Read lubukusu Yn. 20 Bible Online

Yn. 20 - lubukusu bible

Yn. 20

¹Khu ndaalo eya Chumapili enje ne siili mabwibwi, Maria Makatalena acha khu siliindwa mala abona libaale liarusiibwe emuliango we siliindwa.

²Atima acha ola khu Simoni Petero no mweka okundi, niye Yesu asiima, mala ababoolela ali, “Barusiisie Omwami mu siliindwa, mala se khwamanyile niio bamuyilile tawe!”

³Nio Petero no mweka okundi oyo bacha khu siliindwa

⁴Bombi baba balikho batima, omweeka okundi oyo atima lukali khukhila Petero, mala anyoa oola asiliindwa.

⁵Enama mala abona chisuuka cha katani, ne se acha mukari tawe.

⁶Simoni Petero echa enyuma wewe, mala acha khangu mu siliindwa. Abona chisuuka cha katani chili ao chong'ene.

⁷Ne chingubo nicho yaba bamuboa emurwe, nacho se chaba alala ne cha katani tawe, chaba cheulukuuse chong'ene.

⁸Nio omweeka okundi chana owanyoa oola asiliindwa yesi engilamo, abona mala asuubila.

⁹(Baba basiili khumanyilisia liiandiko liboola lili, khukhwola alamukhe mu lifwa tawe.)

¹⁰Mala babeeka bakobola engo.

¹¹Maria eema enje we siliindwa nalililao. Nga aba nasilila, enama mala alola mu siliindwa,

¹²abona malaika babili bafwarire chingubo chiwaanga, bekhaale niio yaba kumubili kwa Yesu kwaba, mulala emurwe ne okundi ebikele.

¹³Bamureeba bali, “Mukhasiwe olalilanga siina?” Abakobosia ali, “Babukule Omwami wase mala se manya niio bamuyilile tawe!”

¹⁴Nio ekhebukha abona Yesu emileo, ne se amanya nali Yesu tawe.

¹⁵Yesu amureeba ali, “Mukhasiwe, olalilanga siina? Olikho oyiima naanu?” Maria ebaasia ali manya ali omulimi we khalundu, nio amuboolela ali, “Omwami waaba ne omubukuule, mboolele niio omuyilile ne ndacha mala mu bukule.”

¹⁶Yesu amulaanga ali, “Maria!” Nio Maria, ekhebukha Yesu mala aboola mu Lueburania ali, “Raboni!” (Lino liboola lili, “Omwekisia.”)

¹⁷Yesu amuboolela ali, “Okhandilakho tawe.” Sikila khaniina nakobola niye Paapa ali tawe. Ne kakhali khoche khu bawandaayase mala obaboolele oli, ese ndikho ngobola khuyo oli Paapa wase lundi Paapa wabwe, Wele wase lundi Wele wabwe.

¹⁸Nio Maria Makatalena acha aboolela babeeka ali, abone Omwami, mala ababoolela niko Yesu aaba ne amuboleele.

¹⁹Yaba Chumapili ekolooba, babeeka baba bebuusiisie alala munju mala bakhomekhe kimiliango, sikila baba barire Bayaudi be bunyali. Nio Yesu echa mala eema akari wabwe, aloma ali, “kumuleembe kube nanywe.”

²⁰Enyuma we khuloma kano, abekesia kamakhono kewe ne mumbafu. Babeeka be khoya lukali nga babona Omwami.

²¹Yesu ababoolela lundi ali, “kumuleembe kube nanywe. Nga Paapa ne anduma ese, sesi ndikho muruma enywe.”

²²Abafuakho kumuuya mala aloma ali, “Khemunyoole Roho Omutakatifu.

²³ Ne mubeela babaandu bubwoni bwabwe, aba balabeelwa, ne mwaba ne mukhababeela tawe, aba se balabeelwa tawe.”

²⁴Mulala khu beeka ekhumi na babili, Tomasi (Owalaangwa Mukhwana) se aba ne nabo nga Yesu ne echa tawe.

²⁵Nio babeeka babaandi bamuboolela bali, “Khwaboone Omwami!” Tomasi ababoolela ali, “Ese ne khabone chimbala che kimisimari mukhono mwewe, mala nde lulwala lwase khu mbala chewe, ne kumukhono kwase mu mbala che mumbafu, se suubila tawe.”

²⁶Enyuma we lichuuma, babeeka baba lundi alala munju mala bakhomekhe kimiliango. Tomasi aba ne nabo, Yesu echa mala eema akari wabwe aloma ali, “kumuleembe kube nanywe.”

²⁷Nio aboolela Tomasi ali, “Ra ano lulwala lwowo, mala olole mukhono mwase, ne reera kumukhono kwowo ore mu mbafu mwase lekha khuayaaya khube mala osuubile!”

²⁸Tomasi amukobosia ali, “Omwami wase, lundi Wele wase!”

²⁹Yesu amuboolela ali, “Ewe wasuubiile sikila wamboone? Bali ne khabi abo basuubile ne bakhaboone tawe.”

³⁰Yesu akhola kamayia kakaandi kamakali ebweeni we babeeka bewe kakhaandikwa mu sitabu sino tawe.

³¹Ne kano kaandikwe nio mwole khusuubila muli Yesu ali Kristo, Omwana owa Wele, ne khubirira mu lisuubila mu niye mwoole khuba ne bulamu.