Read lubukusu Yn. 2 Bible Online

Yn. 2 - lubukusu bible

Yn. 2

¹Enyuma we chindaalo chibili, siselelo siaba mu lukoba lwa Kana e Kalilaya. Maawe owa Yesu abaayo.

²Ne akhaba Yesu ne babeeka bewe beele bosi balaangiilwe mu siselelo esio.

³Nga endali ne yawa maawe owa Yesu aboolela Yesu ali, “Endali yaweele.”

⁴Yesu aamukobosia ali, “Maayi se kali bali khukhwola umboolele nisio khola tawe. Esaa yase ekhoola tawe.”

⁵Mala maawe owa Yesu aaboolela bakholi ali, “Khola sisiindu siosi siosi nisio amuboolela.”

⁶Bayaudi bali ne kamalaka ke kumwiima kwe khusaaba, ne khulwe sifuno sino chabao chinjikha sita che kamabaale, buli ndala yaba ne bubalaayi bwe khu bukula kamatepe karaano namwe sita.

⁷Nio Yesu aboolela bakholi ali, “Yichusia chinjikha chino kameechi.” Bachichusia choola khu munwa,

⁸mala aababoolela ali, “Nono khemutaekho kameechi chana matiiti muyilile Omwimeelesi owe naikara!” Bamuyilila kameechi,

⁹kakaba luno ne keekelile endali mala aakichanjamakho, se amanya endali yino yamile waena tawe (ne kakhali bakholi babataa kameechi bamanya); nio aalaanga omwene siselelo

¹⁰mala aamuboolela ali, “Buli mundu yesi yesi anyoanga anywesia endali endayi ne oli bakeni bekura ne aloondiakho musoka. Ne kakhali ewe obiikhile endali endayi lukali khukhwola siise sino!”

¹¹Kamayia kano kaba ke khunyoa niko Yesu akhola mu Kana e Kalilaya; ebweeneyo ekesia luyali lwewe mala babeeka bewe basuubila mu niye.

¹² Enyuma wa kano, Yesu ne maawe ne bawandaaye ne babeeka bewe bacha Kaperinaumu bamenyakhoyo chindaalo ndiiti.

¹³ Siise sia Naikara eye Pasaka siaba sili siimbi, nio Yesu acha Yerusalemu.

¹⁴Ebweeneyo aanyoola babaandu mu Lukaangu ne balikho bakusia chieeyi, kamakheese ne kamauusi kamabaya. Akhaba bafunja chirupia bosi baba bekhale khu mesa chabwe.

¹⁵Nio akhola kumusariti kwe chisia mala aloonda khangu kamakheese koosi ne chikhaafu biarura mu Lukaangu, afuumalikha chimesa che bafunja chirupia, mala asalanisia chirupia chabwe,

¹⁶mala arusia lilaka khwaabo bakusia kamauusi kamabaya ali, “Karusie muno! Lekha khukhola enju eya Paapa khuba esooko!”

¹⁷ Babeeka bewe bakhebulila bali liiandike liboolanga lili, “Wele, silukuluku siase khu nju yowo sioselela mwise nga kumulilo.”

¹⁸Bayaudi be bunyali bamukobosia ne lireeba bali, “Mayia siina niko onyala wakhola kakhwekesia efwe kali oli ne bunyali bwe khukhola kano?”

¹⁹ Yesu abakobosia ali, “Techula Lukaangu luno lukwe aasi, ne mu ndaalo chitaru ndalwombakha lundi.”

²⁰Bamureeba bali, “Lukaangu luno lwabukula kimiiko kamakhumi kane ne kikiindi sita khulwombakha! Mala ewe olalwombakha mu ndaalo chitaru?”

²¹Ne kakhali Lukaangu nilwo Yesu alomalomangakho lwaba kumubili kwewe.

²²Nio nga alamusibwa khukhwama mu lifwa, babeeka bewe bakhebulila bali aloma lino, mala basuubila liiandiko nende niko Yesu alomanga.

²³Nga Yesu aba mu Yerusalemu mu ndaalo cha Naikara eye Pasaka, bakali basuubila mu niye nga babona kamayia niko akhola.

²⁴Ne kakhali Yesu se abasuubila tawe; sikila aba abamanya boosi.

²⁵Se enaana omundu yesi yesi amuboleele liiba lie babaandu tawe, sikila niye omwene amanya koosi kaali mu miooyo kiabwe.