Read lubukusu Yn. 16 Bible Online

Yn. 16 - lubukusu bible

Yn. 16

¹“Namubooleele kano, nio mukhalekha lisuubila lienywe tawe.

²Bakhamuonele elala mu chisinakooki, mala siise silecha buli mundu omwiira enywe alebaasia ali nono alikho akholela Wele kimilimo.

³Balikhola bibiindu bino khwinywe sikila se bamanyile ese namwe Paapa wase tawe.

⁴Ne namubooleele kano nio siise ne sioolile khu nibo khukhola bibiindu bino, mulikhebulila muli nanyoa namuboolela. “Se namubooleele bibiindu bino e khurakikha tawe, sikila bele ndi nanywe.

⁵Ne luno ese ndikho nja khuyo owanduma, ne salikhoo mulala khwinywe oundeeba ali olikho ocha wae tawe.

⁶Sikila namubooleele enywe luno kimiooyo kienywe kili ne bubeeleli bukali.

⁷Ne ndikho muboolela bung'ali ndi, buli bulayi khwinywe ese nje, sikila ne khacha tawe Omuyeeti salecha khwinywe tawe. Ne kakhali nenja, ndamuruma eche khwinywe.

⁸Ne nga akheeche akheekesie babaandu be sibala ali, bali bakhiikha khuloondekhana ne bubwoni, khuloondekhana ne buluungi, ne khuloondekhana nende bukhalaki bwa Wele.

⁹Bali bakhiikha khuloondekhana ne bubwoni sikila se basuubila ese tawe,

¹⁰khuloondekhana ne buluungi, sikila ndikho nja niiko Paapa ali mala enywe se mulambonakho lundi tawe,

¹¹lundi bali bakhiikha khulwe bukhalaki, sikila omwami owe sibala sino akhalakiilwe khale.

¹²“Ndi ne kamakali ke khumuboolela enywe, ne kakhali siise sino se mukanyala tawe.

¹³Kakhaba kario, nga Roho owa ng'ali ne echa, owekesianga bung'ali bwa Wele; akhamwekesie bung'ali bwoosi. Sakhaboole khulwe bunyali bwewe omwene tawe, ne kakhali akhalomalome niko aulila, mala akhalomalome ke bibiindu bibiicha.

¹⁴Akhambelesie ese luyali sikila akhabukule niko ese ndoma mala akhamuboolele enywe.

¹⁵Bioosi nibio Paapa wase ali nabio bili bibiase, ako niko kakila ne mboola ndi Roho akhabukule niko ese muelesie niye mala amuboleele enywe.

¹⁶“Mu siise sikeekhe se mulambonakho ese lundi tawe, ne enyuma we siise sikeekhe lundi mulambona.”

¹⁷Balala khu beeka bewe bareebana babeene ne babeene bali, “Lino liboola siina? Akhuboolela efwe ali, mu siise sitiiti se khukhamubone tawe, mala enyuma we siise sitiiti khulamubona, ne lundi aloma ali, ‘Sikila ndikho nja niio Paapa ali.’ ”

¹⁸Khwako baba ne bareebana bali, “Ne aloma ali, ‘Mu siise sitiiti,’ aba aafunaanisie siina? Se khwamanyile nisio alikho alomalomakho tawe!”

¹⁹Yesu amanya niko benya khumureeba, nio ababoolela ali “Ndomile ndi mu siise sikeekhe se mulambona tawe, ne enyuma we siise sikeekhe mulambona. Kano se kali niko mulareebananga tawe ku?

²⁰Ndikho muboolela bung'ali ndi, enywe mulalila ne khukhwiunamila, ne kakhali be sibala balasangaala, enywe mulaba ne bubeeleli, ne bubeeleli bwenywe bulakaluukhana bube busangaafu.

²¹Omukhasi ne alikho alumwa ali ne bubeeleli sikila esaa yewe eye buchuuni yolile, ne nga omwana nasaalwa, ebilila buchuuni bwewe, ali omusangaafu sikila omwana asaalilwe mu sibala.

²²Kali busa kario khwinywe, luno muli ne bubeeleli, ne kakhali khamubone lundi, mala kimiooyo kienywe kikhechule busangaafu nibwo omundu yesi yesi akhamunuula tawe:

²³Ndikho muboolela bung'ali ndi nga endaalo eyo ne lioola, se muliisabakho siosi siosi tawe. Paapa akhamuelesie enywe buli nisio enywe musaba mu lisina liase.

²⁴Khukhwola luno se mwamusabilekho sisiindu siosi siosi mu lisina liase tawe. Saba mala mulanyoola, nio busangaafu bwenywe bwoole khukhwichulila elala.

²⁵“Narumikhiire chisimo khumuboolela enywe bibiindu bino. Ne kakhali esaa elikho yiicha niyo khalomalome ka Paapa khwinywe abuwaanga busa ne kharumikhira chisimo tawe!

²⁶Nga endaalo eyo ne khoole, mukhasabe mu lisina liase; ne mboola ndi, ese se khamusaabile enywe khu niye tawe,

²⁷sikila Paapa omwene amusiima enywe. Amusiima sikila mwasiima ese, mala mwasuubila muli ese nama wa Wele.

²⁸Ese nama wa Paapa ne necha mu sibala, mala luno ndikho ndura khu sibala nja wa Paapa.”

²⁹Nio babeeka bewe bamuboolela bali, “Luno olikho olomaloma busa abuwaanga se olikho orumikhira chisimo lundi tawe.

³⁰Khwamanyile luno khuli ewe wamanya buli siindu: se kali bali wenya omundu okundi akhureebe lireeba tawe. Lino likhukhola efwe khusuubile khuli ewe wama wa Wele.”

³¹Yesu abakobosia ali, “Enywe luno mwasuubiile?

³²Esaa elikho yiicha, mala eli ano khale, niyo enywe mweesi mulasalanisibwa, buli mundu alacha mungo mwewe, ne ese ndarama seng'ene. Ne kakhali ng'ali se ndi seng'ene tawe, sikila Paapa ali nase.

³³Namubooleele kano koosi nio mube ne kumuleembe khulwe khuambaasibwa khwise. Be sibala balamunyaasia enywe. Ne ba, banyindaafu! Ese naula sibala.”