Read lubukusu Yn. 21 Bible Online

Yn. 21 - lubukusu bible

Yn. 21

¹Enyuma wa kano, Yesu abonekha lundi khu beeka bewe a nyanja eya Tiberia. Kaba kari.

²Simoni Petero, Tomasi (olaangwa Mukhwana) Natanieli (owama Kana mu Kalilaya) bakhwa Sebetayo, ne babeeka babaandi babili ba Yesu baba alala boosi.

³ Simoni Petero aboolela babaandi ali, “Ndikho nja khunaaba.” Bamuboolela bali, “Khulacha ne nawe.” Nio bacha khu liaaro khu nyanja, ne siilo esio siosi, se banyoolakho eng'eeni tawe.

⁴Nga enyanga yaba nesoa Yesu eema khu sikiingi sie nyanja, ne babeeka se bamanya nali niye tawe.

⁵Mala abareeba ali, “Basoleeli, mwanyoolilekho siosi ku?” Bamukobosia bali, “Se khwanyoolilekho siindu tawe.”

⁶ Ababoolela ali, “Mwata lutimba lwenywe lubeka luseecha lwe liliaaro, mala mulatilakho chindala.” Nio bamwaata lutiimba, mala khunyala khulukhwesa lukobole mu liaaro tawe, sikila baba batilile ching'eeni chingali po.

⁷Omweeka niye Yesu asiima aboolela Petero ali, “Omwami niye!” Nga Petero aulila ali Omwami niye, eboa engubo yewe eye khu ngaaki (sikila aba akifuulile) mala asuna mu meechi.

⁸Babeeka babaandi becha a sikiingi khu liaaro ne balikho bakhweesa lutimba se baba aleeyi khukhwama khu sibala tawe, embi chimita emia ndala.

⁹Nga boola khu sikiingi, babona kumukaati ne ng'eeni khu mulilo.

¹⁰Nio Yesu ababoolela ali, “Reerakho ano, ching'eeni chindala nicho mwama khutiila.”

¹¹Simoni Petero acha khu liaaro, mala akhweesa lutiimba nalureera khu sikiingi. Lwaba lwechuule ching'eeni chimboofu emia ndala ne kamakhumi karaano na chitaru choosi alala, akhaba ne chaba chingali chirio, lutiimba se lwakitukha tawe.

¹²Yesu abalaanga ali, “Khemwiche mulie.” Sabao omweeka owenyiila khumureeba ali, “Ewe oli naanu tawe?” Sikila bamanya bali aaba Omwami.

¹³Nio Yesu acha, abukula kimikaati ne ching'eeni mala abaelesia.

¹⁴Luno lwaba lukhola khataru Yesu khubonekha khu beeka bewe enyuma we khulamukha khukhwama mu lifwa.

¹⁵Enyuma we khulia, Yesu areeba Simoni Petero ali, “Simoni, okhwa Yoana, ewe wasiima ese khukhila babaandi bano ku?” Akobosia ali, “Yee Omwami, ewe Omanyile oli ese nakhusiima.” Yesu amuboolela ali, “Liinda kamameeme kase.”

¹⁶Lukhola khabili Yesu areeba Petero ali, “Simoni okhwa Yoana, ewe wasiima?” Amukobosia ali, “Yee Omwami, ewe Omanyile oli ese nakhusiima ewe.” Yesu amuboolela ali, “Liinda kamakheese kase.”

¹⁷Lukhola khataru Yesu amureeba ali, Simoni okhwa Yoana, ewe wasiima ese. Petero akhalala sikila Yesu amureebire lukhola khataru ali, “Ewe wasiima ese ku?” Nio amuboolela ali, “Omwami ewe omanyile buli siindu, ewe omanyile oli nakhusiima!” Yesu amuboolela ali, “Liisia kamakheese kase.

¹⁸Ndikho khuboolela bung'ali: Nga ne waba nosiili omuele, werekekhanga mala ocha osi osi niio wenyanga khucha, ne kakhali nga okhasaakhuluwe, okhareo kamakhono kowo mala omundu okundi akhakhuboe mala akhuyile niio ewe okhenya khucha tawe.”

¹⁹(Mukhuloma lino, Yesu aba alikho okesia engila niyo Petero alifwilamo, mala areere luyali khu Wele.) Nio Yesu amuboolela ali, “Nondekho!”

²⁰ Petero ekhebukha enyuma mala abona omweeka okundi niye Yesu asiima, oyo owayeekha khu Yesu asialwa lundi owa mureeba ali, “Omwami, naanu olikho ocha khukhuchaama ewe?”

²¹Nga Petero ne amubona areeba Yesu ali, “Omwami ne yuno naye?”

²²Yesu amukobosia ali, “Nakheenya niye amenye khukhwola nga ne nicha, lilienelio lili siina khwiwe? Ewe nondekho!”

²³Nio likhuwa liakeenda mu babeeka ba Yesu bali omweeka yuno se alifwa tawe. Kakhaba kario Yesu se aaloma ali omweeka oyo se alifwa tawe tawe, ne kakhali aaloma ali, “Naaba ne nenya amenye khukhwola nga nicha, lilienelio lili siina khwiwe.”

²⁴Yuno niye omweeka owalomaloma kamakhuwa kano, ne lundi ali niye owa kaandika, mala khu manyile khuli niko aloma kali kang'ali.

²⁵Ne kakhali, biliio bibiindu bibiindi bikali nibio Yesu akhola. Abanga biaandikwa sia silala mu bitabu, nibaasia ndi andi sibala sioosi se siakhabeele ne bubweyaangu bwe khubiikha bitabu ebio tawe.