Read lubukusu Yn. 14 Bible Online

Yn. 14 - lubukusu bible

Yn. 14

¹Yesu ababoolela ali, “Mukheembeelela ne khubeelela tawe. Suubila mu Wele ne lundi suubila akhaba mwise.

²Munju eya Paapa chisiro chilimo chingali, mala ndikho nja khumung'oonela bukono, abanga se kali kario tawe, andi se muboolele kano tawe.

³Ne enyuma nenjile khumung'oonela bukono, khakobole mala mu bukule mureere khu samwene, nio mube niio ese ndi.

⁴Enywe mumanyile engila echa niio ese ndikho nja.”

⁵Tomasi amuboolela ali, “Omwami se khumanyile niio olikho ocha tawe; nono khunyala khwamanya khuriena engila echayo?”

⁶Yesu amukobosia ali, “Ese niise engila, bung'ali ne bulamu, se aliio omundu onyala acha wa Paapa nakhabirire khwise tawe.”

⁷Ababoolela ali, “Luno nga mu manyile ese. Mulamanya akhaba Paapa wase yesi, ne khukhwama luno khuchilila, enywe mu mumanyile niye lundi mwamubona.”

⁸Filipo amuboolela ali, “Omwami khwekesie Paapa, elio liong'ene nilio khwenya.”

⁹Yesu amukobosia ali, “Filipo, nabele ne nanywe mweesi khulwe siise sileeyi, khane se umanyile tawe? Omundu yesi yesi oumboone ese aba aboone Paapa. Nono siina sikila ne oloma oli, ‘Khwekesie Paapa?’

¹⁰Filipo, ewe se osuubila oli ese ndi mu Paapa ne Paapa ali mwise tawe?” Yesu aaboolela babeeka bewe ali, “Kamakhuwa niko ndomaloome khwinywe, se kama khwise tawe. Paapa, omenyile mwise niye okholanga kimilimo kiewe omwene.

¹¹Suubile nga mboola ndi ese ndi mu Paapa ne Paapa ali mwise. Kaaba ne kakhali kario tawe, suubila sikila bibiindu nibio ndikho khola.

¹²Ndikho muboolela bung'ali ndi, omundu yesi yesi osuubila mwise alakhola niko ese khola, yee, alakhola bibiindu biboofu khukhila bino, sikila ese ndikho nja niio Paapa ali.

¹³Nono ndakhola siosi siosi nisio mureeba mu lisina liase, nio luyali lwa Paapa lubonekhe khubirira mu Mwana.

¹⁴Ne musaba sisiindu siosi siosi mu lisina liase, ndasikhola.

¹⁵“Mwaba ne mwasiima ese mularia kamalaka kase.

¹⁶Ndareeba Paapa, mala alamuelesia Omuyeeti okundi Roho owe bung'ali, olaba nanywe khulwa mindali.

¹⁷Ali Roho obuulanga bung'ali bwa Wele. Be sibala se banyala khumusuubila tawe, sikila se banyala khumubona namwe khumumanya niye tawe. Ne enywe mu mumanyile niye sikila amenyanga nanywe lundi ali mwinywe.

¹⁸Nga ese ne khache se mukharame mweng'ene tawe, khamukobolele.

¹⁹Mu siise sikeekhe sibala se silambonakho ese lundi tawe, ne enywe mulambona, sikila ese menyile akhaba enywe mwesi mulamenya.

²⁰Nga endaalo eyo ne lioola, mulimanya muli ese ndi mu Paapa wase ne enywe muli mwise, bulayi bwene nga ese ne ndi mwinywe.

²¹“Yesi yesi owakaanila kamalaka kase ne khukaria, niye owasiima ese. Paapa wase alasiima yesi yesi ousiima ese, akhaba sesi ndamusiima mala khole aamanye lukali.”

²²Yuda (se ali Yuda Isikarioti tawe) aloma ali, “Omwami, kali kariena ewe wemanyisie wamwene khwifwe ne khu be sibala tawe?”

²³Yesu amukobosia ali, “Yesi yesi ousiima ese alaria kamekisio kase. Paapa wase alamusiima mala niye alala ne nase khulecha niio ali khumenye naye.

²⁴Yesi yesi okhasiima ese saria kamekisio kase tawe. Ne kamekisio niko mumalile khuulila se kali kakaase samwene tawe, ne kakhali kaama khu Paapa owanduma.

²⁵“Ese namubooleele kano ne siili ne nanywe.

²⁶Omuyeeti Roho Omutakatifu, niye Paapa akharume mu lisina liase, akhamweyikie buli siindu mala amukhole mukhebulile koosi niko ese muboolele enywe.

²⁷Kumuleembe nikwo ndikho mulekhela enywe, kuli kumuleembe kwase samwene nikwo ndikho muelesia. Se nguaana nga sibala ne siaananga tawe. Mukheembeelela ne khubeelela tawe, mukharia tawe.

²⁸Mwambulila ne ndoma ndi, ‘Ndikho ndekukha, ne kakhali khamukobolele.’ Abaanga mwasiima andi mulasangaala nga ese ne ndikho nja wa Paapa, sikila ali omukali khu khukhila ese.

²⁹Ne luno nanyoile khumuboolela kano koosi ne kakekholekha tawe, nio nga ne kaliekholekha, mwole khusuubila.

³⁰Se nyala nachiililila khulomaloma ne nanywe khu siise sileeyi tawe, sikila omwami owe sibala sino alikho echa ne se ali ne bunyali khwise tawe,

³¹ese khola nga Paapa ne andakiilisie ne sibala khukhwola simanye sili ese nasiima Paapa; ako niko kakila ne khola buli siindu nga ne andaka. “Yinyokha, khe khurekukhe khuche.