Read lubukusu Yn. 19 Bible Online

Yn. 19 - lubukusu bible

Yn. 19

¹Nio Pilato abukula Yesu mala aamuraakho bamupe biboko.

²Basikari bang'oona ekuutwa eye kamawa bamufwara khu murwe, lundi bamufwara ekaanjo efwaana buseemwa,

³bamwichakho ne baloma bali, “Omwami we Bayaudi, oiindile!” Mala bamuupa chimbi.

⁴Pilato aarura lundi enje mala aboolela babaandu ali, “Lola, ndikho mureera anje khwinywe, mubone muli ese, se namunyoolilemo sifuno siosi siosi sikila niye akhalakilwe tawe.”

⁵Nio Yesu aarura anje, aafwarire ekuutwa eye kamawa ne kaanjo. Pilato ababoolela ali, “Lola! Omundu chana oyusiina!”

⁶Nga basaayi bakhulu ne baliindi be Lukaangu bamubona, baapa luyoka bali, “Mubambe! Mubambe!” Pilato ababoolela ali, “Mu bukule mwabene mala mumubambe. Se namunyoolilekho sifuno sie khumukhalakila tawe.”

⁷Babaandu bamukobosia bali, “Efwe khuli ne lilaka liboola lili akhoyeela khufwa, sikila elaanga khuuba Omwana owa Wele.”

⁸Nga Pilato aulila kano, aba ne buuri bukali po.

⁹Akobola mwichipi, mala areeba Yesu ali, “Ewe wama waena?” Ne Yesu se amukobosia tawe.

¹⁰Pilato amureeba ali, “Solalomalomakho nase tawe? Khebulila oli, ese ndi ne bunyali khu khulekhuula namwe khukhukhola bakhubambe.”

¹¹Yesu akobosia ali, “Oli ne bunyali khwise sikila Wele niye owakhuelesia. Ne kakhali omundu oundeerire khwiwe ali ne kumusaango kwe bubwoni bubi lukali.”

¹²Nga Pilato ne aulila kano akhaka khunyoola engila eye khulekhuula Yesu. Ne babaandu bamuyokelela bali, “Wamulekhuula, aba kaboola kali ewe se oli omusaale owo mwami Kaisari tawe! Omundu yesi yesi owelanganga ali, ali omwami se enyanga ko Mwami Omukhulu tawe!”

¹³Nga Pilato aulila kamakhuwa kano, abukula Yesu amureera enje mala ekhala khu ndebe eye bukhalaki abuundu niio balanga bali, “Mumatooche”. (Mu Lueburania lisina elio lili “Kabata.”)

¹⁴Yaba embi mwiangilwe, endaalo ndala nio Epasaka yole. Pilato aaboolela Bayaudi ali, “Omwami wenywe oyusiina!”

¹⁵Bakobosia ne luyoka bali, “Mwire! Mwire! Mubaambe!” Pilato aabareeba ali, “Mwenya ese mbaambe Omwami wenywe?” Basaayi bakhulu bakobosia bali, “Efwe khumanyile Omwami Kaisari yeng'ene!”

¹⁶Mala Pilato aabakaanisia Yesu, bamubaambe.

¹⁷Yesu arura enje nasutile kumusalaba kwewe, mala oola abuundu alaangwa bali, “Abuundu we siianga.” (Mu Lueburania alaangwa bali, Kolikota.)

¹⁸Abwenao niio bamubambila ne babaandi babili, mulala buli lubeka ne Yesu akari wabwe.

¹⁹Pilato aandika kamaandiko ali, “Yesu owa Nasareti, omwami we Bayaudi” akakhoma khu musalaba kwa Yesu.

²⁰Babaandu bakali bakasoma sikila abuundu niio Yesu abaambilwa, se aba aleeyi khukhwama mu lukoba tawe. Kamaandiko kaandikwa mu Lueburania, Lulatini ne Lukiriki.

²¹Basaayi bakhulu baboolela Pilato bali, “Okhaandika oli, ‘Omwami owe Bayaudi’ tawe, ne kakhali andika oli, ‘Omundu yuno alomanga ali, Ese ndi Omwami we Bayaudi.’ ”

²²Pilato aaloma ali, “Niko mbandike kalarama busa kario.”

²³Nga basikari bamala khu bamba Yesu, babukula chingubo chewe bachikhalamo bitonye bine, buli musikaari sitonyi. Babukula ekaanjo yosi, eyanabwa ne kamakhono mu sitonyi silala siong'ene.

²⁴ Basikari baboolana bali, “Khukhakitabulamo tawe; khe khuupe chikura khubone naanu olakibukula.” Lino liakholekha nio liiandiko lichusibwe liboola lili, “Bakabana chingubo chase, mala baapa chikura khu kaanjo yase.” Kano niko basikari bakhola.

²⁵Maawe owa Yesu, ne wandaaye omukhaana, Maria mukha Kiliopa, ne Maria Makatalena baba bemile amusalaba.

²⁶Yesu abona maawe no mweka niye asiima bemileo; nio aboolela maawe ali, “Yuno omwana wowo.”

²⁷Nio aboolela omweeka oyo ali, “Yuno maao.” Khukhwama esaa eyo omweeka oyo abukula Maria maawe owa Yesu mala aamenya naye mungo mwewe.

²⁸ Enyuma wa kano, Yesu amanya ali buli siindu siamalile khuwa. Nio khukhola liiandiko lichusibwe, aloma ali, “Ndi ne bulesia.”

²⁹Sibuumba siabao, ne ndali endulu yechulekho, nio benikha sisiaangu mu ndali endulu eyo, bauna sisiaangu esio khu lusaala, mala basuta bara emunwa wewe.

³⁰Yesu anywa endali mala aloma ali, “Kawele!” Mala enamikha kumurwe kwewe afwa.

³¹Nio Bayaudi be bunyali bareeba Pilato abaelesie kumunwa bafunake bikele bie babaandu ba bambiilwe, mala barusie kimibili kiabwe khu misalaba. Bamureeba kano sikila yaba endaalo eya Ichuuma, mala se benya bafu babe khu misalaba khukhwola mu Sabato tawe, lundi khutasakho esabato eye Pasaka.

³²Khwako bacha mala bafuna bikele bio mundu owe khunyoa, lundi bacha bafuna okundi yesi owabambwa ne Yesu.

³³Ne nga boola khu Yesu, babona bali afwiile khale, khwako se bafunaka bikele biewe tawe.

³⁴Kakhaba kario mulala khu basikari, auna Yesu lifumo mumbafu, mala abwene na abwene kamafuki kachichukha ne kameechi.

³⁵(Oyo owabona kano ne kekholekha akalomalomekho, nio enywe mwesi mwole khusuubila muli, niko aboola kali kang'ali, mala amanyile ali alomanga bung'ali.)

³⁶ Kano kakholekha khukhola liiandiko lichusibwe liboola lili, “Sikuumba siewe nasilala siong'ene se silifunakwa tawe.”

³⁷ Ne liliio liiandiko liliindi liboola lili, “Babaandu balibona niye bauna.”

³⁸Enyuma wa kano, Yosefu, owama mu lukoba lwa Arimatea, areeba Pilato ne kali bali anyala abukula kumubili kwa Yesu. (Yosefu aba omuloondi owa Yesu, mu bwikisi, sikila aba aria Bayaudi be bunyali.) Pilato amuboolela ali anyala abukula kumubili kwa Yesu, nio Yosefu acha akubukula.

³⁹ Nikodemu, owacha khubona Yesu mu silo, acha ne Yosefu. Aaba abukuule chikiilo embi kamakhumi kataru ka manemane ne bupaani.

⁴⁰Babili bano babukula kumubili kwa Yesu mala bakura mu suuka eya katani ne bupaani khuloondekhana ne kumwiima kwe Bayaudi, khukhwerekekhera lisiikha.

⁴¹Khakuunda khaba abuundu niio bereera Yesu, mala mu khakuunda akho yabamo eng'ani embia, niyo omundu akhasiikhwakhomo tawe.

⁴²Eng'ani yaba siimbi ne lundi yaba yaramire endaalo ndala khukhwola khu Sabato. Khwako basiikha mu ng'ani omwo kumubili kwa Yesu.