi waaba nosuubila kane obone luyali lwa Wele?”

⁴¹Barusiayo kubaale mala Yesu alola mu ngaaki aloma ali, “Paapa, khuupila ewe orio, sikila ewe undekeeresianga.

⁴²Manyile ndi buli lwoosi ewe undekeeresianga, ne ndoma kano khulwe babaandu baali ano, nio basuubile bali ewe owanduma ese.”

⁴³Enyuma we khuloma kano, alaanga ne kumumilo kwe angaaki ali, “Lasaro rura enje!”

⁴⁴Lasaro arura enje, kamakhono kewe ne bikele biaba biaboelwe mu suuka che khu siikhilamo, ne mu moni mwewe baba bamuboyilemo esuuka ekiindi. Yesu ababoolela ali, “Khemumukangulule mala mumulekhe ache.”

⁴⁵Bayaudi bakali ba baba ne baloondile khu Maria babona niko Yesu akhola, mala bamusuubila.

⁴⁶Ne kakhali balala khu nibo bakobola khu Bafarisayo, mala bababoolela niko Yesu aba nakholile.

⁴⁷Nio Bafarisayo, ne basaayi bakhulu bekhala nende be kumuse mala baboolana bali, “Khulakhola siina? Lola kamayia kano koosi niko Omundu yuno alakholanga!

⁴⁸Khwaaba ne khumulekha busa achiililile mu ngila yino, buli mundu alamusuubila mala Barumi balecha bonake Lukaangu lwefwe ne kholo yefwe!”

⁴⁹Mulala khu nibo, olaangwa Kayafa, owaba Omusaayi Omukhulu Lukali owe Lukaangu kumwiiko mwenokwo aloma ali, “Enywe se mumanyilekho sisiindu siosi siosi tawe.

⁵⁰Se mubona muli buli bulayi khwinywe khulekha omundu mulala afwe khulwe babaandu khukhila ekholo yoosi ebune?”

⁵¹Ng'ali se aboola kano omwene yeng'ene tawe, ne kakhali nga ne aba Omusaayi Omukhulu Lukali owe Lukaangu kumwiiko mwenokwo, aba alikho ang'oola ali Yesu alikho acha khufwa khulwe Bayaudi.

⁵²Ne seli khulwe Bayaudi bong'ene tawe, ne kakhali lundi aaba alikho acha khufwa nio areere mu mubili mulala babaandu ba Wele boosi babasalaanila.

⁵³Khukhwama khu ndaalo eyo Bayaudi be bunyali barakikha khuboolana nga ne banyala bamwiira.

⁵⁴Khwako Yesu se akeenda abuwaanga mu Buyuda tawe, ne kakhali arekukha acha abuundu aandi siimbi ne asiangalaamwe, alukoba nilwo balaanga bali Efuraimu. Nio amenya ebweeneyo ne babeeka bewe.

⁵⁵Siise sia Naikara eye Pasaka siaba siimbi ne babaandu bakali baama chimbeka chichiindi baacha mu Yerusalemu khukhola kimilukha kie khukhwekwalaasia, naikara ne khoola tawe.

⁵⁶Baenjanga Yesu, mala nga ne bebuusia alala mu Lukaangu, bareebana bali, “Mwibaasia muli siina? Ng'ali salikho echa mu naikara yino tawe, namwe aleecha?”

⁵⁷Basaayi bakhulu ne Bafarisayo baba baanile kamalaka bali Omundu yesi yesi omanyile niio Yesu ali, khukhwola abuule nio bamuambe.