Read lubukusu Yn. 18 Bible Online

Yn. 18 - lubukusu bible

Yn. 18

¹Enyuma we lisaba lino, Yesu, arekukha ne babeeka bewe bacha engelekha we luluuchi lwa Kiduroni. Khakuunda khe kimirongooro khabao nikho baandu baolelangao, mala Yesu ne babeeka bewe bachaamo.

²Yuda, omuchaami, abeele amanya niio khakuunda akho khaba, sikila Yesu aakaananilangao ne babeeka bewe biise bikali.

³Nio Yuda ne kumukaanda kwe basikari be bubwami bwe Barumi, ne balala khu baliindi be Lukaangu ba barumwa ne basaayi bakhulu ne Bafarisayo, bacha mu khakuunda akho; baba babanuule bulwaani lundi basutile chitaa ne chinjaso.

⁴Yesu amanya buli siindu sisiaba ne sicha khumwikholekhakho, nio eseenda ebweeni mala abareeba ali, “Naanu niye enywe mulikho muyiima?”

⁵Bamukobosia bali, “Yesu owa Nasareti.” Ababoolela ali, “Niise.” Yuda, omuchaami, aba emileo ne nabo.

⁶Nga Yesu ne ababoolela ali, “Niise,” besenda enyuma mala bakwa aasi.

⁷Yesu abareeba lundi ali, “Naanu niye enywe mulikho muyiima?” Baboola bali, “Yesu owa Nasareti.”

⁸Yesu ababoolela ali, “Muboolele khale ndi niise. Nono, mwaba ne mulikho mumbenja ese, lekha babaandi bano bache.”

⁹(Aboola kano nio niko aba aboola kolaane khuba ng'ali: “Paapa, se natibiakho akhaba mulala khu nibo ewe wamba tawe.”)

¹⁰Simoni Petero aaba ne mbalu, akichoola mala arema nasioobi owo Omusaayi Omukhulu Lukali liiru lie lubeka luseecha liakwa aasi. Lisina lia nasioobi oyo liaba bali Maliko.

¹¹ Yesu aboolela Petero ali, “kobosia embalu yowo mu sibaabi! Ewe wibaasia oli, ese se nyala nanywa sikoombe sie sinyaasio nisio Paapa wase ambelesie tawe?”

¹²Nio basikari be bubwami bwe Barumi ne omukhulu wabwe ne baliindi be Siyuda baamba Yesu, bamuboa,

¹³banyoa bamuyila khu Anasi, raraawe owa mukha Kayafa owaba Omusaayi Omukhulu Lukali kumwiiko okwo.

¹⁴ Kayafa aba niye owakaambila Bayaudi be bunyali ali buli bulayi omundu mulala afwiile babaandu boosi.

¹⁵Simoni Petero ne omweeka okundi baloonda khu Yesu. Omweeka okundi oyo aba amanyikhana khu Omusaayi Omukhulu Lukali owe Lukaangu, nio acha ne Yesu khu luuya lwe nju eyo Musaayi omukhulu,

¹⁶Petero arama enje we silibwa. Nio omweeka okundi chana owamanyikhana khu Omusaayi Omukhulu Lukali arura enje, alomaloma no mukhaana we a silibwa oliinda silibwa mala afukiilila Petero khukhwingila mukari.

¹⁷Omukhaana we mu silibwa areeba Petero ali, “Ewe wesi se oli mulala khu beeka bo Mundu oyo tawe ku?” Petero amukobosia ali, “Se ndi mulalakho tawe.”

¹⁸Bakholi ne baliindi baba babwanile kumulilo mala baba bemile bakubotookhelele, baba boora sikila embeo yabao. Nio Petero acha emao nabo ne ora.

¹⁹Omusaayi Omukhulu Lukali areeba Yesu kamareeba khu beeka bewe ne ke kamekisio kewe.

²⁰Yesu amukobosia ali, “Ese buli lwosi ndomalomanga abuwaanga khu buli mundu; kamekisio kase koosi ne kisianga mu chisinakooki ne mu Lukaangu, niio babaandu boosi bebuusianga. Khaaboolakho sisiindu siosi siosi mu bwikisi tawe.

²¹Siina sikila nono ne mundeeba ese? Reeba babaandu ba bambulila. Khemubareebe niko nababoolela. Nibo bamanyile niko nalomaloma.”

²²Nga Yesu aloma kano, mulala khu baliindi amupa luui mala aloma ali, “Olomaloma oriena khu Omusaayi Omukhulu Lukali!”

²³Yesu amukobosia ali, “Naaba ne mboolile sisiindu siosi siosi sibi, boolela ano buli mundu, sibele siina. Ne naaba ne ndi ng'ali mu niko ndomile, siina sikila ne ukhupa?”

²⁴Nio Anasi ayila Yesu nasiili omuboe, khu Kayafa Omusaayi Omukhulu Lukali we Lukaangu.

²⁵Petero aba oora kumulilo. Nio babaandi bamuboolela bali, “Ewe wesi se oli mulala khu beeka bo mundu oyo tawe ku?” Ne Petero ekaana lundi ali, “Se ndi mulalakho tawe.”

²⁶Mulala khu nasioobi bo Omusaayi Omukhulu Lukali we Lukaangu, omulebe wo mundu niye Petero arema liiru, amureeba ali, “Ese se khubone ewe ne naye mu khakuunda akho tawe ku?”

²⁷Petero aloma lundi ali, “Tawe.” Ne mala etaaywa ekholiokha.

²⁸Makhelebeende babukula Yesu bamurusia munju eya Kayafa bamuyila mwichipi mwo muruki. Bayaudi be bunyali se bengila mwichipi mwo muruki tawe, sikila benya khuba bakwalaafu mu miima kiabwe kie Siyuda nio balie siakhulia sie Pasaka.

²⁹Nio Pilato arura enje abareeba ali, “Muli na masitako sina khu mundu yuno?”

³⁰Bamukobosia bali, “Abanga sakholile kamabi tawe andi se khwamureerire khwiwe tawe.”

³¹Pilato ababoolela ali, “Nono enywe mwabeene khemumubukule mala mumuyaale khuloondekhana ne Lilaka lienywe.” Nio bamukobosia bali, “Efwe se khufukiililwa khukhwira omundu yesi yesi tawe.”

³² [Kano kekholekha nio kamakhuwa niko Yesu aloma koole khuba kang'ali nga ne ekesia lifwa siina nilio alifwa.]

³³Pilato akobola mwichipi mala alaanga Yesu amureeba ali, “Ewe oli Omwami we Bayaudi?”

³⁴Yesu akobosia ali, “Lireeba lino liama khwiwe wamwene namwe babaandi bakhuboolele kakaase?”

³⁵Pilato amukobosia ali, “Wibaasia oli ese ndi Omuyaudi? Bali babaandu bowo babeene ne basaayi bakhulu bakhureerire khwise. Okholile siina?”

³⁶Yesu amuboolela ali, “Bubwami bwase se buli bwe khu sibala sino tawe; Bubanga bwe khu sibala sino, andi babeeka base bapane ndekha khuaanwa khu Bayaudi be bunyali tawe. Bubwami bwase se buli bwe aasi ano tawe!”

³⁷Nio Pilato amureeba lundi ali, “Nono, ewe oli Omwami?” Yesu amukobosia ali, “Ewe oloma oli ese ndi Omwami. Nasaalwa mala necha mu sibala, sikila sifuno silala siong'ene nisio khulomaloma khu ke bung'ali. Omundu yesi yesi oli owe bung'ali andekeeresianga.”

³⁸Pilato amureeba ali, “Ne bung'ali nisio siina?” Nio Pilato arura lundi enje mu baandu mala aloma ali, “Se nyala nanyoola sifuno siosi siosi sie khumukhalakilakho tawe.

³⁹Ne khuloondekhana ne kumwiima nikwo muli nakwo, buli lwosi mulekhulilanga omuboe mu Pasaka. Mwenya mulekhulile enywe Omwami we Bayaudi?”

⁴⁰Bamukobosia ne luyoka bali, “Tawe, niye tawe! Khwenya Barabasi!” (Barabasi aba omunuuli).