Read lubukusu Yn. 13 Bible Online

Yn. 13 - lubukusu bible

Yn. 13

¹Yaba endaalo ndala Naikara eye Pasaka ne khoola tawe. Yesu aamanya ali esaa yewe yaba yolile eye khurura mu sibala sino, mala ache wa Paapa. Buli lwosi aba asiima babewe ba baba mu sibala mala abasiima khukhwola esiakamo.

²Yesu ne babeeka bewe baba asialwa sie lilikoloyia. Sietani aba areere khale kamebaasio ke khuchaama Yesu mu mwoyo kwa Yuda, okhwa Simoni Isikarioti.

³Yesu amanya ali Paapa amuelesia bunyali bwoosi, amanya ali echa khukhwama khu Wele mala alikho acha wa Wele.

⁴Nio enyokha khusialwa afuula ekaanjo yewe eye khu ngaaki, mala eboa etawulo mu sibuno.

⁵Achukha kameechi khulukaraya mala arakikha khusiinga babeeka bewe bikele, ne khubieyela etawulo niyo aba naboyile mu sibuno.

⁶Ola khu Simoni Petero, mala Petero amureeba ali, “Omwami, wenya khu khusiinga ese bikele?”

⁷Yesu amukobosia ali, “Ewe luno somanyilisia nisio ese ndikho khola tawe, ne kakhali okhamanyilisie enyuma wakano.”

⁸Petero aloma ali, “Se silikhoo siise siosi siosi nisio ewe olisiinga ese bikele tawe.” Yesu amukobosia ali, “Ne khakhusiinga bikele tawe, solaba omweeka wase lundi tawe.”

⁹Simoni Petero amukobosia ali, “Omwami nono okhasiinga bikele biong'ene tawe! Siinge akhaba kamakhono ne kumurwe kwosi!”

¹⁰Yesu aloma ali, “Yesi yesi owesiingile ali omumiliiu elala ne se esiinga lundi tawe, ne kakhali esiinga bikele. Enywe mweesi muli bamiliiu ne kakhali mulala khwinywe niye okhali omumiliiu tawe.”

¹¹(Yesu aba amanya khale owaba ne alikho acha khumuchaama, niko kakakila naloma ali, “Mweesi muli bamiliiu nakhali mulala khwinywe niye okhali omumiliiu tawe.”)

¹² Yesu ne amalile khubasiinga bikele efwara lundi ekaanjo yewe mala akobola niio aba ne ekhaale asialwa. Nio areeba ali, “Mwamanyile nisio nama khukhola khwinywe?

¹³Mundanganga ese muli Omwekisia lundi muli Omwami, mala buli bulayi nga mukholanga murio, sikila ndi ndio.

¹⁴Ese Omwami wenywe, lundi Omwekisia, nama khumusiinga bikele. Nono, enywe mukhoyela musiingane bikele.

¹⁵Nakholile nisio mukhoyeele mulolelekho, nio mukhole busa nga nisio ese kholile khwinywe.

¹⁶ Ndikho muboolela bung'ali ndi, nasioobi se ali omukali khukhila omwami wewe tawe, ne omurumwa se ali omukali khukhila owamuruma tawe.

¹⁷Luno nga ne mu manyile bung'ali buno, mulasangaala lukali ne mubura mu bikholwa!

¹⁸ Se ndikho ndomaloma kakenywe mweesi tawe, namanya abo nibo narobora. Ne liiandiko liboolanga lili, ‘Omundu niye walia naye, niye okhuchaama’ khukhwola lichusibwe.

¹⁹Ese muboolela enywe kano ne kakhekholekha tawe, nio ne kekholekha musuubile muli ‘Ese Niise.’

²⁰ Ng'ali ese muboolela enywe ndi, Oyo owakaanila omundu yesi yesi niye ese nduma, aba anjakaanila ese; ne yesi yesi ounjakanila ese akaanila oyo owanduma ese.”

²¹Enyuma Yesu nalomile kano, anaanisibwa mu mwoyo lukali mala aboola abuwaanga ali, “Ndikho muboolela bung'ali mulala khwinywe alikho acha khunjaama.”

²²Babeeka balolana ne bauka, khumanya naanu niye alikho alomakho tawe.

²³Mulala khu beeka, niye Yesu asiima aba ekhaale siimbi ne Yesu.

²⁴Simoni Petero amua simanyilo sie khukhwekesia sili, “Mureebe naanu niye alikho alomalomakho.”

²⁵Nio omweeka oyo eseenda siimbi khu Yesu mala amureeba ali, “Omwami naanu niye?”

²⁶Yesu amukobosia ali, “Niye ndaronga kumukaati mu muunyu mala muelesie aba niye omwenoyo.” Nio abukula sitonyi sie kumukaati asironga mu muunyu, mala asielesia Yuda okhwa Simoni Isikarioti.

²⁷Abwene ne abwene nga Yuda ne alia kumukaati okwo, Sietani amwingilamo. Yesu amuboolela ali, “Yuuya khangu nisio wenya khukhola?”

²⁸Se aliio owaba asialwa owamanyilisia sisiakila Yesu namuboolela ario tawe.

²⁹Ne sikila Yuda aba omubiikhi we eoochwa eye chirupia, babeeka balala bebaasia bali Yesu amubooleele khucha akule nibio benya khulwa mu naikara, namwe aekho bataambi sisiindu.

³⁰Yuda afukiilila kumukaati mala arura enje khangu, siaba siilo.

³¹Yuda ne amalile khurekukha, Yesu aaloma ali, “Luno Omwana wo Mundu aelesiiibwe luyali, luno luyali lwa Wele lwabuliikhe khubirira mu niye.

³²Ne luyali lwa Wele ne lubuliikhe khubirira mu niye, aba nono Wele alabuula luyali lwo Mwana wo Mundu mu niye omwene, mala alakhola ario khangu.

³³ Baana base, se ndaba ne nanywe khu siise sileeyi lukali tawe. Mulambenja, ne luno muboolela enywe niko naboolela Bayaudi be bunyali, ‘Se munyala mwacha niio ese ndikho nja tawe.’

³⁴ Ne luno ndikho muelesia enywe lilaka liya: Khemusiimane mwabeene ne mwabeene. Nga ese ne namusiima enywe, nio enywe khukhwola musiimane mwabeene ne mwabeene.

³⁵Mwaba ne busiime khu mwabeene ne mwabeene, aba buli mundu alamanya ali enywe muli babeeka base.”

³⁶Simoni Petero aamureeba ali, “Omwami, olikho ocha waena?” Yesu aamukobosia ali, “Se onyala wanondakho luno niio ndikho nja tawe, ne kakhali ekhumaliilikha okhanondekho.”

³⁷Petero amureeba ali, “Omwami, siina sikila ne khakhuloondakho siise sino? Ese nerekeekhe khukhufwila ewe!”

³⁸Yesu amukobosia ali, “Ng'ali ewe werekeekhe khukhufwila ese? Ndikho khuboolela bung'ali ndi etaaywa ne khakholiokha tawe, kane oboole khukhwola khataru oli se umanyile tawe.”